Artıq mətbuatdan və sosial şəbəkələrdən xəbəriniz var ki, biz 3 nəfər hərbyönümlü qurumların nümayəndələri Dövlət Sərhəd Xidmətinə müraciət edərək bizə növbəti dəfə xidmətin “Qaynar nöqtə”lərində yerləşən mövqelərinə səfərimizə icazə verilməsini xahiş etdik. Məsələ qısa müddətdə müsbət həll olundu, lakin bu koronavirusla bağlı işlər çox olduğuna görə, biz səfərimizi ertələmək istədik. Lakin, yuxarı komandanlıqla məsləhətləşdikdən sonra bu səfərin məhz indiki məqamda reallaşdırılması barədə razılığa gəlindi. Bunu da ona görə etmək istədik ki, biz gedib ən ön nöqtələrdə, erməni yaraqlıları ilə üzbəüz mövqelərdə xidmət keçən əsgər və zabitlərimizin xidmət şəraiti və ümumi vəziyyəti yerində öyrənək, əsgər valideynlərinə övladlarının hazırkı şəraiti ilə bağlı müfəssəl məlumat verək.

Bəri başdan deyim ki, gördüklərimiz və öyrəndiklərimiz qürur hissi yaratdı. Super şərait və ideal münasibət. İstər əsgər və zabit münasibətlərində, istərsə də Qazax, Ağstafa və Tovuz rayonun sakinləri ilə qarşılıqlı münasibətlər, onların əsgər və zabitlərimizlə son dərəcə mehriban, istiqanlı münasibətlərini gördük. 2019-cu ilin avqust ayında bu mövqelərə səfərimiz zamanı Müdafiə Nazirliyindən (MN) yenicə təhvil alınmış mövqelərdə də olmuşduq və DSX-nin nə boyda ağır bir məsuliyyətli yükü çiyininə aldığının fərqində idik. Ötən səfərimizdən 7 ay ərzində o qədər gözəl işlər və nəticələr ortalıqdadır ki, biz sözsüz ki, onların hamısını açıq şəkildə yaza bilmərik. Yəqin ki, bunun hərbi və dövlət sirri ilə əlaqədar olduğunu hər kəs anlıyır.

Düşmənlə təmas xəttində inanılmaz mühəndis-istehkam işləri həyata keçirilib. Ən müasir avadanlıq və cihazlar ön mövqelərdə yerləşdirilib. Əsgər və zabitlər üçün gözəl xidmət və məişət şəraiti yaradılıb.

Döyüş bölgəsində xidmət keçmiş bir yüksək rütbəli və vəzifəli zabit kimi deyə bilərəm ki, Azərbaycan ərazisində səngərlər və mövqelər, hələ bu qədər general və polkovniklər görməyib. Özü də bunu tam səmimiyyətimlə və ciddiliyimlə qeyd edirəm ki, digər güc strukturlarının hörmətli generalları, polkovnikləri inciməsinlər. Bir vaxtlar kabinet generalı saydığım DSX-nın rəhbər şəxslərindən tutmuş ən aşağı ranqlı xidmət zabitlərinə kimi HƏR KƏS ön mövqelərdə günlərlə, aylarla xidmət aparıb LAZIMI İŞLƏR həyata keçirirlər. Bəli, fürsətdən istifadə edib, bir vaxtlar etdiyim bu haqsızlığa görə həm real, həm də virtual olaraq başda xidmət rəisi hörmətli general-polkovnik Elçin Quliyev olmaqla bütün haqqı olan generallardan üzr istəyirəm. Gözümün önündə, ən RİSKLİ və ƏN MƏSULİYYƏTLİ qərarlar qəbul edən, onları reallaşdıran əsl general(lar)a hansı artıq-əksik söz demək və ya yazmaq hansı vicdandan və əxlaqdan xəbər verər?! Çox təəssüflər olsun ki, hələ də bəzi sosial şəbəkə və media nümayəndələri real vəziyyətdən və xidmətin gördüyü misilsiz işlərdən bixəbər kimi, çox haqsız və qərəzli fikirlər formalaşdırmağa çalışırlar.

Bu gün DSX Müdafiə Nazirliyimizlə bərabər ərazilərimizi yağı düşməndən həm qoruyur, həm də TARİX YAZIR. Kim necə istəyir, elə də qəbul etsin. Bu gün DSX-nin şəxsi heyəti çox böyük yük altındadır. Həm Ermənistan-Azərbaycan dövlət sərhəddində mənfur düşmənə qarşı real döyüş əməliyyatlarını həyata keçirir. Həm də, Azərbaycan-İran, Azərbaycan-Rusiya, Azərbaycan-Qazaxstan, Azərbaycan-Türkmənistan, Azərbaycan qardaş Türkiyə dövlət sərhədlərində xidmət aparır. Bu xidmət yerdə, göydə, suda və dağlıq, sərt iqlim şəraitində həyata keçirilir. Bunu da DSX-nın rəhbər şəxsləri idarə edir və tənzimləyir. Məni tanıyanlar bilir və mövqeyimə də bələddirlər ki, tərif yazmaq və ya kimisə fərqləndirmək kimi lükslərim olmayıb və yoxdur. Amma, son vaxtlar DSX-nın mərd və qətiyyətli general və polkovniklərinin ortaya qoyduqları işlərlə hər kəs fəxr etməlidir. Və, bütün ədalətli və həqiqətpərəst yoldaşlardan artıq dərəcədə xahiş edirəm ki, gəlin bütün Silahlı Qüvvələrimizi, ələlxüsus da ön xəttdə gecə-gündüz xidmət aparan Müdafiə Nazirliyini, Dövlət Sərhəd Xidmətinin əsgər və zabitlərini, rəhbər şəxslərini qoruyaq və onların çətin, şərəfli işlərinə dəstək olaraq hörmət göstərək.

Sonda, onu xüsusi olaraq vurğulamaq istərdim ki, DSX-nın yuxarıda adlarını çəkdiyim istiqamətlərdə xidmət aparan bütün əsgər və zabitlərimiz sağ və salamatdırlar. Onların sağlamlığı yüksək səviyyədə qorunur və təmin olunur. Təminat çox yüksək səviyyədə təşkil olunub. Ərzaq və digər lazımı əşya və avadanlıqlar normadan da bir az çox həm verilir, həm də ehtiyat hazırlanıb. Dünyanı cənginə alan koronovirusa qarşı bütün zəruri tədbirlər görülüb və gündəlik sanitar-gigiyenik qaydalara ən ciddi şəkildə əməl olunur.

Tanrı Azərbaycanımızı qorusun!

Tanrı Silahlı Qüvvələrimizi qorusun!

Tezliklə ölkəmizin ərazi bütövlüyü və suverenliyinin tam təmin olunması üçün əsgər və zabitlərimizə, general və admirallarımıza uğurlar arzulayıram!

P.S. Martın 30-da axşam saatlarında düşmənin təxribatlarının qarşısı alınarkən, DSX-nın cəngavər əsgərləri düşmənin 3 deyil, 4 yaraqlısını sıradan çıxarıblar. Dünən isti-isti məlumat var idi ki, 3 nəfər, artıq gecə saatlarında məlum oldu ki, 4 erməni dığası ağır yaralanıb. Birinin vəziyyəti lap kritikdir. Təxribatları nəticəsində itkilərini Ermənistan MN-nin rəsmisi də təsdiq edib. Bunu xüsusi olaraq o şəxslər üçün qeyd edirəm ki, öz ƏSGƏRİNİN uğuruna sevinmək əvəzinə az qala düşmənə "vəkillik" edib onlar üçün dəsmal götürüb ağlıyır.

Eşq olsun AZƏRBAYCAN ƏSGƏRİNƏ!!