Tanınmış politoloq, istiqlalçı deputat Cümşüd Nuriyev Moderator.az-a  geniş müsahibəsində Azərbaycanda və regionda yaranmış son vəziyyətlə bağlı diqqətçəkən açıqlamalar verib.

-Ondan bir neçə gün sonra, bildiyiniz kimi, Tovuz cəbhəsində gərginlik, ordumuzun şəhidlər verməsi və s. hadisələr ölkə gündəmini tamamilə dəyişdirdi.  Eləcə də son aylar hakimiyyət dairələrində gedən proseslər də araşdırmalarımızda  müəyyən fasilələr yaratdı. Lakin işimi davam etdirirəm və təxminən sentyabrın 24-dək, yəni 20 gün vaxt versəniz, xeyli məqamları fakt və detallarıyla sizə açıqlayacam. Hələlik isə bir neçə yeni məlumatı nəzərinizə çatdırmaq istəyirəm. 

Birincisi, bəhs edilən ssenarini quranların bir hissəsi də Azərbaycanın qanunverici orqanında fəaliyyət göstərir. Onlar 4 ilə yaxın bir müddətdə - 1991-ci il 18 oktyabrdan, yəni müstəqillik qazandığımız gündən 1995-ci il 12 noyabradək – ilk müstəqil Konstitusiyamızın qəbul olunduğu günədək  Azərbaycanın parlament tarixini saxtalaşdırmaqla məşğuldurlar. Buna, demək olar ki, 80 faiz nail olublar... 

Onlar sanki hansısa məqamı gözləyirlər. Həmin məqama qədər öz işlərini mümkün qədər gizli aparırlar. O vaxta qədər bunlar öz adamlarını Prezident Administrasiyasında və  bir neçə nazirlikdə yerləşdiriblər. Bu, əsasən o nazirliklərdir ki, onlar vasitəsilə Prezidentlə xalq arasında uçurumun yaradılmasına, demək olar ki, nail olublar. Bunlar vətəndaşların həm təhlükəsizliyini, müdafiəsini və sosial hüquqlarının qorunmasını təmin etməli olan  dövlət orqanlarıdır. Bəhs edilən düşmən güclər, demək olar ki, həmin qurumlarda adamlarını yerləşdirməyi başa çatdırıblar...  

-Ötən söhbətlərimizdə də vurğuladığım kimi,  mən bütün dediklərimi sənədlər əsasında danışıram. Hələlik  əsas faktları açıqlaya  bilmirəm. Çünki bəzi sənədlərin əldə olunmasını gözləyirəm. Amma onu deyə bilərəm ki, dövlət orqanlarında şəbəkələşmiş güclərin məqsədlərindən biri də Azərbaycan dövlətinin doğrudan da xalqın ən ali maraqlarına cavab verən strateji bir iddia irəli sürməsi zamanı hərəkətə keçərək onun baş tutmasının qarşısını almaqdır. Artıq Azərbaycan dövləti və xalqı belə bir iddianı irəli sürüb. Söhbət Türkiyə ordusunun Azərbaycan ərazisində yerləşdirilməsindən gedir... 

Ancaq onu deyim ki,  bunların fəaliyyəti daha uzaq məqsədlərə hesablanıb. Həmin güclərin  layihələrinə nələr daxildir? Birincisi, ölkədə hakimiyyətdaxili qarşıdurma yaratmaq, ikincisi,  hakim partiya ilə digər partiyalar arasında bir uçurum yaratmaq, üçüncüsü, ölkə daxilində milli maraqlar əleyhinə həm daxili, həm də xarici KİV, əsasən internet kanalları vasitəsilə təbliğat aparmaq... 

Bir sözlə,  bunlar ölkədəki vəziyyəti Azərbaycan dövlətinin varlığının sual altında qalmasınadək gərginləşdriməyə çalışırlar... Türkiyə hazırda boş yerə Azərbaycanı əvvəlkindən daha fəal şəkildə dəstəkləmir. Əgər Türkiyə ordusu ölkəmizdə qalmayacaqsa, çıxacaqsa, Azərbaycan dövlətinin mövcudluğu doğrudan da sual altında qalacaq...  Və sözügedən düşmən güclərin də əsas məqsədləri Azərbaycanı ən azı 3 qonşu dövlət arasında, Gürcüstanı da nəzərə alsaq, 4 qonşu dövlət arasında bölməkdir...  Həmin plan üzərində hazırda fəal iş gedir...  

Və hazırda Azərbaycana 4 istiqamətdən hücum var: birincisi - Haykanuşun uşaqları- Ermənistan, ikincisi -  İvanın uşaqları - Rusiya, üçüncüsü -  Daranın uşaqları - İran, dördüncüsü - Sorosun uşaqları-  Avropa, ABŞ... Ölkəmizdə iqtisadi, siyasi, ideoloji gücünə görə birinci yerdə Haykanuşun uşaqlarıdır. İkinci yerdə İvanın uşaqlarıdır ki, onların da Azərbaycanda kifayət qədər sosial bazaları və maddi imkanları var. Üçüncü yerdə Daranın uşaqlarıdır. Onlar da əsasən Azərbaycanda dini amildən, yəni ölkəmizin böyük əksəriyyətinin müsəlman-şiə inanclı olmasından yararlanaraq planlarını həyata keçirməyə çalışırlar. Dördüncü yerdə isə Sorosun uşaqlarıdır ki, onlar əsasən demokratiya, insan haqları, qadın haqları, gender bərabərliyi, cinsi azlıqların haqları, feminizm hərəkatı, tolerantlıq  və s. kimi amillərdən sui-istifadə etməklə  Azərbaycan cəmiyyətinə və dövlətinə müəyyən təzyiqlər edirlər... 

Amma onu deyim ki,  hazırda  bu 4 qruplaşmanın məqsədləri üst-üstə düşür: Azərbaycanda Türkiyənin, xüsusən Türk ordusunun   varlığına imkan verməmək. Çünki Türkiyə bütün parametrlərdə ölkəmizdə oturuşarsa, həmin güclərin hər birinin öz planlarını həyata keçirmək imkanları minimuma enəcək. Məhz buna görə sözügedən qruplaşmalar Azərbaycan daxilində güclərini birləşdiriblər. Odur ki, hazırda ABŞ da, Avropa da, hətta Suriyada müəyyən qədər  rəsmi Ankara ilə maraqları üst-üstə düşən Rusiya və İran da Türkiyənin Azərbaycanla, Qarabağla bağlı planlarının baş tutması üçün bütün vasitələri işə salıblar. Aralıq dənizi məsələsində Yunanıstanla yanaşı, daim İslam dünyasına satqınlığıyla seçilən Misir və Birləşmiş Ərəb Əmirlikılərini də Türkiyə üzərinə saldırıblar... 

 

Dediyim kimi, hazırda bu sadalanan qüvvələr Türkiyənin ayağını Azərbaycandan kəsmək ötrü birləşiblər. Və bizdə olan məlumata görə, bu məqsədlə yaxın bir ayda, bəlkə də sentyabrın sonunadək ölkəmizə qarşı nəsə genişmiqyaslı bir təxribat hazırlayırlar...

- Əsasən Ermənistan və Rusiyada, eləcə də İranda Azərbaycana qarşı aparılan informasiya müharibəsini  təhlil edəndə bu qənaətə gəlmək olur... Niyə məhz sentyabrın sonunadək olan bir müddətin nəzərdə tutulmasını hələlik müəyyən edə bilməmişik... Amma bütün hallarda  Türkiyənin, eləcə də Pakistanın Azərbaycanı dəstəkləməsi bunları həddindən artıq  narahat edir, qıcıqlandırır və özündən çıxarır... 

-Bəs sizcə, hazırda Azərbaycanda, o cümlədən hakimiyyət dairələrində Türkiyə ordusunun burada qalması ilə bağlı vahid mövqe formalaşıb ki, bu xarici düşmənlər belə həyəcan keçirirlər?..

(Davamı var)

Sultan Laçın