Münhen Təhlükəsizlik Konfransı çərçivəsində Azərbaycan və Ermənistan liderlərinin ilk dəfə beynəlxalq platformada açıq şəkildə keçirilən  Qarabağla bağlı debatı zamanı  Ermənistanın Baş naziri Nikol Paşinyan təcavüzkar dövlətin əsl simasını, həmçinin öz şəxsi səbatsızlığı  və siyasi savadsızlığını bir daha nümayiş etdirdi. 

Əsassız açıqlamalarından birində üzdəniraq erməni lideri Azərbaycan Respublikasının guya "100 faiz ermənilərdən ibarət" keçmiş  Şaumyan rayonunun Dağlıq Qarabağ Muxtar Vilayətinin tərkibində olduğunu iddia edib. Və "İndi orada bir nəfər də olsun erməni yoxdur, çünki  həmin rayon Azərbaycan tərəfinin etnik təmizləməsinə məruz qalıb"-deyə Paşinyan növbəti iftirasını dilə gətirib.  Azərbaycan Prezidenti İlham Əliyev Ermənistanın  birinci rəsmi şəxsinə bölgənin Dağlıq Qarabağa daxil olmadığını xatırladıb... Digər bir sərsəmləməsində isə Paşinyan iddia edib ki, guya Azərbaycan müstəqillik əldə edəndə Dağlıq Qarabağ adlanan ərazi onun tərkibində olmayıb. Əlbəttə, təcavüzkarın hər yalan və iftirasını ətraflı və detallı ifşa etməyə vaxt yetməyib...

Azərbaycan Respublikasının birinci Prezidenti Ayaz Mütəllibov Moderator.az-ın rus versiyasına geniş açıqlamasında bəsirətsiz bir böhtançı  olan Paşinyanın   böhtanlarını bir daha ifşa edib.

(Əvvəli burada://www.moderator.az/news/312002.html)

“Bu, tamamilə qəbuledilməz bir düşüncədir. 1923-cü ildən Dağlıq Qarabağ Muxtar Vilayəti adı almış ərazi bu muxtariyyətin yaranmasından əvvəl də, sonra da Azərbaycanın tərkibində olub. Hazırda həmin ərazi və keçmiş DQMV ətrafında Ermənistanın işğal etdiyi 7 rayonun torpaqları Azərbaycan Respublikasının tərkib hissəsidir. Düzdür, bu ərazidə Bakının yurisdiksiyası pozulmaqla... Fakt faktlığında qalır. Gec-tez işğalçı ölkənin bu faktla razılaşması bölgədəki vəziyyəti sakitləşdirmək üçün erməni cəmiyyətinin özü tərəfindən tələb ediləcəkdir... 

Bundan əlavə, o zaman DQMV, digər müttəfiq respublikalarla birlikdə Sovet İttifaqını tərk etmək məsələsini həll etmək hüququna malik deyildi. Belə ki, bundan ötrü həmin muxtariyyətin  heç bir qanuni  səlahiyyəti yox idi.  Ona görə ki, bu ərazi bir daha təkrar edirəm,  tarixən və hüquqi baxımdan Azərbaycan Respublikasının tərkibində olub. 1992-ci il martın 2-də Azərbaycan Respublikası SSRİ tərkibində olduğu dövrdəki sərhədlərin hüdudları çərçivəsində BMT-yə  və daha sonra digər beynəlxalq strukturlara daxil edilib. Özü də məhz Dağlıq Qarabağla  birlikdə... Və bu, rəsmi sənədlərdə öz əksini tapmışdır...

Yeri gəlmişkən, "hər şeyi bilən" cənab Paşinyana başqa bir tarixi, eyni zamanda hüquqi faktı xatırlatmağa dəyər. 1991-ci ilin dekabrında Azərbaycanın MDB-yə üzv olmağa hazırlaşdığı zaman postsovet məkanında yeni bir İttifaq dövlətinin yaradılması müzakirə edilirdi və bunun üçün  əsas sənəd qəbul edildi. Və bu sənədi keçmiş Sovet respublikalarının bütün liderləri, o cümlədən bu gün Ermənistanda çoxlarının Nikol Paşinyanın "xaç atası" adlandırdığı işğalçı ölkənin o zamankı prezidenti Levon Ter-Petrosyan da dəstəklədi.  O məqamda Ter-Petrosyan hətta Dağlıq Qarabağla bağlı bir kəlmə də demədi.  Halbuki, onun özü Qarabağ dramının yerli təşəbbüskarı, strateqi, ssenaristi və rejissoru idi.  O, bütün MDB prezidentləri kimi Azərbaycanı mövcud sərhədlərdə tanıdı. Və digər dövlət başçıları ilə birlikdə bu sənədi imzaladı. Və həmin sənəd əsasında Azərbaycan BMT-yə qəbul edildi və bu gün də respublikamız hələ sovet dövründə yaranmış vəziyyətin hüquqi varisidir. Yəni Dağlıq Qarabağ Azərbaycan Respublikasının ayrılmaz hissəsidir və bu inzibati ərazidə müvafiq normativ sənədlər rəhbər tutulmalıdır. Və orada Azərbaycanın yurisdiksiyasından çıxmaq siyasəti yürüdülməməlidir. Bu, yolverilməzdir. Bu heç bir beynəlxalq qanunla izah edə bilməz. Ona görə Paşinyanın bu məsələyə istinadları əsaslı deyil və mahiyyətcə yalandır. Çünki Azərbaycan dövləti bu gün beynəlxalq səviyyədə tanınmış sərhədlər daxilində mövcud olub, mövcuddur və olacaqdır. Odur ki, Qarabağ probleminin etimologiyasını hələ anlamayan və açıqlamalarında başını itirərək özünü dolaşdıran Ermənistanın hazırkı baş naziri kimi bir şəxslə polemikaya girməyə dəyməz”-deyə Mütəllibov açıqlamasını yekunlaşdırıb.

Sulatn Laçın