Xatirinizdədirsə, bu ifadəni bir müddət öncə jurnalistikanın Allahı hesab etdiyim Aydın Canıyev yazmışdı. Öz sonunu gətirən sitat haqqında. Nəyə görə öz sonunu gətirən? Ona görə ki, etibardan başqa bütün mənfi keyfiyyətləri cəmdəyində cəm edən bu məxluq çabaladıqca batır, batdıqca da çabalayır. Ətrafa da bataqlığın lığını çiləyir...

Bu gün də mənim üçün batdı, lap kəndimizin zəli gölündə ağnayan camışlarının batdığı kimi. Canıyev demiş, doyunca da “sevdirdi” özünü nəslimin başıpapaqlılarına.

Məsələ belə vaqe oldu ki, bu məxluq növbəti dəfə bir sabunlu status yazdı: “Avtomobil qəzası nəticəsində həyatını dəyişmiş süpürgəçi qadının fotosu, təbii ki, ürəkdağlayan mənzərədir. Amma bəzilərinin bunu (heç bir əsası olmadan) “75 yaşlı qadın” kimi təqdim edib, siyasi çalarlarla yazmasına nə deyəsən? Ayıbdır sadəcə, çox ayıb!”. 

Və mən də bu statusa reaksiya verdim ki, “yazanlar haqlıdır, o yaşda qadın küçə süpürərmi? O yaşda qadının evində oturub nəvə-nəticəylə oynayan vaxtıdır. Ümumiyyətlə? küçələri niyə qadınlar süpürür axı? Ölkəyə gələn xaricilər də bizə ilk olaraq bu sualı verir”. 

Yoldaş Hüseynov sualıma iki sualla cavab verdi: “Hansı yaşda? Deyirsiniz ki, küçələri niyə qadınlar süpürür? Kişilər süpürsün?” Hüseynovun əvvəlcə ikinci sualına cavab verdim: “Kişilər süpürsün, maşın təmizləsin, orasını artıq düşünənlər düşünsün”. Birinci sualını isə küçə süpürən ahıl nənələrin fotoları ilə cavabladım. 

Məlum fotolardan sonra isə söz tapmayıb valı dəyişdi və mənə yenidən bir sual ünvanladı: “Siz rası olarsınızmı atanız, qardaşınız, həyat yoldaşınız əlinə süpürgə alıb, küçə süpürsün?” 

Nə başınızı ağrıdım, mən də eynən onun kimi cavab verməmək haqqımdan istifadə etdim. Həmin sualına bir qədər dəyişiklik edib özünə qaytardım: “Bəs siz razı olarsınızmı yaşlı ananız, bacınız başqa kişilərin qarşısında əyilib küçə süpürsün? İran demokratik ölkə deyil, ancaq orada qadın küçə süpürmür. Artıq üçüncü ildir İrandan gələn qohumların “qadınlarınızın küçədə dombalmasına necə razı olursunuz?” suallları qarşısında da əzilən siz deyilsiniz, mənəm”. 

Bu cavabımdan sonra "sitatın sonu"ndan səs çıxmadı, necə ki, iranlılar mənə bu sualı verəndə cavab verməyə söz tapmıram, lal oluram. 

Düşündüm ki, yəqin səhvini qanıb, ayıbına “kor olub”. Sən demə, yanılmışam, həmin bu məxluqat ünvanıma xoşagəlməz ifadələr işlədərək məni bloka atıb: “Rumiyyə Miraslan, çox tərbiyəsiz və səviyyəsiz olduğunuza görə sizi blok edirəm. Yaxşı yol!” 

Bununla da sübut edib ki, bir qadının dediyi haqqın qabağında duruş gətirməyə kişiliyi çatmır.

Etibar Hüseynov, bildiyim qədər, feysdə “blok” sənin yerin idi axı. Bir müddət öncə qaşınan buynuzlarını çomağına sürtdüyün üçün gözünə döndüyüm Mirşahin səni vasil eləmişdi o “müqəddəs məkana”. İndi öz yerini mənə rəva görürsən? Məşhur filmdə sağıcı işləyən qadının dediyi kimi, “Əvəz çıxırsan ay o....?”. 

Mənim kim olduğumu, hansı tərbiyənin, səviyyənin sahibi olduğumu dostluq etdiyin yardımlılardan soruşsan, sənə deyərlər. Ancaq sənin “kimliyini”, hansı tərbiyəsizliyin yiyəsi olduğunu, hansı “məzhəb"ə qulluq etdiyini bilməyən yoxdur. Necə deyərlər, məşhuri-cahansan, 72 faizli sabun kimi. 

Bir müddət TV ekranlarında çıxarmadığın pəstahlar qalmadı. Söyə-söyə deputat oldun, kreslo gördü ac gözün. Ancaq millətdən başqa hər kəsə “vəkillik” elədin. Sonra “nə mal” olduğunu gördülər, anladılar və cəmdəyini vızıldatdılar bayıra. İndi də sosial şəbəkələrdə eşələnirsən, yenidən “gün görmək” üçün yollar axtarırsan. Ha əlləşirsən, ha vuruşursan, doyunca otura bilmədiyin deputat kreslosuna qovuşa bilmirsən ki, bilmirsən. Hansı sabundan istifadə eləsən də, əsla xeyri olmur, bir “deşik” tapıb başını soxmağı bacarmırsan. 

Bilirsənmi niyə? Çünki sən keyfiyyətsiz Çin malı kimi bir şeysən. Bu gün də bir daha öz dilinlə özünü ifşa etdin, süpürgəçiliyi Azərbaycan qadınına yaraşdırdın. Bununla da sübut etdin ki, bu gün qadını vitse-prezident səviyyəsinə yüksəldən iqtidar sıralarında sənin kimi, süpürgəçiliyi ancaq qadına yaraşdıran boş başların yeri yoxdur! 

Bilmirsənsə, arada bir şəhərə çıx. İçəri şəhər metrosundan üzü bulvar istiqamətinə düş. Həmin ərazilərdə bir dənə də qadın süpürgəçi tapa bilməzsən. Çünki artıq dövlət də qəbul edir ki, Azərbaycan qadınının küçələrdə yad kişilərin qarşısında əyilib süpürgə süpürməsi doğru hal deyil. 

Sənin kimi “debillər” bu mənzərəni adi qarşlasa da, ölkəyə gələn turistlərə buna xoş baxmırlar. Və sənin kimilərdən fərqli olaraq, məsələnin mahiyyətini dərk edən şəxslər bu naxoş problemi aradan qaldırmağa çalışırlar. Artıq şəhərin mərkəzində süpürgəçi işləməkçün kişiləri işə götürürlər. İnanıram ki, çox qısa bir zamanda səni də əlində süpürgə Qız qalasının ətrafını süpürən görəcəyik. Ancaq əminəm ki, sən süpürgəçi işləməkçün belə təhlükəlisən. Çünki sən, əvvəldə də dediyim kimi, öz sonunu gətirmiş sitatsan...

Onu da unutma ki, mən tərbiyəsiz də, səviyyəsiz də olsam, səndən qat-qat artıq kişiyəm! Vaxtın olanda, sən də kişi olmağa çalış, bacarsan əgər!