Qarabağ savaşının ilk  ən qaynar illərində Azərbaycanın yenicə formalaşan Müdafiə Nazirliyinin rəhbərlərindən olmuş general-mayor Tacəddin Mehdiyev Moderator.az-a müsahibəsində Türkiyə-Azərbaycan birgə hərbi təlimlərindən, qardaş ölkənin hərbi bazalarının Azərbaycanda yerləşdirilməsi perspektivlərindən, torpaqlarımızın tezliklə azad edilməsi üçün görülməli olan digər həyati vacib işlərdən bəhs edib. 

-Son günlər uğurla davam edən Azərbaycan-Türkiyə birgə hərbi təlimlərini çox yüksək dəyərləndirirəm.  Türk ordusunun  tərkibində yalnız quru qoşunları deyil, aviasiya, artilleriya və digər qoşun növlərinin də olduğu böyük bir qüvvə ilə Azərbaycana gəlməsi qardaş ölkənin bu tədbirə çox ciddi yanaşdığını göstərir.... 

Türkiyə ordusu hazırda dünyanın ən  güclü ordularından  biridir. NATO dövlətləri arasında da Türkiyənin quru qoşunları ən güclü hesab olunur. Türk ordusunun gücünü biz, xüsusən son illərdə Suriyada gördük, Liviyada gördük. Türk ordusu Türk dövlətinin, türk xalqının  təhlükəsizliyini təmin etmək üçün şücaətlər göstərdi və hansı uğurlara nail olduğunu bütün dünyaya nümayiş etdirdi....

Türk ordusunun əsas gücü nədədir? Ondadır ki, türk əsgərində, türk zabitində öz Vətəninə, xalqına, millətinə, dövlətinə, bayrağına böyük və sarsılmaz sevgi, Allaha sonsuz iman var. Hər bir türk hərbi qulluqçusu türk olduğu üçün qürur hissi keçirir... 

Mən  Qarabağ savaşının ilk illərində Müdafiə naziri  və nazirin müavini kimi çalışdığım dövrdə Türkiyə hərbçiləriylə çox təmasda olmuşam. Sizi əmin edirəm ki, Türk ordusunda olan nizam-intizam hətta Almaniya ordusunda da yoxdur.  Bu orduda belə bir hal yoxdur ki, komandir, general, zabitin verdiyi əmr yerinə yetirilməsin... Açığı, mən Azərbaycan Müdafiə Nazirliyinin rəhbərliyində çalışan bir şəxs kimi Türkiyə Silahlı qüvvələrindəki nizam-intizama, subordinasiyaya həsəd aparırdım. Hələ 27-28 il öncə... Bu gün isə Türkiyə ordusu daha da inkişaf edib, daha da peşəkarlaşıb və o dövrdəkindən də qat-qat güclüdür... Bu gün hər bir Türk əsgərində  öz komandanlığına, zabit heyyətinə güclü inam və etibar var... Onlar daim inanır ki, Türkiyə ordusunun başında duranlar onları yalnız qələbəyə apara bilərlər...

Onu da vurğulamaq istərdim ki, Türkiyə Prezidenti Rəcəb Tayyib Ərdoğan vaxtında Rusiyalı həmkarı Vladimir Putinin SSRİ-nin bərpası və Naxçıvanla bağlı sərsəm çıxışlarını anladı və buna adekvat tədbir görməyə qərar verdi. Naxçıvanın ermənilərə verilməsiylə də bağlı Rusiyada səslənən fikirlər artıq rəsmi Ankaranın səbir kasasını daşdırdı. Türklər də anladı ki, Moskvaya vaxtında cavab verilməsə, onun iştahı daha da artacaqdır... Miqyas və ərazicə misli görünməmiş   Azərbaycan-Türkiyə birgə təlimləri də bu cavabın tərkib hissələrindən biri oldu.  Və mən bir daha həmin təlimləri alqışlayıram... 

Mən səmada  Türkiyə və Azərbaycan təyyarə və vertolyotlarınınn birgə uçuşlarını görəndə çox böyük fərəh hissi keçirdim...  Bəziləri bu təlimlərə adi bir olay kimi yanaşır. Lakin əslində  hər bir təlimin öz hərbi-siyasi məqsədi, hədəfləri var.  Belə təlimlərdə yaxın gələcəkdə aparılacaq döyüş əməliyyatlarının modelləşdirilməsi aparılır. Və bu təlimlərin  nəzərdə tutulduğundan uzun çəkməsi və Türkiyə Müdafiə naziri və Baş Qərargah rəisinin böyük bir nümayəndə heyyəti ilə Azərbaycana gələrək həmin təlimlərin son mərhələsini müşahidə etməsi də diqqətəlayiqdir... Bu göstərir ki, Türkiyə-Azərbaycan hərbi əməkdaşlığı yeni, həlledici bir mərhələyə qədəm qoyur...

-Türk Silahlı Qüvvələrinin rəhbərlik, komandanlıq və şəxsi heyyət çərçivəsində böyük bir tərkiblə Azərbaycana gəlişindən sonra torpaqlarımızın azadlığı istiqamətində heç  bir ciddi nəticə əldə olunmadan geri dönməsi qətiyyən doğru olmaz. Bu, növbəti dəfə xalqın ümidlərini sarsıtmaq olardı... Əgər Rusiya və Ermənistan  25 ildir ki, birgə hərbi baza yaradıbsa, biz nədən Türkiyə ilə birgə öz ərazimizdə bazalar formalaşdırmayaq? Biz hələ çox gecikmişik...

Azərbaycanda Türkiyə bazalarının yaradılması regionda qüvvələr balansını sabitləşdirər və Rusiyanın bundan sonrakı bəd əməllərinin qarşısını alar... Son vaxtlar, xüsusən Tovuz döyüşləri və Türk-Azərbaycan birgə təlimləri başlandıqdan sonra Putinin qeyri-rəsmi sözçüsü hesab edilən Jirinovskinin çıxışlarına hamımız diqqət edirik... O deyir ki, Türkiyəni qətiyyən Azərbaycana yaxın buraxmaq olmaz, onlar gələcəkdə Turan dövləti yaradacaqlar. Odur ki, Rusiya ermənilərə görə Türkiyəyə güzəşt etməməli və türklərin Azərbaycanda baza yaratmasına imkan verməməliyik...

Bütün bunları nəzərə alaraq hesab edirəm ki, Azərbaycan dövlət rəhbərliyinin ən düzgün qərarı Türkiyənin Azərbaycanda hərbi bazalarının yaranmasına razılıq verməsi olacaq... Ona görə ki, biz qardaş xalqlarıq və təhlükəsizliyimizi də birgə təmin etməliyik. 

Bir sözlə, Türkiyə öz sözünü dedi – indi top  bizim meydandadır... Yəni biz qəti qərarımızı verərək qardaş ölkənin Azərbaycanda bazalarını qurmasına “hə” deməliyik... Və heç zaman Rusiyadan çəkinmək lazım deyil...  Belə bir məsəl var ki, qaçanı tez tutarlar... Odur ki,  biz Rusiya-Ermənistan birliyinin qarşısından qaçmalı deyilik. Əksinə, onların üstünə getməliyik ki,  bizim mübarizə aparmağa gücümüz olduğunu bir daha anlasınlar...

(Davamı var) 

Sultan Laçın