Son vaxtlar sosial şəbəkələrdə ordu haqqında tənqidi fikirlər səslənməkdədir.

Moderator.az-a açıqlama verən Qeyri-Hökumət Təşkilatlarına Dövlət Dəstəyi Şurasının üzvü, “Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli  məsələ ilə bağlı maraqlı fikirlər səsləndirib, bu cür tənqid və iradlarla bağlı konkret təkliflər verib:

“Sosial şəbəklərdə bəzi vətəndaşlarımızın ordu ilə bağlı tənqidi fikirlər səsləndirməsi arzuedilməzdir. Təəssüflər olsun ki, bəzi millət vəkilləri də bu cür fikirlər səsləndirir.

Silahlı Qüvvələrimizə hamı dəstək olmalıdır. Tənqidə gəlincə, tənqid obyektiv olmalı, hüquqa əsaslanmalıdır. Elə məsələlər var ki, onlar ordu rəhbərliyi ilə, yaxud da Mili Məclisin müvafiq komitələrində qapalı şəkildə müzakirə edilməlidir.

Ölkə başçısı Azərbaycan Xalq Cümhuiyyətinin ildönümü ilə bağlı çıxışında, “Qobu-3” şəhərciyinin açılışında bir daha Silahlı Qüvvələrimiz haqqında yüksək fikirlər səsləndirdi. Məlum olduğu kimi, Azərbaycanın müasir, peşəkar ordusu var. Bu ordu istənilən tapşırığı yerinə yetirməyə hazırdır. Ordumuz yüksək döyüş hazırlığına malikdir. Silahlı Qüvvələrimizin mənəvi-psixoloji hazırlığı da olduqca yüksəkdir. Bütün qoşun növlərinin döyüş hazırlığı yüksək səviyyədədir. Orduya çağırışı sistemi də kifayət qədər qənaətbəxşdir. Səfərbərlik və Hərbi Xidmətə Çağırış üzrə Dövlət Xidməti öz işini yüksək peşəkarlıqla həyata keçirir. Silahlı Qüvvələrimiz cənab prezidentin rəhbərliyi altında dərin islahatlar həyata keçirilib. Mili mətbəx formalaşıb. Ölkə ərazisindəki bütün hərbi hissələrdə əsgərlərin xidməti üçün yüksək şərait yaradılıb. Ərzaq və mətbəx milliləşib. Mili mətbəxə keçidlə bağlı bütün hərbi hissələrdə iş demək olar ki, başa çatıb. Əgər əvvəllər əsgərlərimiz məişət işlərini özləri görürdüsə, artıq bunu mülki şəxslər həyata keçirir. Mətbəx, camaşırxana xidməti və s. ilə mülki vətəndaşlarımız məşğul olur. Hərbi qulluqçular ancaq döyüş hazırlığına cəlb  olunub.

Hərbi hissələrimizdə böyük quruculuq işləri həyata keçirilib. Məhz bu işlərin nəticəsidir ki, bu gün Azərbaycandakı hərbi hissələr müasir standartlara cavab verir, dünyanın qabaqcıl ordularına məxsus hərbi hissələrdən heç nə ilə geri qalmır. Bütün bunlar ölkəmizdə orduya olan diqqət və qayğının təzahürü olmaqla yanaşı, həm də ordumuzun gücünü göstərir.

Azərbyacanda irimiqyaslı hərbi təlimlər keçrilir və s. 2016-cı ilin aprel döyüşləri bir kəs daha göstərdi ki, Qarabağ problemini hərbi müstəvidə həll etməyə imkan verən güclü ordumuz var.

Ramil Səfərov, Mübariz İbrahimov və s. qəhrəmanlarımızla bağlı bəzi hallarda sərt fikirlər səsləndirilir ki, bunlar qəbuledilməzdir. Hərbçilərimizə hörmət və ehtiram göstərilməlidir. Siyasi mövqeyindən asılı olmayaraq, hər kəs Silahlı Qüvvələrimizi  sevməli, bayrağımıza, dövlətimizə, ali baş komandanımıza hörmət etməlidir. Əynində hərbi mundir daşıyan hər kəsə ehtiram göstərilməlidir. Axı vətəni müdafiə etməkdən müqəddəs nə ola bilər?  Dünyda elə bir ordu, elə bir sahə yoxdur ki, orada nöqsan və çatışmazlıq olmasın. Lakin bu məsələlərə həssas yanaşmaq, onların müzakirəsi qapalı şəkildə həyata keçirilməlidir.

Erməni hərbçilərini aldadırdılar ki, keçilməz “Ohanyan xətti” var. Aprel döyüşlərində düşmənin keçilməz zənn etdiyi “Ohanyan xətti” darmadağın edildi və ordumuz sürətlə irəlilədi. Bu gün də Ermənistan ordusu öz psixoloji vəziyyətini düzəldə bilmir. Bu gün jurnalist, millət vəkili, QHT rəhbəri və s. kimi şəxslərin ordu haqqqında dediyi hər bir tənqidi fikri erməni mətbuatı tirajlayır, bununla da Azərbaycan ordusu haqqında mənfi imic formalaşdırmağa çalışırlar.

Mən bir daha vətəndaşlarımızı bu məsələyə həssas yanaşmağa çağırıram. Hər hansı tənqidi fikir bildirməzdən öncə yüz ölçüb bir biçmək lazımdır. Silahlı Qüvvələrimizin, ayrı-ayrı qoşun növlərimizin əlaqə nömrələri, elektron ünvanları var. Hər kəs öz tənqidi fikrini bu əlaqə vasitələri ilə lazımi qoşun növünə çatdıra bilər. Millət vəkilləri sorğu vasitəsi ilə istənilən məsələni aydınlaşdıra bilər, informasiya əldə edə bilərlər. Ordumuzun, dövlətimizin mənafeyi bizdən məsələyə məhz bu cür yanaşmağı tələb edir”.