Bu günlərdə Moderator.az -a müraciət edən Qarabağ müharibəsi veteranı, Ağdam rayonundan olan məcburi köçkün Abbasov Namiq Ağaverdi oğlu saytımız vasitəsi ilə ölkə başçısı, Silahlı Qüvvələrin Ali Baş Komandanı İlham Əliyevə müraciət edib. 

Müraciətində uzun illərdir ki, həyat yoldaşı və üç övladı ilə ağır mənzil şəraitində yaşadığına diqqət çəkən N.Abbasov, prezidentdən əsl işgəncəyə çevrilən bu yaşama son qoymağı xahiş edib:

“Cənab prezident. Mən Qarabağ müharibəsi veteranı Abbasov Namiq Ağaverdi oğlu 1992-1996-cı illərdə Azərbaycanın ərazi bütövlüyü uğrunda gedən döyüşlərdə iştirak etmişəm. 1993-cü ildə, mən müharibədə olan zaman ailəmiz erməni işğalı ilə əlaqədar olaraq doğma rayonumuz Ağdamı tərk etməyə məcbur olub. 1997-ci ildə mən ailəmlə birlikdə Bakının Nərimanov rayonunda, Cıdır meydanı deyilən ərazidə vaqonda məskunlaşmışam. Bir otaqdan ibarət kiçikölçülü vaqon-mənzil yaşayış üçün tamamilə yararsız olsa da, bu illər ərzində köçkün həyatının gətirdiyi məhrumiyyətlərə dözməyə, ağır şərtlər altında yaşamımıza davam etməyə çalışmışıq. Lakin bu cür ağır yaşam tərzi bizim, xüsusilə də övladlarımızın səhhətində dərin iz qoymuş, onların üçünü də xəstə salıb. Artıq bir neçə ildir ki, bütün ailə vəsaitimiz övladlarımızın müalicəsinə sərf olunur. Yaxın qohumların, xeyrixah insanların köməyi ilə övladlarımızın həyatını xilas etməyə çalışırıq. Böyük övladım böyrək iltihabı xəstəliyindən bir neçə ildir ki, müalicə alır. 2015-ci il təvəllüdlü övladım Məhəmməd isə anadan olan gündən bu vaxta kimi bir neçə ağır xəstəlikdən əziyyət çəkməkdədir. Iki ildir ki, serebral iflicdən müalicə alan övladımın bu duruma düşməsində bilavasitə mənzil şəraiti rol oynadığından onun bu şəraitdə müalicəsinin fayda verməsi də mümkünsüzdür. 

Cənab prezident.Vəziyyətimizi daha aydın təsəvvür etməyiniz üçün vurğulayım ki, yaşadığımız vaqonda nəinki tərpənmək, hətta ciyərdolusu nəfəs almaq belə mümkünsüzdür. Mənzilimizin damı sıradan çıxdığı üçün qış aylarında yağan yağışlar bilavasitə otağın içinə tökülür. Döşəmə və dörd bir yanı dəlik-deşik olan otaqda il boyu müxtəlif gəmiricilərə qarşı mübarizə aparmalı oluruq. 

Cənab ali baş komandan. Sizdən bir müharibə veteranı kimi ailəmizin düşdüyü bu ağır vəziyyəti nəzərə alaraq bizə kömək etməyinizi xahiş edirəm. Bir daha qeyd edirəm ki, məni ən çox narahat edən övladlarımın səhhəti, onların itirilməkdə olan sağlamlığıdır. Hansı ki, bizim normal mənzillə təminatımız bu problemin həllində mühüm rol oynamaqla yanaşı, faktiki olaraq sabahın əsgəri olan xəstə övladımın da həyatını qurtara bilər. Odur ki, sizdən mənzil şəraitimizin yaxşılaşdırılmasına köməklik göstərməyinizi rica edirəm. Əminəm ki, bir müharibə veteranı, məcburi köçkün və sıradan bir azərbaycanlı vətəndaşı kimi sizə ünvanladığımız bu müraciət bizim ailəmizi xilas edəcək və övladlarım bundan sonrakı sabahlarını onların sağlamlığı üçün təhdid yaratmayan normal bir mənzildə açacaqdır.