Stabillik hər bir ölkənin ən böyük dəyəridir. Ən azı ona görə ki, bütün maddi və mənəvi uğurların, inkişaf və tərəqqinin açarı stabillikdir. Stabilliyi olmayan ölkədə heç bir sahə inkişaf edə bilməz, digər dövlətlərlə amansız rəqabətdə geri qalar və başqalarının yeminə çevrilər.

 

Ölkələrin əmin-amanlığı, stabilliyi isə hüquq-mühafizə və dövlət təhlükəsizlik orqanlarının çiyindədir. Biz məhz onların yuxusuz gecələrinin hesabına rahat yata, işləyə, ailəmizi dolandıra bilirik. Məhz onlar bizim rahatlığımız uğrunda təkcə şirin yuxularını deyil, lazım gələrsə canlarını, sağlamlıqlarını qurban verirlər. Bu mənada biz xalq olaraq öz qeyrətli övladlarımıza çox şeylər borcluyuq.

Hüquq mühafizə və dövlət təhlükəsizlik orqanlarının fəaliyyətinin effektivliyi isə, sözsüz ki, onların daha yaxşı təşkilatlanması, qurumlar arasında əlaqələrin və qarşılıqlı əməkdaşlıqların artırılmasından asılıdır. Xüsusilə gənc kadrların bir-birini tanıması, yaxın münasibətlərinin qurulması üçün birgə tədbirlərin keçirilməsinə həmişə ciddi zərurət duyulur. Onlar bu tədbirlərdə həm də ölkə problemlərini müzakirə edir, dövlətə və vətənə sevgi hisslərini gücləndirir, öz peşə borclarını daha yaxşı həyata keçirməyə həvəslənirlər. Bu baxımdan dünən DTX-nın Mədəniyyət mərkəzində keçirilən Azərbaycan Respublikasının hüquq mühafizə orqanlarının gənc əməkdaşlarının Birinci Forumu da Vətənə xidmət sahəsində atılmış ən yaxşı addımlardandır. 

Bu forumun ilk toplantısının dünən keçirilməsi onu göstərir ki, sözügedən təşəbbüs DTX sədri vəzifəsinə yeni təyin olunmuş general Əli Nağıyevin ideyasının məhsuludur. Forumun mövzusu da təsadüfi seçilməyib: “Müstəqilliyimiz əbədidir, daimidir, dönməzdir”. Qeyd etməyi lazım bilirəm ki, Müstəqilliyimizin 28-ci ildönümünda bu mövzuda gənclər forumunun ilk toplantısının məhz Əli Nağıyevin sədrliyi dövründə keçirilməsi də anlamlı və başadüşüləndir. Çünki müstəqilliyimizin ilk illərində əlinə silah alıb Qarabağda dövlət suverenliyimiz uğrunda döyüşən nadir DTX zabitlərindən biri məhz Əli Nağıyev idi. DTX rəhbəri kimi bu cür gənclər forumu da ilk dəfə elə onun sədrliyi zamanında keçirilməliydi və keçirildi də.

Xatırladım ki, dünənki forum onun indiki vəzifəyə təyinatından sonra keçirdiyi ikinci tədbirdir. İlk tədbir Türkdilli Dövlətlərin Xüsusi Xidmət Orqanlarının XXII Konfransının Bakıdakı sammiti idi. Sevindirici haldır ki, o sammitdən sonra Türk Şurasının növbəti sammiti də Bakıda keçirildi və hər iki tədbir bir-birini tamamladı. DTX-nın bu il keçirdiyi  birinci tədbir xüsusi xidmət orqanlarımızın xarici əlaqələrini gücləndirməsinə həsr edilmişdisə, ikinci tədbir isə eyni məqsədin ölkə daxilində də həyata keçirilməsinə xidmət edir. Hər iki tədbirin əsas qayesi isə dövlətçiliymizin qorunması, müstəqilliyimizin davamı və möhkəmləndirilməsidir.

Mən bu vətənpərvər təşəbbüs və niyyət münasibətilə başda Əli Nağıyev olmaqla bütün DTX əməkdaşlarının fəaliyyətini təqdir edir və onlara dərin minnətdarlığımı bildirirəm.