Xalqımız və dövlətçiliyimiz üçün  çox həlledici, həm də ziddiyyətli, kritik bir mərhələyə təsadüf etmiş 1995-ci il Mart olaylarından artıq 24 il ötür. Müstəqilliyimizin bərpası ərəfəsindəki və sonrakı bir sıra hadisələr kimi,  QARDAŞ QIRĞINIYLA nəticələnmiş həmin olayların da hələ də  bir çox qaranlıq, sirli məqamları açıqlanmayıb...

“Hələ bu günədək bəndənizə tam aydın deyil: “Necə oldu ki, 1993-cü ilin iyununda, ölkənin vətəndaş müharibəsinə hamilə olduğu, hər bir siyasi lider üçün qorxulu, gərgin günlərdə o zaman Naxçıvan Muxtar Respublikası Ali  Sovetinin sədri olan mərhum Prezident Heydər Əliyevin mühafizəsini təşkil edərək Bakıya- düz Prezident Aparatınadək gəlməsinə şərait yaratmış, bizlərə verdiyi  müsahibə və çıxışlarında daim Qarabağı işğaldan azad etmək üçün xalqı və gəncləri Heydər Əliyev ətrafında sıx birləşməyə çağıran Daxili İşlər nazirinin müavini, torpaqlarımızın müdafiəsi və azad edilməsi uğrunda ən gərgin döyüşlərin iştirakçısı olmuş, qəzet və kitablarda ermənilərin başına külli miqdarda pul qoyması barədə yazılan “OMON” komandiri olan şəxs və ona sadiq onlarla döyüşçü iki il ötməmiş  ölkənin Prezidentinə, Ali Sovet sədrinə qarşı çıxdı və sonda özü və ətrafındakılar dövlət çevrilişinə cəhddə ittiham olundular?”  Halbuki, "OMON" komandiri və döyüşçülərinin potensialından torpaqlarımızın azad edilməsində yenə də kifayət qədər yararlanmaq olardı...

Düzdü, dövlət orqanları istintaq aparıb, cinayət işi açılıb, yüzlərlə hadisə iştirakçısı, bəndəniz də qarışıq şahidlər dindirilib, hökm verilib, cəzalarını çəkənlər çəkib və hələ də çəkənlər var, amma bu günədək içimizi gəmirən və cavabsız qalan suallar  var... Məsələn, artıq beynəlxalq siyasi güclərin və medianın diqqətini cəlb etmiş Rövşən Cavadovun 1994-cü ilin oktyabrında “Nizami” metrosu yaxınlığındakı 16 mərtəbənin qarşısında avtomobilə minməmişdən ayaqüstü dediyi, yanında dayanmış 3-4 şəxs və digər bir neçə jurnalistlə  bərabər  qulağımla eşitdiyim bir cümləsi məni daim düşündürür. Sabiq Daxili İşlər nazirinin müavini belə söylədi: “ Biz Amerikanın məşhur Qobl planının, yəni Şuşa və Laçının Mehri  ilə dəyişdirilməsinin qəti əleyhinə olduğumuzdan bəzi xarici qüvvələr bizi məhv etmək istəyir...” 

***

“...Respublika Prokurorluğunun istintaq qrupuna iki gün ardıcıl verdiyim ifadələrdə, “OMON”çuların məhkəmələrində dəfələrlər şahid kimi çıxışlarımda Rövşən Cavadov və “OMON” döyüşçüləri barəsində çəkinmədən dediklərimin üstündə bu gün də dayanıram... Hansısa qərəzli, siyasi məqsədli fikir,  mülahizə söyləməkdən uzağam, yalnız gözümlə görərək qulağımla eşitdiklərimi söyləmişəm və söyləyəcəm...”

 1993-cü ildən Xudu Məmmədov adına xeyriyyə cəmiyyətinin təsisçiliyi ilə nəşr olunan  “Təzadlar” qəzetinin müxbiri və baş  redaktor müavini olmuş  əməkdaşımızın 1995-ci ilin qanlı Mart olayları ərəfəsində baş vermiş hadisə və proseslər barədə xatirə-yazısını tezliklə bütöv şəkildə Moderator.az-da oxuya bilərsiniz.

Saytımızı izləyin!