Bir neçə gün öncə, Azərbaycan Respublikasının Prezidenti İlham Əliyev Cənablarının İtaliyaya dövlət səfəri oldu. Səfər müddətində Azərbaycan Respublikasının Birinci vitse-prezidenti Mehriban Əliyeva Vatikanda Papa Cəngavər Ordeninin ən ali dərəcəsinə - IX Piy Ordeninin Böyük Xaçına (Dama di Gran Croce dell’ordine Piano) layiq görüldü. Birinci vitse-prezident Mehriban Əliyeva bu ordenə mədəniyyətin, o cümlədən Müqəddəs Taxt-Tac təsisatları ilə qarşılıqlı əlaqələrin inkişafına verdiyi töhfələrə görə layiq görülmüşdür. Ordeni Mehriban xanım Əliyevaya Müqəddəs Taxt-Tacın dövlət katibi kardinal Pietro Parolin təqdim etmişdir. İstərdim ki, həmin ordenin siyasi tərəfi ilə əlaqədar fikirlərimi hörmətli “Moderator.az”un oxucuları ilə bölüşəm. 

IX Piy ordeni 1847-ci ildə təsis edilmişdir və bu ordenlə kilsə və cəmiyyət qarşısında xüsusi xidmətləri olanlar təltif edilirdi. Əgər əvvəllər həmin orden müstəsna olaraq din xadimlərinə təqdim olunurdusa, 1929-cu ildə Vatikan dövləti yarandıqdan sonra, Böyük Xaç ordeni ilə dövlət başçıları və yüksək vəzifəli dövlət xadimləri də təltif olunmağa başladı. Ordenə layiq görülənlər işərisində İtaliya Respublikasının hazırkı Prezidenti S. Mattarella, İtaliya dövlətinin bir sıra sabiq rəhbərləri, o cümlədən C. Napolitano, həmçinin tac qoyulmuş şəxslər – İsveç kralı XVI Qustav, Lüksemburqun Böyük Hersoqu Anri, İspaniya Kralı Xuan Karlos və Belçika Kralı II Albert də vardır. 

Xatırlatmaq istərdim ki, Mehriban xanım Əliyeva daha öncə “Macarstanın Xidmətlərə görə Komandor Xaçı” ordeni ilə, Avropa Olimpiya Komitələrinin ən yüksək mükafatı olan Ali Ordenlə, Rusiya Federasiyasının “Dostluq” ordeni ilə təltif olunmuşdur. Lakin Vatikanda təqdim olunan ordenin indiki zamanda əhəmiyyəti və siyasi yükü daha üstündür.

Birincisi, dünya siysətini yönəldən dövlətlərin başçılarının təltif olunduğu siyahıya Azərbaycan dövlətinin adının düşməsi böyük siyasi qələbə və fəxarətdir. Ikincisi, Avropada İslamafobiyanın gücləndiyi və İslama qarşı siyasi təhdidlərin artdığı bir vaxtda müsəlman bir Xanımın, dünyanın aparıcı dövlətlərini dini müstəvidə idarə edən bir dövlətin ali ordeninə layiq görülməsi Vatikanın tarixində bir ilkdir. Ümumiyyətlə, iki səmavi dinin uzunmüddətli qarşıdurmasından sonra onların eyni müstəvidə dayanıqlılı fəaliyyətinin başlanğıcıdır. Üçüncüsü, ilk dəfədir ki, İslam Şərqində bir dövlət xadiminin Xristian dünyasında Qərbin müasir çağırışlarına cavab verən bir şəxsiyyət kimi qəbul olunması deməkdir. Mehriban Xanım ənəvi Şərq mədəniyyətini klassik Qərb mədəniyyəti ilə yüksək səviyyədə uzlaşdırmağı bacaran bir dövlət xadimidir. O, təkcə Türk dünyasının, Ərəb dünyasının deyil, bütünlükdə İslam dünyasının siyasi Xanım liderinə çevrilməyi bacardı ki, bu da dövlətimiz üçün çox böyük siyasi əhəmiyyətə malikdir. Eyni zamanda, dövlətimizin yürütdüyü tolerantlıq siyasətinin bir daha rəsmi təsdiqidir. 

Bildiyiniz kimi, Azərbaycan öz ərazi bütövlüyün bərpası uğurunda beynəlxalq müstəvidə ardıcıl mübarizə aparır. Mehriban Xanımın Vatikanın ali ordeninə layiq görülməsi ölkəmizin Dağlıq Qarabağ və işğal olunmuş ətraf rayonların azad olunması üçün apardığı xarici siyasətin növbəti uğurlu “dividendi” olmaqla bərabər, Xristian dünyasının ermənilərə vurduğu tərs və ağır siyasi sillədir.