Müasir dünyamızda hər bir dövlətin təhlükəsizliyinin sərhədləri daxilində deyil, bu sərhədlərdən kənarda formalaşdığı məlum həqiqətlərdən biridir. Çünki sərhədlərə gəlib çatan, sərhəd qapılarını “döyən” təhlükə, artıq təhlükə olmaqdan çıxaraq həmin dövlət, bu dövlətin vətəndaşları üçün real təhdidə, ölüm-dirim məsələsinə çevrilir. Sərhəd dirəklərinə gəlib çatan bir təhlükəni dəf etmək, onunla mübarizə aparmaq daha çətin və ağrılı olur. Bu baxımdan öz xalqının və dövlətinin gələcəyini düşünən hər bir hökumətin təhlükəsizlik məsələsində ölkə daxili ilə yanaşı, həm də onun xaricinə boylanması, gərəkirsə üfüqdə görünən təhlükəni önləmək üçün belə sərt tədbirlər alması vacibdir. Bu baxımdan Türkiyənin İraq və Suriyada həyata keçirdiyi anti-terror əməliyyatları, eləcə də Liviyaya mümkün hərbi müdaxilə ilə bağlı səsləndirilən ehtimallar təqdirəlayiqdir.
Bu, Türkiyənin onun təhlükəsizliyi üçün təhdid təşkil edən riskləri sərhədlərindən kənarda dəf etdiyini, bu problemin ölkə daxilinə sızmasına imkan vermədiyini göstərir. Rəsmi Ankaranın bu sayıqlığı onun türk insanına, türk xalqının təhlükəsizliyinə olan həssasiyyəti və duyarlılığı ilə bağlıdır. Bu, həm də regionda sülhün və təhlükəsizliyin təmin edilməsi baxımından atılan addımlardır ki, bu addımların hər kəs tərəfindən təqdir edilməsi gərəkir.
Liviyaya müdaxilənə zərurətə çevirən “qızıl məntiq”: Qonşusu qatil olanın, gözlərinə yuxu getməz!
Son vaxtlar regionumuzda ən çox müzakirə olunan məsələlərdən biri Türkiyənin Liviyaya mümkün hərbi müdaxiləsi ilə bağlıdır. Haftar hərbi rejiminin Liviyanın qanuni hökuməti üçün başlıca təhdid mənbəyinə çevrilməsi, habelə silahlı rejimin Türkiyənin ünvanına səsləndirdiyi təhdidlər belə bir müdaxiləni zəruri edir.
Əslində Türkiyənin həm İraq, həm də Suriyada həyata keçirdiyi anti-terror əməliyyatları da məhz bu ölkələrdə Türkiyə üçün yaranan real təhlükə və təhdidlə bağlı idi. PKK və onun əlaltılarının bu ölkələrdə, xüsusilə də Suriyada möhkəmlənməsi, öz hərbi potensialını genişləndirməsi, rahat bir şəkildə təşkilatlanması prosesinə Türkiyənin laqeyd yanaşması mümkün deyildi. Bu, o demək olardı ki, qonşusunda qatillər yaşayan bir şəxs heç nə olmamış kimi öz gündəlik həyatına davam etsin və əvvəlki kimi rahat yatmaq haqqında düşünsün. Halbuki, qonşusunda qatil yaşayan birinin özünü rahat hiss etməsi mümkün deyil. Qonşuluğunda qatillərin məskən saldığı Türkiyənin də baş verənlərə biganə yanaşması mümkün deyildi və bu səbəbdən də türk ordusu anti-terror əməliyaytlarına start verdi.
Bu gün qəhrəman türk əsgərinin Liviyaya göndərilməsi də məhz bu zərurətdən irəli gələn bir addımdır . Çünki Liviyada baş verənlərin Türkiyənin maraqlarına təhdid yaradacağı göz önündədir və belə olan halda Liviyada baş verənləri Liviyanın daxili işi adlandırmaq, yaxud “türk ordusunun orada nə işi” var kimi fikirlər səsləndirmək tamamilə məntiqsizdir. Liviyada baş verənləri yalnız o zaman bu ölkənin “daxili işi” adlandırmaq mümkündür ki, orada baş verənlər Türkiyənin maraqları üçün təhlükə yaratmasın.
Ermənistanın sürətli silahlanmasına olan yanlış münasibət və gələcəyimi gözləyən məchul aqibət...
Təəssüflər olsun ki, Rusiyanın himayəsi və bilavasitə dəstəyi hesabına sürətlə silahlanan, kredit və ianələr hesabına olsa da yeni cəbbəxanalar formalaşdıran, artilleriya nümunələri alan işğalçı Ermənistanın silahlanmasına da Azərbaycanda fərqli münasibət sərgiləyən politoloqlar mövcuddur.
Hansı ki, bu qəbildən olan siyasətçilər Ermənistanla Rusiya arasındakı silah alqı-satqısına, hərbi müqavilələrə “bu ölkələrin daxili işi” kimi yanaşır, buna hansısa müdaxilənin mümkünsüzlüyünü vurğulayırlar. Halbuki, Azərbaycan torpaqlarının 20%-ni hələ də işğal altında saxlayan Ermənistanın Rusiyanın nəhəng hərbi arsenalına çevrilməsini bu ölkənin “daxili işi” adlandırmaq, yumşaq desək, Qarabağın taleyinə göstərilən biganə münasibət kimi xarakterizə edilə bilər. Çünki hər kəsə məlumdur ki, Ermənistan bu silahları işğaldakı torpaqları qoruyub saxlamaq, lazım gələrsə bu torpaqlar uğrunda Azərbayanla vuruşmaq üçün alır. Başqa sözlə desək, bu gün Ermənistana satılan hər bir güllə sabah bir əsgərimizin ölümü deməkdir. Bu, bizim sərhədlərimizi döyən, hətta Qarabağın timsalında sərhədlərimizin içinə girən bir problemdir və ona görə də biz, nəinki Ermənistan verilən adi bir güllədən, hətta ona bir kəlmə söz, bir diplomatik jestlə verilən dəstəkdən belə narahat olmalıyıq. Çünki bunun üçün bizim Qarabağ boyda səbəbimiz var. Çünki PKK terrorundan əziyyət çəkən Türkiyə kimi, bizim də qonşuluğumuzda qatillər var. Və bizim onları görməmək üçün gözlərimizi yummağımız, bu təhlükəni görməzdən gəlməyimiz bizi həmin təhlükədən sığortalamır. Əgər biz bu təhlükələrə son qoymaq istəyiriksə, təhlükənin gözlərinə cəsarətlə baxmağı bacarmalıyıq. Təhlükədən xilas olmağın yeganə yolu məhz budur!
Seymur ƏLİYEV
e-mail: seymur_dq04@mail.ru
