Koronavirus pandemiyası ilə əlaqədar karantin günləri davam edir. Bu günlərdə hər bir vətəndaş dövlətin qəbul etdiyi qanunlara riayət etməklə yanaşı həm də güvəndiyi, sevdiyi sənətkarların, tanınmışların məsələhətlərinə də ehtiyac duyur.

Moderator.az olaraq məsləhətlərini, tövsiyələrini öyrənmək üçün Azerbaycan Milli Geyim Mərkəzinin rəhbəri, sənətşünaslıq üzrə fəlsəfə doktoru, Azərbaycanda Qadın Sahibkarlığının İnkişafı Assosiasiyasinin (AQSİA) Sosial Məsələlər Komisiyasının rəhbəri, modelyer-dizayner Gulnarə Xəlilova ilə əlaqə saxladıq.

- İnsanlıq yeni təhlükə ilə qarşı - qarşıyadır. Ötən ilin sonundan başlayaqraq, dünyanın müxtəlif yerlərində sürətlə yayılan təhlükə bu gün ölkəmizdə də yayılmaqda davam edir. Düşünürəm ki, hər şey bizdən asılıdır.

Koronavirus infeksiyasının qlobal pandemiya elan olunduğunu və virusun geniş yayılma tendensiyasının davam etdiyini nəzərə alaraq, bir daha vətəndaşlarımızı diqqətli olmağa, Ümumdünya Səhiyyə Təşkilatının tövsiyələrinə riayət etməyə, əhalinin sağlamlığının etibarlı qorunması və təhlükəsizliyinin təmin edilməsi məqsədilə Operativ Qərargahın qəbul etdiyi qərarları və müəyyənləşdirdiyi qaydaları tam yerinə yetirməyə çağırıram.

Əgər qərarlara düzgün riayət etsək, bu sınaqdan sonda qalib çıxacağıq. Məndə hamı kimi çalışıram ki, bu virusdan özümü, ailəmi, yaxınlarımı qoruyum. Bunun üçün əvvəlcə ən vacib məsələ evdə qalmaqdır, Düzgün qidalanmaq və immunitet gücləndirən qidalar qəbul etməkdir. Mütləq şəkildə təmizliyi qorumaq lazımdır. Əllərimizi tez-tez yumalıyıq. Məncə bu, etdiklərimizi təbliğat apararaq insanlara çatdırmalıyıq ki, özümüzü və ətrafımızı qoruyaq.

- Hamı necə, mən də elə. Nə edə bilərik? Məcburuq, bu həyata da alışmalıyıq. Yəqin ki, hər bir insan sevimli işi üçün darıxır. Ancaq bu gün dövlətimiz məcburən qanun çıxarıb. Həyatımız, gələcəyimiz üçün buna əməl etməliyik. İndi iş və digər məsələlər kənarda dayanmalıdır. Əsas insanın sağlamlığıdır. Hamıya sağlamlıq arzulayıram. 

Bu hər şeydən öncə gəlir. Evdə qaldığım müddətdə çalışıram, ailəmlə daha səmərəli vaxt keçirəm ki, bu günləri gözəl xatirələrlə sonlandıraq. Darıxanda isə kitab oxuyuram, film izləyirik, idman edirik. Ev işləri ilə məşğul oluram. Hərçənd ki, mən iş həyatım olanda da çalışırdım ki, ev işlərimi özüm həll edim. Ailəm üşün maraqlı reseptlər hazırlayıram. "Lord" adında pişiyimiz var. Onunla çox gözəl vaxt keçiririk. "Lord" bizi darıxmağa qoymur.

- Bizim xanımlarımız hər zaman güclüdürlər. Bəlkə bu günlərini bir ideaya ilə sonlandıra bilərlər. Yeni bir iş, təhsil və s. Evdə qaldıqları müddətdə qidalarına diqqət etsinlər, sağlamlıqlarını qorusunlar, formada qalsınlar. Hər zaman pozitiv, gümrah, güclü olsunlar. Cünki, xanımlar həm də bir anadır, bacıdır, ailənin döyünən ürəkləridir və ailənin bütün üzvlərinə örnək olmalıdırlar, onların pozitiv qaynağı olmalıdırlar. 

Biz birlikdə güclüyük. "Evdə qal, sağlam qal" şüarı ilə sosial şəbəkədə maraqlı və yararlı paylaşımlar etsinlər.  Hər bir yaradıcı insan koronavirusla mübarizəyə öz töhfəsini verə bilər. Mən uzunmüddətli istifadə üçün xüsusi pambıq parçadan maskalar düzəltmək qərarına gəldim. Bu maskaları istifadədən, müvafiq yuyulmadan və dezinfeksiyadan sonra dəfələrlə istifadə etmək mümkündür, onlar öz keyfiyyətlərini və qoruyucu funksiyasını itirmirlər. Təqribən min ədəd maskanın hazırlanması planlaşdırılıb. Artıq Xalq artisti Tünzalə Ağayeva ilə birlikdə “Sevməli” sosial aksiyası çərçivəsində maskaların bir qismini ehtiyacı olan insanlara payladıq.

- Düşüncə olaraq yeni idealar hər zaman ağlımdadılar. Evdə qaldığım müddətdə bunu ancaq kağız üzərində işləyə bilirəm. İnşAllah karantin bitdikdən sonra daha gözəl işlər görəcəyimizə inanıram.  Və hazırda xüsusi rejimli xəstəxanalara yerləşdirilən və müşahidə altında olan xəstələrə acil şəfalar diləyirəm. İnşAllah bu bəla xalqımızın başı üzərindən tez bir zamanda gedər. Biz də əvvəlki həyatımıza geri dönərik.