“Onları peşəkar jurnalistlərlə yanaşı qoymaq olmaz”

Son vaxtlar “sosial media”, “vətəndaş jurnalistikası” kimi anlayışlar populyarlaşmaqdadır. Bəs bu anlayışlarlarla peşəkar jurnalistika arasında bərabərlik işarəsi qoymaq mümkündürmü?

Moderator.az-a açıqlama verən media eksperti Elçin Şıxlı sosial media ilə ənənəvi media arasında ciddi fərqin mövcudluğu vurğuladı:

“Sosial media” insanların bir-birləri ilə ünsiyyətdə olduğu platformadır. Sosial medianın peşəkar jurnalistikaya heç bir aidiyyatı yoxdur. Facebook, Tvitter və s. sosial şəbəkələr sadəcə daşıyıcıdır. Bunlar peşəkar jurnalistikaya aid deyil.

Əvvəl xəbər daşıyıcıları çap mediası idi, daha sonra elektron media meydana gəldi. Indi isə daşıyıcı qismində sosial şəbəkələr çıxış edir.

“Vətəndaş jurnalistikası”na gəlincə, belə bir anlayış mövcud olsa da, bunu normal qəbul etmirəm. Çünki jurnalistika peşədir. Əgər peşəkarsansa, deməli jurnalistsən. Yox əgər peşəkar deyilsənsə, jurnalist deyilsən. Vətəndaş jurnalistikasının peşəkar jurnalistika ilə heç bir əlaqəsi yoxdur. Vətəndaş sadəcə olaraq informasiyanı alıb bunu digərinə ötürmək hüququna malikdir və bu, bizim konstitusiyamızda da öz əksini tapıb. Amma peşəkar jurnalistika ilə vətəndaş jurnalistikası anlayışları başqa-başqa şeylərdir. Vətəndaş yalnız gördüyü şeyi çəkib göstərə bilir. Lakin bunu yozmaq, onun izahını vermək artıq peşəkarın işidir. Çünki bəzən hər hansı hadisənin şəklini  çəkib onu peşəkar olmayan şəkildə yozurlar. Nəticədə yanlış informasiya meydana çıxır, təsdiqlənməmiş məlumatlar yayılır və s. Buna görə də “vətəndaş jurnalistikası”nı peşəkar jurnalistika ilə yanaşı qoymaq olmaz. Peşəkar media sosial şəbəkələrdən sadəcə bir daşıyıcı kimi istifadə edir”.

Seymur ƏLİYEV