“Əvvəlcə onu deyim ki, havalar isti  olanda Vaqif müəllim də özünü yaxşı hiss etmir.  Çünki isti hava ürək xəstəsi olan adamlar  üçün əlverişli deyil. Ümumiyyətlə,  isə durumu elədir ki,  gərək, əvvəlcə biz onu yoxlamağa aparaq və yalnız ondan sonra  səhhəti barəsində dəqiq nəsə deyək”.

Bunu Moderator.az saytına açıqlamasında tanınmış şair Vaqif Bayatlı Odərin həyat yoldaşı Tamam Bayatlı bildirib.

“Elə bu səbəbdən də, Türkiyəyə getməyə hazırlaşırıq. Əvvəl istəyirdik ki, təyyarə ilə gedək, lakin bir müddət əvvəl  xəbər yayıldı ki bu ayın sonunda Bakı-Tiflis-Qars sərnişin qatarı artıq fəaliyyətə başlayır.  Vaqif müəllim də  bunu eşidib, çox sevindi. İndi qatar reysinin fəaliyyətə başlamasını gözləyirik.  Yəqin ki, qatarla da gedəcəyik.  Çünki Vaqif müəllimin  beyni əməliyyat  olunub. Bu səbəbdən, onun üçün təyyarə ilə getmək  çox ziyanlıdı.  Hər dəfə də  təyyarə ilə çətinliklə aparırıq: Türkiyədən ələn xüsusi həkim nəzarət və təhlükəsizlik üçün yanında oturur, yalnız bu şərtlə onu təyyarə ilə apara bilirik. 

Sərnişin qatarı həqiqətən bu ayın sonunda fəaliyyətə başlayarsa, bu, bizim üçün çox sevindirici hal olar. Vaqif müəllimi Türkiyəyə  qatarla evdəki kimi rahat apara biləcəyik. 

 İnşallah xəbər doğru çıxarsa, qatar bu ay fəaliyyətə başlayarsa, onda elə gözləyib, Vaqif müəllimi  qatar vasitəsilə  apararıq. Həkimlər beynini yoxlayandan sonra beynin vəziyyətinin necə olduğunu öyrənəcəyik. Beynin vəziyyəti imkan verərsə, tam sağalmış olarsa, o zaman ürəyi əməliyyat olacaq, Allahın köməkliyi ilə gözləyirik ki, inşallah bundan sonra durumu əvvəlkilərə nisbətən çox yaxşı olacaq.

Qeyd edək ki, Vaqif Bayatlı Odər 1948-ci il oktyabrın 1-də Cəbrayıl rayonunun Böyük Mərcanlı kəndində anadan olub. “Tənha ulduz altında”, “Unudulacaq bütün sevdalar”, “Ölənəcən sevmək azdır” və s. əsərlərin müəllifi olan Vaqif Bayatlı 24 may 2019-cu ildə "Azərbaycan Respublikasının əməkdar incəsənət xadimi" fəxri adına layiq görülüb”.