(Əvvəli bu linkdə: //www.moderator.az/news/282245.html )

“...Ağdam-Şuşa-Laçın yolu açılmışdı. Nəqliyyat vasitələrinin və insanların gediş-gəlişi bərpa edilmişdi.  Düzdür, erməni quldurları arabir yollara basqın etsələr də,  bunun qarşısı kəskin surətdə alınırdı. İnsanlar artıq  qorxmurdular, onlarda bizim gücümüzə inam getdikcə artmağa başlayırdı... 

Vilayət ərazisində işləyən azərbaycanlı milis işçiləri şəhər, rayon, kənd partiya, sovet və təsərrüfat rəhbərləri Xankəndinə gəlib-gedə bilirdilər. Qarabağ Təşkilat Komitəsinin rəhbəri V.Polyaniçko onlarla iclaslar, müşavirələr keçirirdi. Belə tədbirlərdə adətən mən də iştirak edirdim. Milis işçilərinin əməliyyat müşavirəsini keçirirdim; qarşılarına konkret vəzifələr qoyur, lazımi tapşırıqlar verirdim...

Erməni yaraqlıları, onların bazaları, silah-sursatların gizlədildiyi yerlər və s. barədə onlarda müəyyən qədər məlumat olsa da, çox şeylər əlavə dəqiqləşdirmələr tələb edirdi...

Yaşayış məntəqələri üzrə “boyevik”lərin siyahılarının tərtib edilməsi, onların əlaqələrinin dəqiqləşdirilməsi, bazaların və silah-sursat anbarlarının yerlərinin öyrənilməsi barədə sahə inspektorlarına, cinayət-axtarış üzrə əməliyyat müvəkkillərinə xüsusi tapşırıqların icrasına nəzarəti Vilayət Daxili İşlər İdarəsinin rəis müavini Sadir Məmmədova həvalə etmişdim. S.Məmmədov daxil olan məlumatları müntəzəm surətdə ümumiləşdirərək mənə təqdim edirdi...

Vilayət Dİİ-də keçirilən görüşdən sonra idarənin rəhbər vəzifədə işləyən əməkdaşlarını komendantlığa dəvət edib hər biri ilə ayrıca söhbətlər apararaq onlara lazımi tapşırıqlar və göstərişlər verməyə başlamışdım. Erməni milis zabitləri ilə keçirilən görüşlər öz bəhrəsini verirdi. Onlar bizi maraqlandıran hadisələr, faktlar və konkret şəxslər barədə məlumat verəndə xahiş edirdilər ki, əlyazmalarını onların gözü qarşısında yandırıb məhv edək. Gecələr həmin erməni milis zabitləri ilə bərabər gedib müxtəlif yerlərdə başqa-başqa  ermənilərlə görüşür, çox qiymətli informasiyalar toplayırdım. Bu minvalla günbəgün informasiya verən ermənilərin sayı və informasiyaların miqdarı getdikcə artırdı... 

Bir gün Pollyaniçko məni çağırıb soruşdu: 

“Siz gecələr haraya gedirsiniz, nə işlə məşğul olursunuz? Mənə heç nə barədə məruzə etmirsiniz, bu, nə məsələdir?”. 

Mən ona bildirdim:

“Viktor Petroviç, ümumi vəziyyətlə tanış oluram, hər şeyi öz gözümlə görüb müəyyən qənaətə gəlmək istəyirəm. O ki qaldı  məruzə etmək məsələsinə, hələlik elə  bir maraqlı informasiya yoxdur ki, sizə məlumat verim. Olan kimi dərhal məruzə edəcəyəm, arxayın olun”.

O, məni dinlədikdən sonra  dedi: 

“Məndə olan məlumata görə, ermənilər sizi izləyirlər, sizə qəsd hazırlayırlar. Buradan –komendantlığın binasından  heç yana getməyin...”

Polyaniçkoya belə cavab verdim:

“Çalışaram ki, ehtiyatlı olum. O ki qaldı sui-qəsd məsələsinə, sizin barənizdə də onun hazırlanmasına dair məndə məlumat var. Mən bunlardan qorxub kabinetdə oturmaq üçün buraya gəlməmişəm, Viktor Petroviç! Narahat olmayın, ehtiyatlı olmağa çalışacağam. Ruslar yaxşı deyib: “Özünü qoruyanı Allah da qoruyar...”

Daxil olan məlumatlardan, həmçinin,  ermənilərlə təkbətək görüşlərdən bəlli olurdu ki, vilayətdə yaşayan ermənilərin çoxu ekstremistlərin vilayətdə yaratdıqları belə gərgin vəziyyətdən razı deyildilər. Azərbaycanlılarla münasibətlərin pozulmasını, düşmənçiliyə çevrilməsini istəmirlər. Onlar bu işlərdə “Krunq” təşkilatının üzvlərini,  “boyevik”ləri, erməni daşnaklarını günahlandırırdılar...”

(Davamı var)

Təqdim etdi: Sultan Laçın