İyulun 12-də düşmənin Tovuz istiqamətində törətməyə çalışdığı təxribat cəhdi bu gün də əsas müzakirə mövzusu olan məsələlər sırasındadır.
Moderator.az olaraq tanınmış hərbi jurnalist və şərhçi Anar Şuşalı ilə söhbətimizdə iyul döyüşlərini, habelə bu döyüşlər fonunda digər mühüm məqamları şərh etməyə çalışdıq.
-Anar bəy, öncə Tovuz olayları ilə bağlı düşüncənizi bilmək istərdik. Sizcə düşmən niyə təxribat üçün məhz Tovuzu seçmişdi?
-İyulun 12-də günorta saatlarından başlayaraq Ermənistan silahlı qüvvələrinin bölmələri Azərbaycan-Ermənistan dövlət sərhədinin Tovuz rayonu sahəsində atəşkəs rejimini kobud şəkildə pozaraq artilleriya qurğularından istifadə etməklə mövqelərimizi atəşə tutdular. Artıq telefonumun səsi kəsilmirdi. Bütün bu hadisələr mənə 2016-cı ilin aprel hadisələrini xatırlatdı. Onda da zənglər bitmirdi, insanlara dolğun və tam dəqiq məlumat lazım idi. Rəhbərlikdən icazə alıb birbaşa döyüş baş yerən Tovuz rayonuna getmək istədiyimi bildirdim. Sağ olsun, rəhbərlik razılaşdı. Birbaşa döyüş gedən istiqamətə -Tovuz rayonunun Ağdam kəndinə yola düşdük.
Əslində hadisələrin Ermənistan – Azərbaycan sərhəddində baş verməsi düşündürücüdür. Ona görə ki, Ermənistan öz xislətinə sadiq qalıb bütün dünyanı həmişə etdiyi kimi, indi də aldatmağa cəhd edir, aqressiv siyasətini ört-basdır etmək məqsədi ilə genişmiqyaslı dezinformasiya təbliğatı ilə məşğuldur. Bütün bunların fonunda, həm də Ermənistan COVİD-19 pandemiyası ilə mübarizə aparmaq bacarığından məhrum olduğuna görə ölkə vətandaşlarının etirazının qarşısını almaq üçün yeni nəsə uydurmaq və ya hadisələri başqa yönəltmək lazım idi. Tovuzun seçilməsi həm də ermənilərə ona görə lazım idi ki, Tovuz strateji cəhətdən önəmli ərazidi.
-Lakin Ermənistan ciddi-cəhdlə baş verənlərin məsuliyyətini bu gün də Azərbaycanın üzərinə qoymağa çalışmaqdadır...
-Düşmən beynəlxalq ictimaiyyəti aldatmağa çalışır ki, guya təxribat törətməyib, ilk atəşi də Azərbaycan tərəfi açıb. Uzun illərdir ki, biz ermənilərin yalanlar, iftiralar, böhtanlar üzərində qurulmuş informasiya təbliğatı ilə üz-üzəyik. Düşmən bizimlə müharibəni yalnız hərbi sahədə deyil, dediyim informasiya sahəsində də aktiv şəkildə aparmaqdadır.
Ordumuzun baş verən təxribatların qarşısını almaq üçün Tovuz istiqamətində yerləşən bölmələrinə döyüş tapşırığı verən Müdafiə Nazirliyi düşmənə ağır zərbələr endirdi. Bütün bunların nəticəsində düşmən xeyli sayda itki verdi. Onların hərbi maşınları, bölmələri, dayaq məntəqələri, dərinlikdə yerləşən hərbi obyektləri və Pilotsuz Uçuş Aparatları məhv edildi. Əlbəttə, atalar yaxşı deyib, özgəsinə quyu qazan özü həmin quyuya düşər. Ermənilər də öz qazdıqları quyuya özləri düşdü. Biz bir daha əmin olduq ki, ordumuz həqiqətən regionun super gücüdür. Həm da dünyanın 50 ən güclü orduları sırasındayıq. Prezident, Ali Baş Komandan cənab İlham Əliyev orduya ayırdığı diqqət bütün bunların göstəricisidir.
-Anar bəy, iyul döyüşləri xalq-ordu birliyinin mövcud səviyyəsi ilə bağlı hansı həqiqətləri üzə çıxardı?
-Tovuza gəldiyim ilk gündən Tovuz əhalisinin istiqanlılığını gördüm. Uşaqdan tutmuş böyüyə qədər hər kəs çalışırdı ki, əllərindən gələni gücləri çatdığı qədər ordumuza kömək eləsin. Düzdü, bu günkü dönəmdə Silahlı Qüvvələrimiz Ali Baş Komandan, cənab İlham Əliyevin sayəsində həm arsenal bazası həm də ərzaq, maddi bazası yüksək səviyədədrir. Ancaq bütün bunlara baxmayaraq, yenə də xalq ordunun yanında olmaq istəyirdi. Təsəvvür edin ki, yolda dayanan polis işcilərinə yolun tam boş olmasına, patrul aparan polis və hərbi polisin xidmətinə çalışırdılar ki, kömək olsunlar. Minlərlə gənc birbaşa döyüş nöqtəsinə gedib orda döyüşən əsgərlərə belə yardımçı olmaq istəyirdilər. Baxın, budur orduya inam, budur dövlətə və Prezidentinə inam. Yenə qeyd edirəm ki, Silahlı Qüvvələrimizin yetərincə maddi-texniki bazası yüksək səviyyədədir, əsgərlərimizin kazarmaları, postları bütün lazimi ərzaq və silahla tam təmin olunub. Ancaq xalqın yenə deyirəm ordusunun, Prezidentinin yanında olmaq istəyi bir daha sübut edir ki, biz qüdrətli dövlətik. Təsəvvür edin ki, orada hadisələri işıqlandıran media işçilərinə diqqət xüsusi ilə seçilirdi. Biri qonaq aparmaq istəyir, biri su, digəri yemək gətirirdi. Bilirsiz, bütün bunlar xalqımızın ağır günlərdə yumuruq tək birləşib bir olmağımızın göstəricisidir. Bu da əlbəttə, düşməni qorxudur və sarsıdır.
-Sizcə iyul döyüşləri informasiya işinin düzgün təşkilinin önəmini bir kəs daha sübut etdimi?
-Əlbəttə, hansısa əməliyyatın, döyüşün uğurlu keçməsi üçün informasiya müharibəsini düzgün qurmaq və idarə etmək lazımdır. Əgər bütün bunları doğru yönəltsən, onda mütləq qalibiyyət sənindir. Bildiyimiz kimi, Tovuzda erməni təxribatının qarşısını həm də yerli media nümayəndələrimiz aldı. Müdafiə Nazirliyinin mətbuat xidməti ilə mütamadi işlədiyimiz üçün fəaliyyətimiz uğurlu oldu.
Bildiyiniz kimi, sosial şəbəkələrdə ermənilər tərəfindən çaşdırıcı xəbərlər yayıldı. Əbəttə, bu həm kənd, rayon sakinləri arasında, həm də digər rayon və şəhər sakinləri arasında çaşqınlığın yaradlımasına hesablanmışdı. Bütün bunları nəzərə alan KİV nümayəndələri TV, radio və sosial şəbəkələrdə aktiv işlədi. Bütün yalnış xəbərlərin, feyk profillərin qarşısını almaq üçün birlikdə işlədik. Əlbəttə, belə incə məqamlarda həm tamaşaçıya düzgün məlumat çatdırmalısan, həm də düşmən tərəfindən yayılan dezinformasiyanın qarşısını almalısan. Bir daha xatırlatmaq istəyirəm Müdafiə Nazirliyinin yaratdığı şərait və mətbuat xidmətinin rəhbəri Vaqif Dərgahlıya mütamadi işləməyimiz bütün belə dezinformasiyaların qarşısını almaqda kömək etdi.
Sonda yeri gəlmişkən Milli Mətbuatımızın 145 illik yubleyi münasibəti ilə bütün media işçilərini, jurnalistlərimiz ürəkən təbrik edirəm. Onlara daim uğur və yüksəklik arzulayıram.
Seymur ƏLİYEV