“Borçalı” İctimai Cəmiyyəti iyunun 27-də “Milli şüurun formalaşmasında Elat mədəniyyətinin rolu” mövzusunda növbəti “Dədə Camal Məclisi”ni keçirdi. 

Moderator.az -ın məlumatına görə, tədbirdə alimlər, yazıçı və şairlər, el sənətkarları iştirak edirdilər.

“Borçalı” İctimai Cəmiyyətinin Mətbuat və İnformasiya Xidmətindən Moderator.az -a verilən məlumata görə, Cəmiyyətin sədri Zəlimxan Məmmədli iştirakçıları salamlayaraq tədbiri açıq elan etdi və giriş sözü söylədi. O, qarşıdan VII “Borçalı Türklərinin Elat mədəniyyəti günü” festivalının yaxınlaşdığını xatırlatdı, bayrama hazırlıqla bağlı iştirakçılara bilgilər verdi. Özünün və müavini Salman Murğuzlunun Gürcüstana getməsini yasaqlayan qərarın hələ də aradan qaldırılmadığını təəssüf hissi ilə qeyd etdi və bu problemin çox çəkmədən aradan qaldırılacağına ümid etdiyini dilə gətirdi. Zəlimxan Məmmədli çıxışını bitirdikdən sonra məclisi aparmaq üçün sözü Ramiz Həsənova verdi.

Aparıcı məruzə üçün tarix üzrə fəlsəfə doktoru, etnoqraf, şair Əsəd Əliyevi kürsüyə dəvət etdi. Məruzəçi Elat mədəniyyətinin mahiyyəti, onun klassik türk adət-ənənəsinə sadiqliyindən geniş danışaraq, bu mədəniyyətin yaşadılmasının əhalinin kökə-yurda bağlılığını yüksək səviyyədə təmin etdiyindən bəhs etdi. Əsəd Əliyev eləcə də, Borçalıda Elat bayramının formalaşdırılması və bu bayramın ənənə halını almasında başda Zəlimxan Məmmədli olmaqla bu işdə əməyi olan hər bir “Borçalı” Cəmiyyəti üzvünə təşəkkürünü bildirdi.

Tarix elmləri doktoru, professor Nəsib Nəsiblinin çıxışı da diqqət çəkdi. Natiq orta əsr türk tarixinə səyahət etməklə, onun ətrafında baş verən ictimai-siyasi hadisələrə mövqeyini ifadə etdi və günümüzdə gedən proseslərlə müqayisələr apardı.

Şair Oqtay Rza VI Elat bayramında iştirakından ağızdolusu danışmaqla, Armudlu yaylağında qələmə aldığı şeirini oxudu və bu il VII Elat bayramında da iştirak edəcəyini yüksək ovqatla söylədi.

Texnika üzrə fəlsəfə doktoru Hacan Hacıyev elin yaylaq-qışlaq köçlərindən və onun Elat mədəniyyətinin başlıca qayəsini təşkil etdiyindən söhbət açdı. Hacan müəllimin Elatda tarixən keçirilmiş idman yarışlarından ətraflı bəhs etməsi də maraqla dinlənildi. Hacan Hacıyev “Borçalı” Cəmiyyətinin bəzi üzvlərinin Gürcüstana buraxılmamasına da mövqe bildirdi. O, bu məsələylə bağlı “Borçalı” Cəmiyyətinin nizamnaməsində Gürcüstan üçün təhlükə yaradacaq heç bir şeyin olmadığını dilə gətirdi. “Azərbaycan Respublikası Gürcüstana hansı münasibəti bəsləyirsə “Borçalı” Cəmiyyəti də eyni mövqenin daşıyıcısıdır. Elat bayramında gənc nəsilə vətəni sevmək, millətini, dövlətini, yaşadığı ölkənin ərazi bütövlüyünü sevmək aşılanırsa, insanlar barışa, sülhə çağrılırsa burada nöqsan axtarmağa gərək yoxdur”, ”“ deyərək Hacan müəllim çıxışını sona çatdırdı.

Rüfət Muradlı Elat bayramı və onun rolu barədə fikir bildirdikdən sonra yeni nəşr olunmuş “Azadlıq hekayələri” və “Atlara kurşun sıkmayın” adlı kitablarını təqdim etmək üçün yazıçı Eluca Atalını kürsüyə dəvət etdi. Eluca xanım kitabları barədə qısa fikir söylədikdən sonra “Borçalı” Cəmiyyətinə təşəkkür edərək, kitablarının Azərbaycan üzrə ilk təqdimatının məhz “Borçalı” Cəmiyyətinin auditoriyası qarşısında olduğundan məmnunluq ifadə etdi və kitabının müzakirəsini də bu cəmiyyətlə birlikdə keçirmək niyyətinin olduğunu dedi.

Yazıçı Əlisahib Əlioğlu kitabla bağlı qısa fikirlərini dedikdən sonra, Elat mədəniyyəti barədə düşündüklərini iştirakçılarla bölüşdü.

Gülarə Yenisey qısaca çıxış etməklə Elat bayramı münasibətilə təbrikini auditoriyaya çatdırdı.

Sülhiyyə Musaqızı Kəmalə Tural və Düzgün Atalı Eluca Atalının kitablarının məziyyətlərindən bəhs etdilər.

Türkiyəli qonaq, türkoloq-alim Oğuz Doğan Elatın ən qədim türk mədəniyyət növü olduğunu söylədi və əcnəbi mədəniyyətlərlə müqayisəsini apararaq Elatın daha köklü mədəniyyət olduğunu söylədi.

Elat bayramına hazırlıqla bağlı Ramiz Həsənov çıxış etdi, Salman Murğuzlu və Əmirxan Babaşov da hazırlıq işləri ilə bağlı fikir və təkliflərini dedilər.

Yekun sözü demək üçün sədr Zəlimxan Məmmədli bir daha kürsüyə dəvət olundu. Zəlimxan Məmmədli VII Elatın böyük birlik qurultayı olduğunu dedi. O bəzi məmurların bu toparlanmanın qarşısını almaq üçün özünün və müavininin yolunu kəsməklə böyük bir xəta törətdiyini, bununla borçalılıların hüququnu pozduğunu və onların Gürcüstanın ictimai-siyasi həyatında yaxından iştirakının qarşısını almağa çalışdığını qeyd edərək, bunun doğru siyasət olmadığını dedi. Zəlimxan Məmmədli “Məni Gürcüstana buraxmaya bilərlər, amma mən iyulun 26-da orada olacam, bunu necə edəcəyimi bir özüm, bir də Allahım bilir”, ”“ deyə vurğuladı.

Daha sonra qocaman Aşıq Mahmud Məmmədov səhnəyə dəvət olundu. Zəlimxan Məmmədli ustad aşığı 80 yaşının tamam olması münasibətilə məclis adından təbrik etdi və xatirə hədiyyələrini təqdim etdi. Ustad aşıq iştirakçıları salamladıqdan, cəmiyyətin fəaliyyətinə xeyir-dua verdikdən və diqqətə görə təşəkkür etdikdən sonra, aşıq havası ilə könülləri oxşadı.

Aşıq Cahangir və Aşıq Əşrəfin ifaları məclisə bir ayrı təravətbəxş verdi.