2016-cı il Şanlı Aprel döyüşlərindən dörd il ötür. Həmin döyüşdə ordumuz düşməni ağır itkilərə məruz qoyaraq bir neçə strateji yüksəklikləri işğaldan azad etdi. Döyüşlərdə şəhid olan hərbçilərimizdən biri də gənc pilotumuz baş-leytenant Əbu Bəkir İsmayılovdur. O, mayor Urfan Vəlizadə və Təbriz Musazadəylə birlikdə M-24 helikopterinin ekipaj üzvü olub. Ölümündən sonra hər üç pilotumuz “Azərbaycan Bayrağı” ordeni ilə təltif ediliblər.

Əbu Bəkir İsmayılov 1990-cı il fevralın 10-da Kürdəmir rayonunda anadan olub. O, 2005-ci ildə Cəmşid Naxçıvanski adına Hərbi Liseyə daxil olub. 2008-ci ildə isə liseyi bitirərək Azərbaycan Ali Hərbi Təyyarəçilik Məktəbinə daxil olub. Əbu Bəkir aprel döyüşlərindən bir neçə ay əvvə ailə qurmuşdu. 

Aprelin 2-də Füzuli rayonu istiqamətində gedən döyüşlər zamanı Mi-24 helikopteri ermənilər tərəfindən vurulub və hər üç pilotumuz qəhrəmancasına şəhid olub. Onların nəşi neytral ərazidə qaldığı üçün aprelin 10-da onların nəşi ərazidən götürülərək aprelin 11-də İkinci Fəxri Xiyabanda böyük izdihamla dəfn edilib. 

Şəhid pilotumuzun anası Rəna İsmayılova Əbu Bəkirsiz tamam olan dörd il haqda bunları deyib:

“1 aprel oğlumun həyatda yaşadığı son gün oldu. Özüm yola saldım oğlumu, döyüşə gedəcəyini bilmədən axrasınca su ataraq uğurlar arzuladım ona. Nə biləydim, gedişinin dönüşü olmayacaq balamın. Nə biləydim, sağ-salamat yola saldığım Əbu Bəkirimin özünə yox, tabutuna sarılacam. Canımı yandıran xəbəri alacağımı bilmədən, hər şeydən xəbərsiz adi günlər kimi yaşadım 2 aprel gününü. Həmin gün sənin acı xəbərini eşitdim, oğul. Özümə təsəlli verəcək xatirələrini yada salsam da sənin yerini vermir axı, oğul. Sənin gülüşünə, yerişinə, ana deməyinə həsrət qalıb anan. Düz dörd ildir bəlkə də gələrsən deyə yollarında qalıb gözüm, oğul. Sən gəlmirsən anana, amma mən tez-tez uyuduğun məzara sənin yanına gəlirəm. Ən böyük ağrı-acıyla yaşayır anan və son nəfəsimə qədər də belə olacaq. Bircə təsəllim sənin şəhid olmağındır”.