“Türkiyəni Qarabağ məsələsinə daha da yaxınlaşdırmalıyıq”

Türkiyənin Azərbaycandakı keçmiş səfiri Hulisi Kılıç Suriyanın ərazi bütölüyü istiqamətində Türkiyə və Rusiyanın ortaya qoyduğu səyin, Azərbaycan və onun əzəli tərkib hissəsi, tarixi torpaqları olan Qarabağ məsələsinə də sirayət etməsinin, bu məsələdə də öz əksini tapmasının vacibliyini vurğulayıb. H.Kılıç ölkəsinin bu məsələdə Azərbaycana dəstək verməyə hazır olduğunu bildirib.

İstanbul Universitetinin Beynəlxalq Münasibətlər üzrə doktorantı Teymur Qasımlı da Türkiyənin siyasi-diplomatik müstəvidə ölkəmizə verdiyi dəstəyi yüksək qiymətləndirib. O, İranın Ermənistana dəstəyinə diqqət çəksə də, Qarabağ uğrunda müharibə başlayacağı təqdirdə İranın Ermənistana açıq dəstək verməyəcəyini vurğulayıb. T.Qasımlı hesab edir ki, Güney Azərbaycanı amili, oradakı milyonlarla soydaşımızın mövcudluğu gerçəyi buna imkan verməyəcək.

Ermənişünas alim, Türkiyənin Ərciyəz Universitetinin professoru Qafar Çaxmaqlı Moderator.az-a açıqlamasında H.Kılıç və T.Qasımlının məntiqini bölüşdüyünü vurğuladı:

“Dəyərli böyük elçi Hulusu Kılıç çox incə bir məqama toxunub. Dünyada belə qəbul olunub ki, hər bir münaqişə dövlətlərin ərazi toxunulmazlığı çərçivəsində həll edilməlidir və Suriyada bu yöndə gəlişən siyasi qərarlılıq istər- istəməz Qarabağ məsələsinə də sirayət edəcəkdir. Suriya probleminin ərazi bütövlüyü çərçivəsində həlli bizi əlimizi daha da gücləndirəcəkdir.

BMT-nin əlimizdə qətnamələri var. Bu qətnamələr daha sərt siyasi qərarlılıq nümayiş etdirməyimizə imkanlar açmışdır. Diplomatiyamız bu məsələdə daha çevik addımlar atmalıdır. Əlbəttə, bizim əlimizdə bunlar var, amma onları reallaşdırmaq üçün region ölkələrinin mövqeyinin bizim prinsiplərimizə uyğunlaşdırılmasına ehtiyac var. Bu aparılmış düzgün siyasətlə ola bilər. Məncə, Rusiya-Türkiyə yaxınlaşmasından yetərincə istifadə etmirik. Biz Türkiyəni Qarabağ məsələsinə daha da yaxınlaşdırmalıyıq. Elə bir situasiya yaradılmalıdır ki, Türkiyənin Qarabağı azad etməkdən başqa altelnativi olmasın. İranla bağlı da bəzi fürsətləri əldən veririk. Çox doğru deyir dəyərli dostum Teymur Qasımlı, indiki halda İran Ermənistana yardım etməkdən çəkinəcək. 35 milyon Güney Azərbaycan türkünün imkanlarından, hətta bu işə hərtərəfli müdaxiləsindən nə vaxt yararlanacağıq? Biz əlimizə düşən ən xırda fürsəti belə dəyərləndirməliyik”.