1991-ci ildə əsası qoyulan Qərb Universiteti 90-cı illərdə təhsil sahəsinin flaqmanlarından olub, innovativ yenilikləri təhsilimizə gətirməsi ilə seçilib. Yaxşı ənənələrə malik olan universitet son 2-3 ildə bir az obrazlı desək, “ikinci nəfəsi ilə” yenidən fəallaşmağa, qabaqcıllar sırasına çıxmağa başlayıb.

Beləliklə, Qərbi Kaspi Universitetindən reportajımızı təqdim edirik.

Universitetin əsas tədris binası İçərişəhər metrosu yaxınlığında, İstiqlaliyyət 27-də yerləşir. 2016 və 2017-ci illərdə isə Əhməd Rəcəbli küçəsində universitet daha iki müasir binasını istifadəyə verib. 

 

Hər üç bina yüksək infrastruktura, maddi-texniki bazaya malikdir. Burada mühəndislik ixtisasları üzrə keyfiyyətli kadr hazırlığının təmin olunması məqsədilə Yüksək Texnologiyalar və İnnovativ Mühəndislik Məktəbi, onun nəzdində Texnopark qurulub. 

Universitet unikal laboratoriya və mərkəzlərlə, eləcə də qurğularla, komputerləşdirilmiş sistemlərlə təchiz olunub.

Universitetin Texnoparkı tələbələr üçün həm mühəndislik dünyasının yeniliklərini mənimsəmək, həm də öz ideyalarını gerçəkliyə çevirmək baxımından faydalı platformaya çevrilib.

Texnoparkın tərkibində Robotexnika Klubu fəaliyyət göstərir. Klub üzvləri Qərbi Kaspi Universitetinin tələbələrindən və məktəblilərdən təşkil olunub. Belə ki, respublika məktəblərində təhsil alan istənilən şagird onlayn formada qeydiyyatdan keçərək Robototexnika Klubuna üzv olur və mütəmadi olaraq Qərbi Kaspi Universiteti Texnoparkında yerləşən kluba gələrək robototexnika, mexatronika və elektronika avadanlıqları ilə təcrübi işlər görə bilirlər. Robototexnika Klubu eyni zamanda region məktəblərin oxuyan şagirdləri də nəzərə alaraq mütəmadi olaraq bölgələrə gedərək 1-3 günlük robototexnika təlimləri keçirlər. Hal-hazırda klubun 9 tələbə və 40 məktəbli üzvü vardır.

Şübhəsiz, pandemiya bu prosesin davamlılığını bir qədər tormozlayıb, ancaq həm tələbələr, həm də şagirdlər inanırlar ki, bu, müvəqqəti dayanmadır.

Ancaq universitet istənilən halda, ən bədbin proqnozun gerçəkləşmə ehtimalına da hazırlaşır - əgər sentyabrdan ənənəvi formada tədrisi bərpa etmək mümkün olmasa, onlayn formada həm dərslər, həm də bu məşğələləri təşkil etmək mümkün olacaq.

Qərbi Kaspi Universiteti həm də beynəlxalq əlaqələri ilə seçilən təhsil ocaqlarındandır. 

Universitet 1992-ci ildən UNESCO nəzdindəki Beynəlxalq Universitetlər Assosiasiyasının, 1996-cı ildən İdarəçiliyin İnkişafı üzrə Avropa Fondunun, 1999-cu ildən isə Qara Dəniz Ölkələri Universitetlər şəbəkəsinin üzvüdür.

Xarici mütəxəssisləri, tədqiqatçıları burada tez-tez görmək mümkündür. Qərbi Kaspi Universitetinin beynəlxalq şəbəkəsi 200-dən artıq təhsil müəssisəsini əhatə edir. Xüsusilə Erasmus və Mövlanə proqramları çərçivəsində müxtəlif xarici universitetlərin müəllim və tədqiqatçıları QKU-da dərslər aparır, təlimlər, seminarlar keçir. 

Universitet həm də mühüm beynəlxalq konfransların təşkilatçısı kimi çıxış edir. 

Təkcə ötən il ərzində keçirilmiş iki mühüm tədbiri qeyd etmək kifayətdir. 

Birincisi, Almaniya və Danimarkadan olan tədqiqatçıların iştirakı ilə Bio-Riyaziyyat Yaz Məktəbi.

Tanınmış tədqiqatçılar - Danimarka Texniki Universiteti Tətbiqi Riyaziyyat və Kompüter Elmləri Kafedrasının professoru Mads Peter Soensen və Almaniyanın Mübahisələrin həlli Mərkəzinin professoru Florian Rupp 200-dək universitet, orta məktəb müəllimləri, yerli tədqiqatçılar üçün təlimlər keçiblər, elmi-praktik müzakirələr aparılıb və s.

İlin ən böyük tədbiri isə may ayında keçirilən  Ümummilli lider Heydər Əliyevin anadan olmasının 96-cı ildönümünə həsr olunmuş “Dağlar: Mədəniyyətlər, Landşaftlar və Biomüxtəliflik” adlı Beynəlxalq konfrans olub. Konfransda dünyanın 40-dək ölkəsindən xarici tədqiqatçılar, eləcə də yerli mütəxəssislər iştirak ediblər. İştirakçılar 4 günlük konfransın bu sahədə son illərdə keçirilən ən əhəmiyyətli, səmərəli tədbirlərdən biri olduğunu bildiriblər. 

 

Hazırda əmək bazarında ingilis dilli üzrə biliklərin mühüm üstünlük kimi qəbul edildiyini və hər bir ixtisasın incəliklərinə yiyələnməkdə bu dil üzrə biliklərin əhəmiyyətli rolunu nəzərə alaraq Qərbi Kaspi Universiteti intensiv ingilis dili dərsləri təşkil edir.

Bu dərslərin keyfiyyətli təşkili üçün tələbələrin bilik səviyyəsini müəyyən etmək məqsədi ilə tədris ilinin əvvəlində diaqnostik imtahanlar keçirilir. Diaqnostik imtahanlarla tələbənin hansı "level”ə uyğun gəldiyi müəyyənləşdirilir və qruplaşdırma bu prinsiplə aparılır. Nəhayət, Kembrdic üsulu əsasında Final imtahanlar təşkil edilir. 

Bu imtahan formasında tələbələrin bilik və bacarıqları 4 komponent üzrə qiymətləndilir: “Reading” (oxuma), “Writing”(yazma), Listening (dinləmə) və "Speaking" (danışıq).

 

İngilis dilinin bu səviyyədə tədrisi xarici universitetlərdən dəvət olunan mütəxəssislərin mühazirələrini sərbəst şəkildə dinləmək, ən son elmi nailiyyətlərin, nəzəriyyələrin əks olunduğu ədəbiyyatlar və elektron resurslarla tanış olmaq, beynəlxalq təhsil layihələrində iştirak etmək imkanlarından yararlanmaq və tələbələrdə bugünkü əmək bazarının tələblərinə uyğun kompitensiyalar formalaşdırmaq üçün nəzərdə tutulub.

Bir sözlə, burada ingilis dilini yüksək səviyyədə mənimsəmək üçün yaxşı mühit və imkanlar var. Həm də məsələ buarasındadır ki, ingilis dilini öyrənmək qaçılmazdır – imtahanlar bunu tələb edir. Tələbələr öz aralarında belə bir fraza da yaradıblar “İngilis dilini bilmirsənsə, Qərbi bitirməmisən”.

Qərbi Kaspi Universiteti artıq uzun illərdir ki, magistratura pilləsində İsveçrənin Biznes və Beynəlxalq Tədqiqatlar Universiteti (UBIS) ilə birgə ikili diplom proqramını həyata keçirir. Yəni Biznesin idarəedilməsi ixtisasında oxuyan tələbələr (MBA) bu proqram sayəsində 2 ilə 2 diplom əldə edə bilirlər. Tələbələr İsveçrədə Yay Məktəbində iştirak edir, olduqca səmərəli dərslərə, treyninqlərə qatılır. 

İndi bu layihə daha bir tərəfdaşlıq layihəsi ilə üçlü diplom proqramına çevirib. Belə ki, MBA proqramı ABŞ-ın Potomak Universiteti ilə əməkdaşlıqla bir qədər də genişləndirilərək üçlü diplom proqramına çevrilib. Universitetin ikili diplom proqramında təhsil alan tələbələri üç istiqamətdən (menecment, marketinq, bank işi və maliyyə) birini seçib əlavə dörd fənn keçməklə üçüncü diplomu da əldə edə bilərlər.

 

(Fotoda: Qərbi Kaspi Universitetinin magistrlarının İsveçrədə, UBİS Universitetində keçirilən məzun günü)

Qərbi Kaspi Universiteti ötən il daha bir neçə nüfuzlu təhsil ocağı əməkdaşlıq barədə razılıq əldə edib. Hələlik onlardan ikisi üzərində xüsuilə dayanaq. 

Onlardan biri ABŞ-ın “Texas A&M” Beynəlxalq Universitetidir. İmzalanamış memorandum iki universitet arasında müəllim və tələbə mübadiləsini, birgə elmi tədqiqatların aparılmasını, müxtəlif layihə və tədbirlərin təşkilini nəzərdə tutur. İkitərəfli əməkdaşlıq həmçinin azərbaycanlı tələbələrə ABŞ-da yay və qış məktəblərində iştirak üçün imkanlar yaradacaq.

 

Bu barədə razılıq Kollecin beynəlxalq şöbəsinin əməkdaşı Catherine Vellinganın Bakıya səfəri və Qərbi Kaspi Universitetində keçirdiyi görüşlərdən sonra əldə olunub. İlkin razılığa əsasən, Qərbi Kaspi Universitetində Georgian Kolleci ilə birlikdə baza ixtisas hazırlığı həyata keçirəcək Mərkəz yaradılacaq. Burada təhsilini başa vuran tələbələr Georgian Kollecinə qəbul ediləcək. Kollec təhsil müddətində Kanadada tələbələrin işlə təmin edilməsi öhdəliyini də öz üzərinə götürür. 

Dünyanın nüfuzlu təhsil reytinqi agentliklərindən biri olan Times Higher Education (THE) öz saytında Qərbi Kaspi Universiteti üçün xüsusi səhifə açıb.

Universitetin son illərdə dinamik inkişafı, inrastrukturunu və təhsil proqramlarını yeniləməsi və beynəlxalq təhsil mühitinə inteqrasiyası “Times Higher Education”ın diqqətini cəlb edib və təşkilat öz saytında QKU-nu beynəlxalq ictimiayyətə təqdim etmək qərarı verib.

Burada universitetlə bağlı ətraflı məlumat verilir, təhsil ocağının fəaliyyətini özündə əks etdirən videorolik təqdim edilir.

 

Hazırda Qərbi Kaspi Universitetinin kitabxanası 65.000-dən çox ədəbiyyat, 500-dən çox mikroforma və informasiyanın başqa mənbələri ilə ölkədə ən zəngin kitabxanalardan biridir. Kitabxana Fondunda ingilis dilində 16 000-dan çox ədəbiyyat mövcuddur.

Universitetdə BMT kitabxanası da fəaliyyət göstərir. Görək, bu kitabxananın özəlliyi nədən ibarətdir?

Bir neçə il öncə burada BMT-nin Ümumdünya Turizm Təşkilatının Depozitariya Kitabxanası yaradılıb. Bununla da, Qərbi Kaspi Universiteti ölkəmizdən sözügedən kitabxana proqramına daxil edilmiş ilk və yeganə ali təhsil ocağı olub.

Bundan başqa, BMT-nin Səhralaşmaya qarşı Mübarizə üzrə Konvensiyası, BMT-nin Asiya və Sakit okean üçün İqtisadi və Sosial Komissiyası, BMT-nin Əhali Fondu, həmçinin Ümumdünya Meteorologiya Təşkilatı və BMT-nin Ətraf Mühit Proqramının birgə beynəlxalq orqanı olan İqlim Dəyişikliyi üzrə Hökumətlərarası Panelin Katiblikləri nəşrlərinin Qərbi Kaspi Universitetinin kitabxanasına töhfə edilməsi barədə müsbət qərar qəbul ediblər və bu təşkilatlardan da ədəbiyyatlar kitabxana fonduna ardıcıl şəkildə daxil olur.  

Eyni zamanda, Universitet Ümumdünya Əqli Mülkiyyət Təşkilatının Depozitariya Kitabxanası Proqramına qoşulub. Sözügedən proqram çərçivəsində ildə iki dəfə ÜƏMT Katibliyi tərəfindən Qərbi Kaspi Universitetinə müxtəlif nəşrlər təqdim olunur.

Beynəlxalq Əmək Təşkilatının Depozitariya Kitabxanası da oxucuların ixtiyarındadır. Kitabxana paralel olaraq BMT-nin Uşaq Fondu, ÜTT Ümumdünya Ticarət Təşkilatı, İqlim Dəyişiklikləri üzrə Hökümətlərarası Ekspertlər Qrupu, Asiya İnkişaf Bankı, Beynəlxalq İntellektual Mülkiyyət Təşkilatı kimi qurumlarla da sıx əməkdaşlıq şəraitində işləyir, onların ədəbiyyatlarını qəbul edir.

Kitabxana fondunda 1000-ə yaxın kitab toplanıb. Kitablar müxtəlif istiqamətləri əhatə edir, onların arasında dərs vəsaitləri ilə yanaşı nadir məlumat topluları da var. Kitabxanada  Azərbaycan dilinə tərcümə olunmuş kitablarla yanaşı, bir neçə xarici dildə olan ədəbiyyatların elektron variantından da istifadə etmək mümkündür.

Kitabxana fondu elmi tədqiqat aparan magistr, doktorant və dissertantlar üçün də olduqca əhəmiyyətlidir. Belə ki, burada elmin müxtəlif istiqamətlərinə dair ən son yenilikləri özündə əks etdirən ədəbiyyatlar toplanıb.

Bəli, tələbə həyatını unudulmaz edən onun rəngarəngliyidir. Universitetin müxtəlif dərnəkləri, klubları, idman komandaları, düşərgələri bu məkanı tələbələr üçün doğma və unudulmaz edir. 

Tələbə bir gün futbolçudur, bir gün musiqiçi, bir gün alpinist, bir gün turist və s. 

Universitetdə onlarla belə klublar var ki, tələbələr asudə vaxtlarını həm də bu klublarda keçirmək imkanı əldə edir, eyni zamanda özünüinkişaf üçün yaxşı fürsət qazanırlar… 

Hər bir universitetin işinin nəticəsi onun məzunlarıdır. Yetişdirdiyi məzunlara baxaraq təhsil müəssisəsinin işinə qiymət vermək olar.

Bu baxımdan Qərbi Kaspi Universiteti fəxr edə bilər. Məzunları arasında tanınmış dövlət xadimləri, səfirlər, konsullar, nüfuzlu beynəlxalq şirkətlərin top menecerləri kifayət qədərdir.

Azərbaycan Respublikasının Bolqarıstan Respublikasındakı fövqəladə və səlahiyyətli səfiri Nərgiz Qurbanova, Heydər Əliyev Fondunun icraçı direktoru Anar Ələkbərov, Vergilər Nazirliyinin Aparatının rəhbəri Ağasəməd Əfəndiyev, Təhsil Nazirliyinin İnformasiya şöbəsinin müdir müavini və QHT və KİV ilə iş sektorunun müdiri Cəsarət Valehov, ADA Universitetinin prorektoru, Dövlət İmtahan Mərkəzi publik hüquqi şəxsin Direktorlar Şurasına üzvü Fariz İsmayılzadə, BP-in Houston ofisində aparıcı Hüquq Müşaviri Səidə (İbrahimova) Bərvarz, AZAL-ın Parisdəki nümayəndəliyinin rəhbəri Kamran Kəlbəliyev, Microsoft” şirkətinin baş meneceri Fərid Cəfərov kimi karyerasında uğur qazanmış çox sayda gənc məhz Qərbi Kaspi Universitetinin məzunlarıdır.

Nəhayət, Qərbi Kaspi Universiteti abituriyentlər üçün bir sıra güzəştlər, təqaüdlrə nəzərdə tutur. Qeyd edək ki, ödənişsiz təhsil almaq da mümkündür. Bütün ixtisaslarda dövlət sifarişli yerlər nəzərdə tutulur, digər bir tərəfdən isə yüksək bal toplayan tələbələr pulsuz və ya təhsil haqqının bir hissəsindən azad olunmaqla təhsil imkanı əldə edirlər. Bütün bu imkanlar barədə universitetin saytından daha ətraflı məlumat əldə etmək mümkündür: //wcu.edu.az/az/news/view/840