“Düşünürəm ki, yaxın günlərdə biz ölkə başçısının daha bir humanist addımına - amnistiya qərarına şahid ola bilərik”
Bütün dünyanı təhdid edən koronavirus xəstəliyi ölkəmizdə də yayılmaqda davam edir.
Moderator.az olaraq məlum xəstəlik, habelə bundan qorunmaq üçün dövlətin atdığı addımlar, əhalinin sadəcə sağlamlığının deyil, həm də sosial rifahının təmini istiqamətində gördüyü işlərlə bağlı fikirlərini öyrənmək üçün Azərbaycan Gözdən Əlillər Cəmiyyətinin sədri Səmyar Abdullayevə müraciət etdik.
-Səmyar bəy, bu gün bütün dünyada olduğu kimi, ölkəmizdə də koronavirusa qarşı ciddi mübarizə aparılır. Öncə ölkəmizdə və dünyada aparılan bu mübarizə, onun miqyas və önəmi ilə bağlı düçüncənizi bilmək istərdik.
-Bu gün dünyada koronavirus pandemiyası ilə bağlı ciddi böhran yaranıb. Görünən odur ki, dünyanın ən qabaqcıl, inkişaf etmiş dövlətlərinin səhiyyə sistemləri belə bu pandemiya qarşısında acizlik sərgiləyir. ABŞ, Fransa, Böyük Britaniya və s. ölkələrdə baş verən hadisələr buna nümunədir. Hesab edirəm ki, bu amil post-pandemiya dönəmində əsas diqqətin səhiyyə sisteminə yönəlməsi ilə nəticələnəcək. Bu günə qədər silahlanma yarışına, hərbi-sənaye kompleksinin inkişafına əlahiddə diqqət göstərən dünya dövlətləri, bundan sonra səhiyyə sisteminin inkişafına daha böyük maraq göstərəcək.
Bütün ölkələrin qapısını döyən pandemiya bizim ölkəmizdən də yan keçməyib. Bildiyiniz kimi, ilk gündən etibarən Azərbaycan Respublikasının prezidenti tərəfindən koronavirusdan qorunmaq məqsədi ilə ciddi addımlar atılıb və bu gün də əhalinin sağlamlığının, təhlükəsizliyinin təmin edilməsinə hesablanan addımlar davam etdirilməkdədir. Azərbaycanda bu günə qədər cəmi 8 nəfər koronavirusdan dünyasını dəyişib ki, bu dü bütün dünya üzrə ən aşağı göstəricilərdən biridir. Lakin koronavirusun ölkəmizdə yayılma prosesi davam edir ki, bu da ciddi narahatlıq doğurur.
-Sizcə indiki məqamda istər fərd, istərsə də xalq olaraq atmalı olduğumuz hansı addımlar var? Koronavirus təhlükəsinin daha da genişlənməsini önləməyin ən effektiv yolu nədən ibarətdir?
-Hesab edirəm ki, mövcud vəziyətdən ən effektiv çıxış yolu prezidentimizin, dövlətimizin ətrafında sıx birləşməkdən, Nazirlər Kabineti yanında Operativ Qərargahın bütün tələb və tövsiyyələrini tam şəkildə həyata keçirməkdən keçir. Çünki dövlətimizin atdığı hər bir addım vətəndaşların sağlamlığının qorunmasına hesablanıb. Bu gün mövcud olan xüsusi karantin rejimi də bu məqsədlə tətbiq edilib. Odur ki, biz vətəndaş olaraq “evdə qal” çağırışına əməl etmək, xüsusi karantin rejiminin tələblərinə riayyət etməklə dövlətimizə dəstək ola, özümüzün və doğmalarımızın həyatını xilas edə bilərik. Buna görə də mən vətəndaşlarımızı “evdə qal” çağırışına əməl etməyə, məsələnin ciddiyyətinin fərqində olmağa səsləyirəm.
-Bu gün ölkəmizdə koronavirusun insanların sosial həyatına gətirdiyi problemlərin həlli məqsədi ilə müxtəlif yardımlar, sosial paketlər tətbiq edilməkdədir. Sizcə sadə vətəndaşlardan tutmuş sahibkarlara qədər bir çox kateqoriyanı əhatə edən sosial yardım paketi dövlətimizin humanist, sosialyönümlü siyasətinin növbəti nümunəsi hesab edilə bilərmi?
-Qeyd etdiyiniz kimi, koronavirus təhlükəsi fonunda həyata keçirilən sosial izolyasiya tədbirləri cəmiyyətdəki bəzi təbəqələrin maddi təminatına mənfi təsir göstərməkdədir. İşsizlər, muzdlu işçilər, sahibkarkar və s. bu qəbildən olan şəxsərdir. Bütün bu insanlara dəstək məqsədi ilə ilkin olaraq 2,5 milyard manatlıq paket elan edildi ki, bu da kifayət qədər ciddi rəqəmdir. Bu vəsait həm özəl sektorun ayaqda qalması, həm də əhalinin işsiz kəsiminin sosial təminatını qarşılamaq baxımından mühüm əhəmiyyətə malikdir.
Bundan başqa, elektrik enerjisi ilə bağlı limitin artırılması da dövlətin vətəndaşlara yönəlik qayğısı kimi dəyərləndirilməlidir. Hesab edirəm ki, qarşıdakı dönəmdə yeni paketlərin elan edilməsi də mümkündür
Mən bu məsələdə Əmək və Əhalinin Sosial Müdafiəsi Nazirliyinin (ƏƏSMN) əməyini xüsusilə qeyd etmək istəyirəm. ƏƏSMN bütün qüvvvəsini səfərbər edərək ölkə başçısının qarşıya qoyduğu vəzifələrin tam şəkildə yerinə yetirilməsinə çalışır. Dövlət tərəfindən elan edilən sosial paketin on minlərlə vətəndaşa şamil olunduğunu nəzərə alsaq, ƏƏSMN tərəfindən görülən işin miqyasının həqiqətən də böyük olduğu, bütün bu işləri həyata keçirmək üçün böyük qüvvə sərf edildiyi aydın oalr. Bu baxımdan ƏƏSMN-nin ortaya qoyduğu səylər həqiqətən də təqdirəlayiqdir.
-Səmyar bəy, bu gün bəzi ictimai-siyasi şəxslər tərəfindən koronavirus müharibə ilə müqayisə olunur və insanlardan da problemə məhz bu konteksdə yanaşmaq tələb edilir. Sizcə həqiqətənmi dünya bir müharibə içərisindədir və biz bu müharibənin tələblərinə uyğun şəkildə davranmalıyıq?
-Koronavirusun bütün dünyada böyük itkilərə yol açdığı birmənalıdır və bu baxımdan biz onu müharibə ilə müqayisə edə bilərik. Beynəlxalq Valyuta Fondunun rəhbərliyi də vurğuladı ki, dünyada heç vaxt bu qədər ağır böhran yaşanmayıb. Açıqlamada vurğulandı ki, bu böhran bütün dünayda çox kritik bir böhran yaradıb. Bu böhran neft ixrac edən dövlətlərə öz təsirini daha çox göstərir. Bu gün dünyada neftin bir barelinin qiyməti 20 dollar civarındadır ki, bu da iqtisadiyyatı neftdən asılı olan ölkələr üçün ciddi problemdir. Bu, ölkəmizin iqtisadiyyatına da öz mənfi təsirini göstərir. Xüsusilə də özəl sektor koronavirus hücumundan mənfi mənada təsirlənməkdədir. Xatırladım ki, bu gün özəl sektorda təxminən yarım milyon insan çalışır ki, bu da kifayət qədər böyük rəqəmdir. Belə olan təqdirdə koronavirusu müharibə ilə müqayisə etmək üçün ciddi əsaslar var. Lakin bunu da söyləməliyik ki, bizim xalqımız bu cür sınaqlardan çox çıxıb və çətin məqamlarda milli həmrəylik sərgiləməyə nail olub. II Dünya Müharibəsində dəhşətli aclıq və məhrumiyyətlərə rəğmən insanlarımız sonuncu zinət əşyasından ordunun xeyrinə imtina edib, son qəpiyini də qələbənin əldə edilməsinə sərf edib. Ən ağır günlərdə belə insanlarımız arasında yardımlaşmaq ənəəsi mövcud olub. Odur ki, bu bəladan da xalqımızın, dövlətimizin birgə səyi ilə xilas olacağımıza inanıram.
-Xalqımızın çətin məqamlarda yardımlaşmaq, paylaşmaq keyfiyyətinə malik olduğunu qeyd etdiniz. Sizcə bu ənənə günümüzdə özünü yetərincə büruzə verirmi?
-Media və sosial şəbəkədə yer alan məlumatlardan da görsənir ki, bu gün də bəzi imkanlı insanlarımız aztəminatlı ailələrə köməklik göstərməkdə, onlara müəyyən yardımlar etməkdədir. Lakin şübhəsiz ki, biz bu ənənənin daha da genişlənməsini, digər imkanlı şəxslərimizin də bu kimi addımlara qoşilmasını istərdik. Hər şeyi dövlətdən gözləmək, dövlətdən tələb etmək zənimcə düzgün deyil. Belə çətin məqamlarda hər bir imkanlı şəxs, sahibkar öz imkanları daxilində ehtiyacı olan insanlara kömək etməli, dövlətin humanist siyasətinə dəstək verməlidir. Belə olarsa, o zaman biz bütün çətinliklərin öhdəsindən daha yaxşı gələ bilərik.
-Səmyar bəy, dövlətimizin koronavirusla mübarizə fonunda bütün gərəkli addımları atmaqda olduğunu qeyd etdiniz. Bəs sizcə daha hansı addımların atılması məqsədəuyğun olardı? Bununla bağlı hansısa təklifləriniz varmı?
-Hesab edirəm ki, dövlətimiz nə lazımdırsa edib və bundan sonra da ehtiyac duyulan bütün addımları atacaq. Bu baxımdan hər kəs kimi biz də ölkə başçısına təşəkkür edir, minnətdarlıağımızı bildiririk.
Xatırladım ki, bir müddət bundan öncə ölkə başçısı yaşı 65-dən çox olan 100-dən çox məhbusu əfv etdi ki, bunun özü də prezidentimizin humanistliyindən xəbər verir. Bu baxımdan istisna etmirəm ki, yaxın gələcəkdə ağır cinayət törətməyən, cəzasının bir hissəsini çəkən, ictimaiyyət üçün ciddi təhlükə kəsb etməyən şəxslərlə bağlı amnistiyanın verilməsi məsələsi də gündəmə gələ bilər. Bu, cəmiyyətin əhval-ruhiyyəsinə, psixoloji durumuna da müsbət təsir göstərər, yüzlərlə, bəlkə də minlərlə ailəyə sevinc bəxş edər. Düşünürəm ki, yaxın günlərdə biz belə bir humanist addıma şahid ola bilərik.
Seymur ƏLİYEV
