Düşmən atəşkəs rejimindən məmnundur və yalnız məskunlaşma ilə deyil, həm də müdafiə potensialını gücləndirməklə məşğuldur. Aprel döyüşlərindən sonra bu, açıq hiss olunur və himayədarlarının birbaşa köməyi ilə yeni müdafiə sistemləri, təmas xətti boyu güclü istehkamlar yaradır, zəif yerlərini gücləndirir. Bu prosesdə önəmli olan işlərdən biri də yoldur. Ermənistandan Qarabağa ermənilər yalnz Laçın dəhlizindən deyil, Kəlbəcərdən həm Ağdərə, həm də Laçın istiqamətində yollar çəkir. İndi də elan ediblər ki, Qafan - Hadrut yolunun tikintisinə başlayıblar və yaxın illərə bitirəcəklər. Məskunlaşmanı sürətlə aparan işğalçıya yol lazımdır. Həm silah daşımaq üçün, həm canlı qüvvələri qısa zamanda Qarabağa yeritmək üçün. Üstəlik mülki əhalinin gediş gəlişinin asanlaşması da az əhəmiyyət daşımır.

  

Bu günlərdə Ermənistanla Qarabağı birləşdirən yeni avtomobil yolunun çəkilişi ilə əlaqədar bizim Xarici İşlər Nazirliyi bəyanat verdi və bəyanatda ”baş verənlərin məsuliyyəti Ermənistanın üzərinə düşəcək” kimi tam aydın olmayan fikrin yer alması göstərir ki, çox acınacaqlı durumdayıq. Ermənistan tərəf açıq sual verir: ”hansı məsuliyyət?”. Və açıq şəkildə də şərh verdilər ki, “məsuliyyətimiz qələbəmizdir və qələbə çalan xalq təhlükəsizliyini təmin etmək üçün nə lazımdırsa onu edəcək, o cümlədən yol da çəkəcək”.  İndiki vəziyyətə adekvat cavabdır. Adekvat olmayan bizim bəyanatdır. Guya yol çəkildiyi üçün danışıqlar davam etməyəcək. Erməninin də istədiyi zatən budur ki, danışıq getməsin, məsələ illərlə uzandığı kimi yenə uzansın, onsuz da status-kvo tam olaraq düşməni qane edir. Biz indiyədək hansı yolun, obyektin çəkilişinə mane olmuşuq, oranı dağıtmışıq ki, indi də Qafan-Hadrut yolunun çəkilişinin məsuliyyətini düşmənin üzərinə atırıq?  O yolun çəkilişinin məsuliyyəti erməninin yox, bizim üzərimizə düşür. Biz heç nə olmamış kimi susuruq, sonra da deyirik ki, məsuliyyət  qarşı tərəfdədir. O yol dağıdılsaydı və erməni hay-küy qaldırsaydı, onda deyərdik ki, “yolu çəkməyəydin, indi də başına döyməyədin”.  O cümlədən işğal ərazisində ən böyük obyekti partlatsaydıq, indi yol da çəkilməzdi, 129 xarici firma da Qarabağda rahat fəaliyyət göstərib “Artsax” konyakı buraxmazdı. Buna görə də  cavabı Müdafiə Nazirliyi verməlidir, diplomatiya yox. Diplomatiya MN-in cavabından sonra məsələni yasalaya bilərdi. Bizdə hər şey tərsinə gedir.  Erməni indiyədək BMT kimi mötəbər bir təşkilatın qətnamələrini vecinə almayıb işğalçılıq siyasətini davam etdirirsə, bizim bəyanatımıza reaksiyası bundan artıq olası deyil və yol tikintisini dayandırmayacaq. 

Ümuniyyətlə, atəşkəsdən indiyədək baş verənlərə, verməyənlərə nəzər salanda fikirləşirsən ki, Azərbaycanın Qarabağ siyasəti varmı və o nədən ibarətdir? Sülh danışıqları aparırıqsa, niyə 25 ildir davam edir və nəticə də yoxdur? Müharibə yolunu tutmuşuqsa, bu nə sakitçilikdir?  Düşmən yenə təbliğat aparır ki, ATƏT-in Minsk Qrupu Azərbaycanın müharibə etmək hüququnu əlindən alıb. Bu cür təşkilatların adı çıxıb, əməlləri yox dərəcəsindədir, necə ki, 26 ildir yoxdur. Üç il əvvəl, üç gün müharibə olanda ATƏT nə etdi? Ümumiyyətlə, nə edir ki? İran ən güclü dövlətlərə meydan oxuyur, hamı elə bilir ki, Amerika, ya Böyük Britaniya İrana hücum edəcək. Etməyəcəklər. Hələ İngiltərənin yeni baş nazirinin atası da mətbuata deyir ki, “İranla məsələni oğlum centlemen kimi həll edəcək. Gəmini verib, gəmisini alacaq”. Iran güc göstərməsəydi, gəmini almasaydı, Britaniya ona gəmi qaytarası deyildi. İndi erməninin çəkdiyi yol, yollar dağıdılmayınca, bəyanatla “donuz darıdan çıxmayacaq”.  

Düşmən hələ də qorxur ki, biz müharibə edə bilərik. Bu qorxu hissi hələ düşməndə qalır, ammma belə davam etsə o da qalmaycaq. Ermənistan hər gün qorxur ki, birdən müharibə olar. Qorxusunu da açıq şəkildə, birbaşa və dolayısı etiraf edir. İki gün əvvəl Təhlükəsizlik Şurasının katibi Armen Qriqoryan jurnalistlər qarşısında çıxış edəndə dolayısı ilə belə bir qorxudan danışırdı. Jurnalistlərə açıqlamasında  mühacirətin bütün ölkə üçün, xüsusilə ordu üçün böyük təhlükə olması haqqında qayğısını dilə gətirdi.  "Mühacirət, təhlükəsizlik mühitimizə mənfi təsir göstərən təhdidlərdən biridir. Ən çox da orduya təsir edir" -deyib.  Təhlükəsizlik şurasının katibi onu da əlavə edib ki, bu problemin həlli çox mərhələdən keçir  və bir faktor hesabına həll etmək üçün heç bir yol yoxdur. Mühacirəti azaltmaqla da iş bitmir,  bunun yanında başqa bir problem də var - doğum, doğum səviyyəsini necə artırmaq?”.

 

Ermənistan problemlər içindədir və Azərbaycan bunu dəyərləndirməlidir. Demoqrafik vəziyyətin katostrafik səviyyədə olmasını təhlükəsizlik məsələlərinə cavabdeh şəxs dilə gətirirsə, bu, düşmənin müdafiə qabiliyyətinin aşağı səviyyədə olmasının göstəricisidir. Müharibə aparan ordunun ən zəif yeri-insan resurslarının qıtlığıdır. Permanent müharibədə ən vacib faktorlardan biri, ehtiyat döyüşçülər bazasının kifayət dərəcədə olmasıdır ki, bir-birlərini dayanmadan əvəz edib, düşməni darmadağın etsin.  10 milyonluq Azərbaycanın potensialı,  rəqəm olaraq düşməndən üstün olmağın açıq göstəricisidir. Üç dəfə çoxuq, deməli üç dəfə ordumuz da güclüdür. Yaxşı hazırlıqlı, döyüş qabiliyyətli silahlı qüvvələr fasiləsiz hücumlarla düşməndə təlaş yarada bilər. 

 

Bir gün erməni həyasızcasına desə ki, çəkdiyimiz yol gəlib Tərtərə, Gəncəyə dirənib, Azərbaycan imkan verməlidir ki, bizim avtomobillər burdan keçib Rusiyaya getsin, təəccüblənməyin və bu icazə onlara verilsə, yenə təəcüblənməyin. Biz Qarabağa uzanan yollara baxırıq, erməni də uzatdığı yolların bizim içimizdən necə keçirəcəyinə. Neçə ki, biz bu tip bəyanatlarla başımızı qatacağıq, düşmən bunu da edəcək.