Keçmiş maliyyə naziri, iqtisadçı alim, professor Saleh Məmmədov sosial şəbəkələrdə ölkədəki biznes mühitinin acınacaqlı durumda olduğunu əks etdirən bir karikaturaya maraqlı şərh verib:

"Nə gözəl əsərdi, müəllifinin əlləri var olsun, bir az manelərin siyahasını çox az göstərib, amma yenə də gerçəkliyi çox aydın ifadə edir. 80-ci illərin ikinci yarısında Qorbaçovun islahatları başlayan zaman mən Leninqrad şəhərində doktoranturada oxuyurdum. Bir ABŞ-lı biznesmen, həm də professor qonaq gəlmişdi, eşidəndə ki, mən Azərbaycanlıyam, çox maraqlandı və dedi ki, Azərbaycan biznesmenləri çox güclüdürlər. Mən deyəndə ki, bizdə nə biznes var, nə də biznesmen və ümümiyyətlə bu işlə məşğul olanların sonu ya 15 ildi, ya da ölüm cəzası. Varsa-varsa, bir neçə "sexovşik" var. Dedi, yox, elə deyil, siz onların fəaliyyətini yaxşı öyrənin. Dövlətin bu işi rəsmən qadağan eləməsinə, onlarla nəzarət orqanlarını (milis, prokurorluq, xalq nəzarəti, partiya sturukturları, obxss, məhkəmə, maliyyə, banklar və s.) ələ alaraq, onları da yaşadırlar, özləri də qazanırlar. Bunların yerinə bir Amerikalı biznesmen qoysan, bir gün də tab gətirə bilməzlər. Siz bu amili ciddi nəzərə alın, bundan sonra biznesmenlər sizə çox fayda verəcək. 

Doğrudan da elə oldu, iş adamlarımız ölkənin inkişafında çox böyük rol oynadı. Amma təəssüflər olsun ki, hökümət tərəfindən hər cür dəstək verilməsinə baxmayaraq, yenə də böyük maneələr qalmaqdadır. Təsadüfi deyil ki, ölkədən kənara çıxan kimi iş adamlarımız ciddi nailiyyətlər qazanırlar. Ölkədən kənarda işləyən biznesmenlərimiz içində onlarla milyarder formalaşıb, amma içəridə bir nəfər də olsun milyarder yoxdu. Hə deyə bilərlər, bizdə də var, amma üzə düşmürlər. Amma onlardan bu ölkəyə nə fayda? Milyarderi ona görə istəyirik ki, büdcəmizi formalaşdırmağa kömək etsin, vətəndaşlarımıza iş yerləri açsın, onlara yaxşı əmək haqqı versin, xeyriyyəçilik etsin, elmimizə, təhsilimizə kömək etsin. Bir Azərbaycanlı kimi iş adami Vahid Ələkbərov illik bütün Azərbaycandan iki dəfə çox məhsul istehsal edir və hər ildə Rusiyanın büdcəsinə 40 mlrd dollara yaxın vergi verir. Müqayisə üçün Azərbaycanın büdcəsi 20 milyard ətrafındadı. Elə düşünməyin ki, o bunu Azərbaycanda edə bilməzdi. Bu gün biznes fəaliyyəti də qloballaşmışdı, global dünya çərçivəsində o bunu harada şərait varsa orada da edə bilərdi."