Təhsil naziri Mikayıl Cabbarovun ANS TV-də Mir Şahin Ağayevə müsahibə verməsi və müsahibə zamanı səsləndirdiyi fikirlər iki gündür ki, mətbuatda müzakirə olunmaqdadır. Nazirin müsahibə zamanı toxunduğu bir çox məqamlar cəmiyyətdə maraqla qarşılanıb. 

M.Cabbarov müəllimlərin əmək haqqının artırılması niyyətində olduğunu açıqlayıb. Nazir olduğu dövrdə təhsil sisteminə qazandırdığı müsbət məqamlarla bağlı suallara cavab verən Mikayıl Cabbarov Mir Şahinin sərt sualları ilə də qarşılaşıb. 

“Bu müsahibəni Təhsil naziri ilə “Açıq söhbət” kimi də dəyərləndirmək olar. Təhsil nazirinin Mir Şahinlə müsahibəsində yadda qalan əsas məqamlardan biri Mir Şahinin bir qədər qərəzli görünməsi idi. Bu mənim subyektiv fikrimdir. Mən Mir Şahini təhsilin problemlərindən xəbəri olan adam kimi tanıyıram. Bəlkə də bu onun ümumi istedadının tərkib hissəsidir. Ancaq bu müsahibədə onun bu keyfiyyəti özünü büruzə vermədi. Məsələn, Mir Şahinin keçmiş təhsil naziri Misir Mərdanovla çox “səmimi” və əmin-amanlıqla müşahidə olunan müsahibələri olub. Yəni 15 il təhsil naziri işləmiş və təhsildə tənəzzülün “atası” sayılan Misir Mərdanova Cabbarova verilən suallar tipində suallar verilmirdi. Mikayıl Cabbarovun cavabları akademik cavablar idi və hiss olunurdu ki, cavablar Mir Şahini həm də təəccübləndirir. Belə bir deyim var. “Yaxşı sual cavabın yarısıdır”. Məsələn, Mir Şahinin verdiyi “Orta təhsilin 12 illiyə keçidi cəmiyyətdə müəyyən qədər müzakirə olunan mövzudur. Elə mən bura gələndə, məsələn, bizim işçilərimizdən birinin çox ürəklə, həvəslə və eyni zamanda həyəcanla verdiyi sualdır. Nə verəcək bu 12 illik təhsil bizə? Dala salacaq bizi, yoxsa qabağa salacaq? Nə ilə bağlıdır”? sualı “Tarixi-Nadir”i oxumaq məsələsini yada salır”. 

E.Əliyevin sözlərinə görə, müəllimlərin maaşının artırılması, gənclərin bu sahəyə cəlb edilməsi istiqamətində hazırkı təhsil naziri daha uğurlu addımlar atıb: “Orta məktəb müəllimlərinin əməkhaqqının böyük faizlə artımı Cabbarovun nazir işlədiyi vaxtda olub. Əslində bu proses rasional şəkildə aparıldı. Prosesdə müəllimlərin biliklərinin diaqnostik qiymətləndirilməsi əsas götürüldü. Bu texnologiya əvvəllər düşünülməmişdi. Lakin bunu və 500 baldan yuxarı nəticə göstərib, pedaqoji ixtisasları 1-ci göstərənlərə 100 manat əlavə təqaüdün təyin olunmasını yenilik kimi görməyənlərə təəccüblənmək lazımdır. “Sabah” qruplarının yaradılması, həmçinin fənn olimpiadalarının yüksək səviyyədə keçirilməsini Mir Şahinin qeyd etdiyi təkamül yoluna aid etmək olmaz. Bu il 700 bal toplayanların sayının ötən illərlə müqayisədə daha çox olmasında fənn olimpiadalarının rolu danılmazdır. Məncə, M.Cabbarov xaricdə təhsil alanlar və 12 illik təhsillə bağlı verilən suallara aydınlıq gətirə bildi. Ali məktəb rektorlarının tabeçiliyi məsələsinə gəldikdə isə o, fikrini açıq şəkildə bildirdi ki, məqsəd Azərbaycan təhsilinin keyfiyyətinin artırılması, müvafiq ali təhsil müəssisəsinin fəaliyyətinin təkmilləşməsindən ibarətdir: “Bu günkü gündə bir təhsil naziri kimi mən rektorlarla münasibətlərdən şikayətçi deyiləm. Kiminsə işini biz daha yüksək qiymətləndiririk, kiminsə işini o qədər də yox”.  

Ekspert qeyd etdi ki, müsahibədə maraqlı suallardan biri nazirin ölkənin bütün təhsilinin hansı faizinə rəhbərlik etməsi ilə bağlı oldu: “Mikayıl Cabbarov real durumdan çıxış edərək təhsil müəssisələrinin ikili tabeçiliyindən danışdı. Ancaq mən gözləyirdim ki, o, ikili tabeçiliyin zərərini də qeyd edəcək. Təhsil Nazirliyinin strukturunun təkmilləşdirilməsi haqqında Azərbaycan prezidentinin sərəncamı ilə 15 regional təhsil idarəsi yaradılıb. Ancaq hansısa səbəblərdən bu sərəncamın icrası dayandırıldı. Bu sərəncam orta məktəbləri ikili tabeçilikdən xilas edir. Orta təhsildə tənəzzülü ikili tabeçilik yaradır. Məncə bu barədə və inkişafa əngəl törədən digər amillər barədə cəsarətli danışmaq lazımdır. Çünki təhsilin problemi hamımızın problemidir”.