“Ölkə rəhbərliyi bu məsələlərə daha yaxından bələd olduğu üçün bir qədər səbrlə davranmağı üstün tutur. Düşünürəm ki, əgər zərurət və ehtiyac olarsa, geniş miqyaslı hücum əmri də verilə bilər və xalqımız da, ordumuz da bunu yerinə yetirməyə canıyla qanıyla başlaya bilər”.

Bunu Moderator.az-a açıqlamasında yazıçı Səfər Alışarlı deyib. Yazıçı bildirib ki, əgər zərurət yaranarsa, ordumuz geniş miqyaslı əməliyyatlara başlaya bilər:

“Tovuzdakı döyüşlərlə bağlı sosial şəbəkələrdən və kütləvi informasiya vasitələrindən məlumat alıram. Yəni dəqiq informasiyaya malik deyiləm və ona görə də hər hansı qəti bir fikir söyləmək mənim üçün çətindir. Amma verilən xəbərlər onu bildirir ki, ordumuz döyüşür, xalqımızın orduya dəstək ruhu çox yüksəkdir. Şəhidlərimizin dəfn mərasimində bunu şahidiyik. Təbii ki, əgər ehtiyac olarsa, yəqin ki, hökumət əlavə hərbi qüvvələrin formalaşmasına gedə bilər. Amma indi Rusiya ekspertlərinin də mətbuatda fikirləri yer alır və onlar da müxtəlif sözlər deyirlər. Əsas fikir ondan ibarətdir ki, münaqişəyə qarışmaq fikrində deyillər. Amma bunlar hamısı siyasi rəhbərliyin yox, şərhçilərin bəyanatlarıdır. Biz də şərhçiyə arxayın olub öz işimizin böyük miqyasda icarsına başlaya bilmərik. Ölkə rəhbərliyi bu məsələlərə daha yaxından bələd olduğu üçün bir qədər səbrlə davranmağı üstün tutur. Düşünürəm ki, əgər zərurət və ehtiyac olarsa, geniş miqyaslı hücum əmri də verilə bilər və xalqımız da, ordumuz da bunu yerinə yetirməyə canıyla qanıyla başlaya bilər. Amma görünür buna hələ ki, ehtiyac görmürlər və ona görə də belə bir əmr verilmir. 

Biz səhrada, kosmosda yox, dünyanın çox həssas bir regionunda məkan tutmuşuq və ona görə də burda təkcə bizim maraqlarımız üstünlük təşkil etmir. Əslində üstünlük təşkil edə bilər, amma sadəcə bizim o boyda super dövlətlərə qarşı potensialımız imkan vermir ki, yüz faiz istədiyimizi həyata keçirək. Ona görə də qonşu dövlətlərin də maraqlarıyla hesablaşmağa məcburuq. Düşünürəm ki, Rusiya özü də heç istəməz ki, onun yaxın qonşuluğunda belə qanlı və odlu münaqişələr davam etsin. İstəyərdik ki, Rusiya rəhbərliyi bu məsələyə daha həssas yanaşsın və təcavüzkarın Azərbaycan torpaqlarını tərk etməsi üçün müəyyən işlər görsün. Amma Rusiya Minsk Qrupunun həmsədrlərindən biri kimi Amerika və Fransa da daxil olmaqla otuz ildir saymazyanalıqlarla məşğuldurlar. Bizim torpaqlarımızda ermənilər yaşayır, abadlıq işləriylə məşğuldurlar. Adam torpaqlarımızda aparılan işləri görəndə dəhşətə gəlir. Əlbəttə, bunun da bir gün sonu olmalıdır”.