Ermənistanın 3-cü prezidenti, separatçı Serj Sərkisyanın kürəkəni, düşmən ölkənin Vatikandakı keçmiş səfiri Mikael Minasyan var gücü ilə baş nazir Nikol Paşinyanı ifşa etməkdə davam edir.

Moderator.az erməni saytlarına istinadən xəbər verir ki, Minasyan bu dəfə də Paşinyanı “qara bazarda” sialh alverində ittiham edib.

Onun iddiasına görə, Ermənistan silahlı qüvvələri Baş Qərargahının kəşfiyyat şöbəsinin keçmiş rəhbəri, hazırda baş nazir Nikol Paşinyanın müşaviri general Arşak Karapetyan mayın 23-də gizli şəkildə Rusiyaya göndərilib:

“Nikol Paşinyan beynəlxalq silah ticarəti bazarında David Qalstyan ilə birbaşa əlaqəlidir. General Karapetyan, Ermənistanın təhlükəsizliyi ilə birbaşa əlaqəli olan qalmaqalı gizlətmək üçün Rusiya Müdafiə Nazirliyinin rəsmiləri ilə danışıqlar aparmaq məqsədilə Moskvaya uçdu”.

Onun açıqladığı faktlar əsl sensasiya hesab edilə bilər. Minasyanın sözlərindən məlum olur ki, Ermənistan Rusiyadan aldığı ucuz silahlar hesabına qeyri-rəsmi beynəlxalq silah ticarətinin qara bazarına daxil olub. Bunu əlverişli edən isə Ermənistanın Rusiyadan ucuz silah almaq hüququnun olmasıdır. Belə ki, Ermənistan Respublikası Rusiyanın silah istehsalçılarından aldığı silahları Rusiya ordusuna verilən qiymətlərlə ala bilir. Bu qiymətlər isə beynəlxalq qiymətlərdən 65% -ə qədər fərqlənir.

M. Minasyan bildirir ki, Paşinyan “Patron David” adlandırılan David Qalstyana Ermənistanın müdafiə nazirliyi ilə əməkdaşlıq etməyə və silah alış-verişi aparmağa səlahiyyət verib. O isə “Ermənistanın adından, məsələn, şərti olaraq 100 növ silah sifariş verir”.

Sonra həmin silahların 60 faizi sənədləşdirilir və Ermənistana gətirilir. Bütün sənədləşmələr qaydasında aparılır. Qalan 40 faizi isə Qalstyan birbaşa Rusiyadan üçüncü ölkəyə, məsələn, Birləşmiş Ərəb Əmirliklərinə göndərir.Oradan isə başqa ölkəyə aparılır. Silahların dördüncü ölkəyə satıldığından Rusiyanın da məlumatı olur.

Minasyan əlavə edir ki, Nikol Paşinyan Rusiya üçün Ermənistanla “eyni tutulmadığına görə” Rusiya Qalstyanı cəzalandırmaq qərarına gəlir və onun 10 il ərzində Rusiyaya girişinə qadağa qoyulur. Həqiqətən də D. Qalstyanın 2019-cu ildən 2029-cu ilədək bu ölkəyə girməsini yasaqlayan sənəd mövcuddur.

Nikol Paşinyan Qalstyan vasitəsilə pul qazana bilmədiyindən Müdafiə Nazirliyinin büdcəsini “silmək” üçün başqa yollar axtarıb tapıb. Bu dəfə o, köhnə silahları yen adı ilə baha qiymətə “aformut” etmək yolunu seçir.

Bu zaman ən sərfəli olan “Osa-AK” zenit-raket sistemləri işə yarayır.

Minasyan iddia edir ki, Paşinyan 1970-80-ci illərin istehsalı olan bu hava hücumundan müdafiə sistemlərini müasir sistemlər adı altında baha qiymətə alaraq büdcədən xeyli vəsaiti mənimsəyib. Onun sözlərinə görə, Ermənistan ordusu həmişə öz arsenalında “Osa-AK” hava hücumundan müdafiə sistemlərinə sahib olub və silahlı qüvvələr əvvəldən onlardan istifadə edib, hətta onu pulsuz əldə etmək fürsəti də olub.

Lakin indi onları baha qiymətlərlə hansısa offşor şirkətlər vasitəsilə əldə edirlər.

Taleh