Bu gün Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasında Almaniya Azərbaycan Forumunun rəhbərlərindən olan tanınmış hüquqşünas Hans Eberhard Şlayer və publisist Rixard Kisler ilə görüş keçirilib. Görüşdə bir sıra məsələlər ətrafında fikir mübadiləsi aparılıb.

Hans-Eberhard Şlayer təmsil etdiyi qurumun fəaliyyətinə toxunaraq bildirib ki, rəhbərlik etdiyi nümayəndə heyətinin Azərbaycana səfəri Almaniya-Azərbaycan əlaqələrinin inkişafına, xüsusilə iki ölkənin sahibkarları arasında ticarət əlaqələrinin genişlənməsinə müsbət töhfə vermək məqsədi daşıyır. Cənab Şlayer Azərbaycan sahibkarlarının bu ilin noyabr ayında Almaniyanın Ştutqart şəhərinə planlaşdırılan səfərnin ikitərəfli biznes münasibətlərinin inkişafının göstəricisi olduğunu deyib. Cənab Şlayer qeyd edib ki, Almaniya ictimaiyyəti təəssüfki, Azərbaycan haqqında dolğun məlumata malik deyil. Məhz bu məlumatsızlıq yerli mediada Azərbaycana qarşı əsassız yazıların dərc olunmasına gətirib çıxarır. Qonaq həmçinin Almaniyanın və ümumilikdə Avropa İttifaqının Şərq Tərəfdaşlığı ölkələri ilə bağlı düşünülmüş strategiyasının olmadığını xüsusi vurğulayaraq Ukraynadakı hadisələrin bunu təsdiq etdiyini bildirib.

Şura sədri Azay Quliyev, Almaniya-Azərbaycan Forumunun üzvlərinin Azərbaycana səfərinin əhəmiyyətini vurğulayıb və qonağın Ukraynadakı hadisələri ilə bağlı fikrini dəstəklədiyini qeyd edib: “Əgər vaxtı ilə Avropa İttifaqı mövcud həll edilməmiş münaqişələrə və işğalçı dövlətlərə eyni yanaşma sərgiləsəydi və burada iki standartlardan çıxış etməsəydi, Ukraynadakı hadisələrin qarşısını almaq olardı”.

Azay Quliyev təəssüflə bildirib ki, Almaniya mətbuatında Azərbaycan haqqında dərc olunan əsassız və qərəzli yazılar həmin media orqanların ölkəmiz haqqında obyektiv məlumatlara malik olmamasından irəli gəlir. Digər tərəfdən isə bir çox hallarda nəinki media qurumları, hətta Avropanın müəyyən siyasi dairələri belə heç bir əsası olmayan məlumatlara söykənərək və ikili standartlardan çıxış edərək ölkəmizə qarşı qərəzli və ədalətsiz addımlar atırlar. Almaniya Bundestaqı və Avropa Parlamenti tərəfindən Azərbaycana qarşı qəbul edilən son qətnamələr buna sübutdur. Bu cür haqsız addımlara cavab olaraq Azərbaycan AVRONEST PA-dan çıxmaq haqqında qərar qəbul etməyə və Aİ ilə münasibətlərinə yenidən nəzərdə keçirtməyə məcbur olub.

Şura sədri qeyd edib ki, gələn il ATƏT-də sədrliyin Almaniyaya keçməsi rəsmi Berlinin Avropada iki standartlar siyasətinə son qoymasına və işğalçı Ermənistana qarşı sanksiyaların tətbiqi ilə bağlı qərarların qəbuluna əlverişli fürsət yaradacaq.