Koronavirusun bütün dünyada sürətlə yayıldığı, on minlərlə insanın ölümünə yol açdığı hər kəsə məlumdur. Çarəsi hələ də tapılmayan bu xəstəliyin nə qədər davam edəcəyi, bəşəriyyətin bu virusla mübarizədə qalib gəlib-gəlməyəcəyi bu gün üçün bəlli olmayan həqiqətlər sırasındadır. Lakin koronavirus təhlükəsinin meydana çıxdığı ilk gündən türk dünyasının atdığı bir sıra addımlar türk insanın sadəcə öz taleyinə deyil, bütün bəşəriyyətin taleyinə necə həssas və duyarlı münasibət bəslədiyini ortaya qoydu.
Xəstəliyin meydana çıxdığı və böyük itkilərə yol açdığı Çinə ilk yardım göndərən dövlətlərdən biri məhz Azərbaycan oldu. Suqmayıt Şəhər İcra Hakimiyyətinin başçısı Zakir Fərəcov tərəfindən Çinin Myenyan şəhərinə 100 min ədəd bone, 40 min ədəd maska, 100 min ədəd steril əlcək, 100 min milli litr spirt, 100 min ədəd baxıl, 5 kiloqram xloramin (toz), 1850 tabletka xloramin göndərildi ki, bu da tibi ləvazimatların ciddi çatışmazlığı ilə üzləşən Çin üçün minləlrə insanın xilası demək idi. Bu günlərdə Azərbaycana 5000 koronavirus test dəsti hədiyyə edən Çinin ölkəmizdəki səfiri Qo Minin bu və digər köməkliklərə görə ölkəmizə bir daha təşəkkür etməsi dövlətimizin və xalqımızın humanizminə verilən qiymət hesab oluna bilər.
Ölkəmizin koronavirusla mübarizə məqsədi ilə İrana 5 milyon dollar məbləğində maliyyə yardımı göstərməsi də, bütün dünyanın ölüm-dirim mücadiləsi apardığı dünyamızda çox az rast gəlinən humanist addımlardan biridir.
Qardaş Türkiyənin koronavirusun böyük insan itkisi yaşatdığı İtaliya və İspaniyaya tibbi ləvazinat dolu təyyarə göndərməsi də sadəcə Türkiyənin deyil, bütün türk dünyasının adına qürurverici bir addımdır. Fransa və Almaniyanın İtaliyanın kömək çağırışını cavabsız qoyduğu, ona tibbi ləvazimatla bağlı hər hansı yardım göstərmədiyi halda, Türkiyənin hər hansı çağırışsız bu ölkəyə kömək etməsi türk insanının böyüklüyündən, humanizmindən xəbər verir. Bu gün Qarabağ problemi yaşayan Azərbaycanın, Suriyada anti-terror əməliyyatı keçirən, PKK terror təşkilatı ilə mübarizə aparan Türkiyənin qərbdən şərqə doğru bir neçə ölkəyə göstərdiyi bu dəstək sözün həqiqi mənasında türk dünyasının, türk insanın növbəti tarixi fədakarlığıdır. Və Avropanın bu fədakarlığa münasibəti 10 yaşındakı italiyalı bir uşağın dilindən səslənən minnətdarlıqda öz əksini tapdı.
Bu fədakarlığın önəmini artıran digər bir amil həm Azərbaycan, həm də Türkiyənin özünün koronavirusa qarşı ciddi mücadilə verdiyi, adıçəkilən ölkələrdə də tibbi ləvazimata ehtiyacın artmasıdır. Türkün Çini kövrəldən, İtaliyanı göz yaşlarına boğan bu yardımı türk insanının yaşamaq istəyi ilə yanaşı, həm də yaşatmaq istəyindən xəbər verir. Və bütün bunlar ərəb mütəfəkkirlərindən birinin məşhur ifadəsini yada salır: “Fədakarlıq o deyil ki, sən mənə ehtiyacım olduğu şeyi verirsən. Fədakarlıq odur ki, sən mənə elə bir şeyi verirsən ki, onsuz ötüşmək sənin özün üçün də çətindir”.
Türk dünyasının bu gün etdiyi, məhz belə bir fədakarlıqdır. Sadəcə türk insanına deyil, bütün dünyaya, bütün bəşəriyyətə sahib çıxmaq, onu xilas etmək fədakarlığı...
Bəli, fədakarlıq türkün alın yazısı, ilahi missiyasıdır. Onlar dünənin, bu günün və sabahın xilaskarlarıdırlar. Türk bəşəriyyəti bəzi zamanlarda qılıncı və qalxanı, bəzi zamanlarda sözü və elmi, bəzi zamanlarda isə paylaşmaq və yardımlaşmaq bacarığı ilə xilas edib. Ölümün hər kəsin qapısını döydüyü bir məqamda türkün sadəcə yaxın qonşularını deyil, ondan min kilometrlərlə uzaqlıqda yerləşən xalqları belə düşünməsi, onların taleyinə görə narahatlıq keçirməsi, onlara yardım əli uzatması türkün mənəvi böyüklüyündən xəbər verir. Və bütün dünyanın bu böyüklük qarşısında etməli olduğu yalnız bir şey var: Diz cökmək və ehtiram göstərmək!
Seymur ƏLİYEV
E-mail: [email protected]
