“Konsertin bu şəkildə baş tutmağı düşünürəm ki, həmin adamlara çox qəşəng bir sillə oldu”

Xəbər verdiyimiz kimi dekabrın 6-da Əməkdar artist Aybəniz Haşımovanın Akademik Milli Dram teatrında solo-konserti baş tutub. 

Moderator.az-a açıqlamasında A.Haşımova konsertdən sonra öz təəssüratlarını bölüşüb:

“Artıq qırx ildir ki, Azərbaycan musiqisinə xidmət edirəm və verdiyim solo-konsertlərin sayını bilmirəm. Sadəcə olaraq son konsertin fərqi onda oldu ki, antraktsız dörd saat dayanmadan konsert getdi. Bu vaxt ərzində həm özüm, həm də tələbələrim çıxış etdi. Gənclərin üzə çıxmasını həmişə istəmişəm və bu da Heydər Əliyev kursudur və bu gün də həmin ənənəni davam etdirirəm. Bunu səksəninci illərdə H.Əliyev bizim üçün yaratmışdı və onda Şövkət Ələkbərova, Arif Babayev və İslam Rzayev bu kursun müəllimləriydi. İndi onlardan biri də mən oldum və hələ ki, Azərbaycan mədəniyyətində varam. 1987-ci ildən sonda məktəbdə bu kurs dayandırıldı və Heydər Əliyevin Bakıda olduğu vaxtda uşaqlara göstərilən diqqət və qayğı o, Moskvaya gedəndən sonra artıq yox idi. H.Əliyev gedəndən sonra heç o uşaqları adam yerinə qoyan olmadı və hərə öz başını saxlayırdı. Mən bir onu başa düşdüm ki, yiyəsiz adam bu dünyada batır. Bu uşaqlar məktəbdən kənar düşəndən sonra onda dedim ki, haçansa bu kursu mütləq davam etdirəcəm. “Bülbüllər”dən başlayaraq bunu davam etdirməyə başladım və tələbəm Fərid Məmmədov “Eurovision” müsabiqəsində yüksək səviyyədə çıxış etdi. Sonra düşündüm indi də yeni nəsli inkişaf etdirək, çünki “Bülbüllər” artıq böyük idi. Bu məqsədlə də Sənət Akdemiyasını qurdum və orda təhsil alan uşaqlar üç illik hesabat konsertini verdilər. Konsertdə əvvəldən sonacan heç kim yerindən durub getmədi. Hətta Azərbaycan himnindən sonra yenə dörd mahnı ifa etdim. 

Konsertdə 47 əsər oxundu və bu əsərlərin içində vətənpərvər ruhda gənclərimiz üçün gözəl kompozisiyalar hazırlamışdım onları təqdim elədim. “Talandı torpağımız” B.Vahabzadə kompozisiyasını Milana Nəbiyevanın ifasında ayaq üstdə alqışladılar. F.Əmirov və H.Cavidin “Kor ərəb” kompozisiyası tələbəm Hikmət Qasımovun ifasında, N.Kəsəmənlinin “Biri vardı, biri yox” şeirinə bəstələnmiş mahnım tələbəm Həsən Əliyevin ifasında, Ü.Hacıbəyovun “Telli Vəli” əsəri beş yaşlı tələbəmin ifasında səsləndi. Mən o yaşd uşağı görün necə hazırlayıb səhnəyə çıxarmışdım. Onunla birlikdə oxuyan Məhəmmədi də həmçinin. Vahid Əzizin “Xocalı vağzalısı” kompozisiyasını hazırlamışdım, səhnədə Xocalıda öldürülən uşaqların ruhlarının toyunu elədim. Bu faciə bizim qan yaddaşımızdır və bunu həmişə uşaqlarımıza təbliğ etməliyik”. 

A.Haşımova bir çox rayonlarımızda da konsert verəcəyini bildirib:

“Düşünürəm ki, nə qədər sağam heç olmasa tələbələrimin əsl vətəndaş olmağında rolum olsun. Tələbəm Sərdar Məmmədov Məmməd Arazın “Ayağa qalx Azərbaycan, səninləyəm!” mahnısını necə ifa etdisə, Xalq artisti Bəsti xanım Cəfərova dedi ki, elə bildim Mikayıl Mirzə səhnəyə qayıtdı. Təbii ki, bunların ərsəyə gəlməsində çox böyük zəhmət çəkmişik. Bir gün istirahət etməmişik, yemək də yemirdim. Bundan sonra artıq növbəti konsertə hazırlaşırıq və bütün Azərbaycana çıxacağıq. Gəncədən və Qazaxdan təklif gəlib ilk öncə bu rayonlarımızda konsert verək və sonra Moskva və Sankt-Peterburqda konsertlərimiz olacaq”. 

Əməkdar artistin dediyinə görə kosertin bu şəkildə baş tutacağına hətta şübhə eləyən adamlar da olub:

“Sizə bir faktı deyim ki, konsertdən öncə qəlbimə çox pis dəyən olmuşdu. Əslində konserti daha böyük bir yerdə etmək istəyirdim, amma dedilər ki, sənin uşaqlarının konsertinə kim gələcək ki? Zalın qonararını necə verəcəksən? Qonarar isə 17-18 min manat idi. Dedim ki, bu uşaqlar Azərbaycan mədəniyyətinin gələcəyidir, mən həyatda olmayanda, onlar bu səhnədə olacaqlar. Bəs Azərbaycan musiqisi necə yaşasın? Necə ki, Heydər Əliyev bu köməyi mənə etdi, mən də musiqimizə xidmət etməliydim, borcumu vətənə qaytarmalıydım. Mənə dedilər ki, qonararı ödə, sonra müqaviləni bağlayaq. Dedim ki, sən kimlə danışdığının heç fərqində deyilsən? Bircə kəlmə dövlətimə müraciət etsəm, bu zalı pulsuz götürərəm. “Bülbüllər” ansamblım dövlətimin dəstəyilə dünyanı gəzdi. Dedim ki, bilet satılsın konserti edək, amma onlar razılaşmadılar və dedilər ki, uşaqların konsertinə heç kim bilet almayacaq. Təklif etdim ki, onda gəlin afişaya mənim şəkilimi vurun və insanlar mənə görə bilet alsınlar. Dedilər ki, heç bəlkə sənin də konsertinə bilet almadılar. Bu sözə görə ürəyimdə ağladım. Dedim ki, əcəb elədin mənə qarşı və nə sən, nə də başqaları məni bu yoldan döndərə bilməz. Hələ ölməmişəm ki, konsert baş tutmaya. Evə gəlib iki gün ağladım və çox pis oldum. Əgər konsertimə bilet alan olmayacaqdısa, bəs niyə Dram Teatrının kassasında anşlaq yaşandı? Əziz, vəfalı xalqım konsertimə biletini aldı və dedilər ki, biz sənin yanındayıq. Konsertin bu şəkildə baş tutmağı düşünürəm ki, həmin adamlara çox qəşəng bir sillə oldu”. 

Sənətçi onu bu günündə tək qoymayan həmkarlarına da təşəkkür edib:

“Konsertimə gələn sənət dostlarıma təşəkkür edirəm. Sevgimin aşıb-daşdığı Nisə Qasımova, Firuzə İbadova, Mələkxanım Əyyubova, Nuriyə Hüseynova, İftixar Piriyev, Bəsti Cəfərova və başqa dostlarım mənimlə birlikdəydilər. Konsertin aparıcısı Azər Süleymanlıya təşəkkür edirəm. Azərbaycan Dövlət Akademik Milli Dram Teatrının rəhbəri Azər Paşa müəllimə, onun müavini Hacıbaba və Elnur müəllimə minnətdarlıq edirəm. Musiqiçilərimin hər birinə ayrı-ayrılıqda çox təşəkkür edirəm. Rejissor Ceyhun Kərimov həmişə mənə dəstək verir, sağ olsun. “Ağ çiçəyim” moda evinə mənim üçün təmənnasız geyim hazırladığı üçün təşəkkür edirəm. Fotoqraf Emilə, Azərbaycan Dövlət Televiziyasına, Ramil Qasımova minnətdaram”.