Bu gün Strasburqda AŞPA-nın növbəti toplantısı start götürəcək. Toplantıda bir sıra ölkələr, eləcə də Azərbaycanda insan hüquq və azadlıqlarının vəziyyəti müzakirə ediləcək. Müzakirələr zamanı Azərbaycanın ünvanına tənqidi bəyanatların səsləndiriləcəyi, demokratiya baxımdan vəziyyətin qeyri-qənaətbəxş olduğu ilə bağlı bəyanatın veriləcəyi gözlənilir.

Qərbin və beynəlxalq təşkilatların bu qəbildən olan bəyanatlarını hər zaman əks ittihamla qarşılayan hakimiyyətin AŞPA-nın qarşıdakı toplantısında verilən bəyanatlara da sərt təpgi göstərəcəyi ehtimal olunur. Belə ki, artıq indidən bəzi millət vəkilləri Azərbaycan əleyhinə qəbul edilən istənilən bəyanata adekvat cavab veriləcəyi ilə bağlı fikirlər səsləndirməkdir.

AŞPA və digər beynəlxalq təşkilatlar tərəfindən qəbul edilən tənqidi bəyanatlara ölkənin müxalifət düşərgəsində də birmənalı münsibət mövcud deyil.

Belə ki, bəzi müxalifət təmsilçiləri Azərbaycanda mövcud siyasi sistemi tənqid edən bu cür bəyanatların kifayət qədər böyük əhəmiyyət daşıdığını iddia etsə də, bəzi siyasilər uzun illərdir ki, səsləndirilən və adət halını alan bu bəyanatların real vəziyyətə təsir göstərmədiyi qənaətindədir. Onların fikrincə, sadəcə bəyanatlarla hakimiyyət təsir göstərmək, onu hansısa islahat və ya demokratik dəyişikliyə vadar etmək mümkün deyil.

Maraqlıdır, AŞPA-da Azərbaycanda demokratiya və insan haqlarının mövcud vəziyyəti ilə bağlı qəbul edilən hər hansı bəyanat az və ya çox dərəcədə əhəmiyyət kəsb edirmi? Bu cür bəyanatlarla nəyisə dəyişmək, hakimiyyəti hansısa islahatlara vadar etmək mümkündürmü? Əgər mümkün deyilsə, o zaman bu bəyanatların nə əhəmiyyəti var?

Məsələ ilə bağlı Moderator.az saytı və “Hürriyyət” qəzetinə açıqlama verən ehtiyatda olan ədliyyə generalı, Milli Şuranın hüquq komissiyasının rəhbəri Vidadi Mirkamal öncə Azərbaycanla bağlı irəli sürülən tələblər və onu doğuran səbəblərə diqqət çəkdi:

 “Azərbaycan hazırda Avropa və dünyaya inteqrasiya etmək arzusunda olan bir dövlətdir. Azərbaycan bununla bağlı bir sıra beynəlxalq təşkilatlar qarşısında ciddi öhdəliklər götürüb. Ölkəmizin Avropaya inteqrasiya olunması xırda bir hadisə deyil. Bu, böyük bir hüquqi, ictimai və siyasi hadisədir. Azərbaycan qarşısına böyük məqsədlər qoyub və ciddi öhdəliklər götürüb. Indi isə həmin təşkilatlar Azərbaycandan bu öhdəliklərin icrası ilə bağlı hesabat tələb edir. Bu öhdəliklərin götürülməsi tarixindən az vaxt keçməyib. Son 15-20 il ərzində Azərbaycan bu istiqamətdə xeyli iş görməli idi. Ölkədə demokratiya və insan hüquqları, eləcə də siyasi islahatlar istiqamətində müəyyən addımlar atılmalı idi. Bu gün Azərbaycandan məhz bu istiqamətdə iş tələb olunur. Avropa bilmək istəyir ki, Qərbə inteqrasiya etmək istəyən dövlət bu müddət ərzində hansı işlər görür. İndi isə məlum olur ki, Azərbaycan bir çox sahələrdə geriləyib”.

V.Mirkamalın qənaətincə, Azərbaycan ötən zamandan faydalanmayıb və demokratiyanın inkişafı üçün gərəkli olan addımları atmayıb:

“Beynəlxalq təşkilatlar qarşısında götürülən öhdəliklər yerinə yetirilməyib. Bunun ən bariz nümunəsi insan haqlarının pozulması, siyasi islahatların keçirilməməsi, avtoritar rejimin mövcudluğu və s-dir”.

V.Mirkamalın bildirdiyinə görə, Azərbaycan Qərbə inteqrasiya ilə bağlı istək ortaya qoysa da, bu istəyi reallaşdırmaq üçün lazımi iradə ortaya qoymayıb:

“Azərbaycana qarşı tələblər kifayət qədər böyükdür. Son vaxtlar demək olar ki, elə bir ay olmayıb ki, Azərbaycanda insan haqlarının vəziyyəti, şəffaf və demokratik seçkilər, siyasi məhbus probleminin həlli və s. beynəlxalq təşkilatlar tərəfindən gündəmə gətirilməsin. Və mən bunu normal qarşılayıram. Çünki Azərbaycan desə ki, mən Afrika dövlətiyəm, banan ölkəsiyəm, cənub-şərqi Asiya dövlətiyəm və mənim qarşımda heç bir tələb qoyulmayıb, heç bir öhdəlik götürməmişəm, o zaman beynəlxalq təşkilatlar baş verənlərlə maraqlanmaz. Lakin Azərbaycan Qərbə inteqrasiya etməyi qarşısına məqsəd qoyan və üzərinə müəyyən öhdəliklər götürən bir dövlətdir. Bu baxımdan təbii ki, onun qarşısında müəyyən tələblər qoyulacaq və üzərinə götürdüyü öhdəliklərin icrası tələb olunacaq”.

Seymur Əliyev