Məşhur türkiyəli aktrisa Bahar Öztan Moderator.az-a müsahibə verib:

- Çox sağ olun! Məndə sizə təşəkkür edirəm ki, vaxtınızı ayırıb, müsahibə alırsız. Türkiyədən qardaş Azərbaycana salam olsun!

- Azərbaycan haqqında çıxan xəbərləri hər zaman böyük maraqla izləyirəm. Əslində bu il ölkənizə gələcəkdim, xəstəliyimlə bağlı qaldı. Bir layihə üçün dəvət olunmuşdum. Qismət, çox sevirəm Azərbaycanı. Azərbaycanlı bir neçə insanla birlikdə çalışmışam.

- Sözün düzü üzdən bir neçəsini tanıyıram, amma adı ilə bilmirəm. Tanış olmaq istəyərəm, buna da qismət deyək.

- Hal-hazırda özümü yaxşı hiss edirəm, amma tam sağalmamışam. Saçlarımı kəsmişdim, artıq çıxıb. Mənə insanlar o qədər xoş sözlər yazdılar, dəstək oldular ki... (kövrəlir). Hamı mənim üçün dua edirdi. Həbsxanadan belə məktublar gəlirdi. Təbii ki, mən bütün bunları daha sonralar bildim. Sevildiyimi bilirəm, mən də onların sevgisinə layiq olmağa çalışıram.

- Xeyr, bu ləqəbi mənə rejissorlar yox, xalq verib. Mən televiziya reklamlarında oynamaqla aktrisalıq fəaliyyətimə başlamışam. Yadımdadır, ilk dəfə şampun reklamında çəkilmişdim. Bütün oynadığım reklamlarda gülürdüm və üzümün qəmzələri görünürdü. O vaxt hələ mən tanınmırdım, adımı bilmirdilər. Yəqin ki, soruşublar ki, bu qız kimdir? Heç kim tanımayıb deyə deyiblər ki, “Qəmzəli gözəl” (gülür). Mən bu addan məmnunam, xoşbəxtəm. 

- İlk dəfə “Şaşqın milyoner” filminə çəkilmişəm. O zamanlar mən model kimi dərgilərin üz qabığına çəkilirdim. Filmə dəvət gəldi və çəkildim. Daha sonralar bir-birinin ardınca mənə film təklifləri gəldi.

- O qədər xatirələrim var ki, bilmirəm hansını deyim?.. Allah Kamal Sunala rəhmət etsin. Mən onunla 3 filmə çəkilmişəm, özümə şanlı aktrisa deyə bilərəm. O filmdə bir səhnə var idi, suya girirdik, hava da çox soyuq idi. Su o qədər soyuq idi ki, mənim ayaqlarım donmuşdu. Dostlarımızdan biri məni qucağına alıb, tez isti bir evə qaçırdı. Bir neçə saat mənim isinməmi gözləmək məcburiyyətində qaldılar (gülür).

- Sənətçinin filmləri onun övladları kimidir. Çəkildiyim bütün filmlərimi sevirəm, ayrı-seçkilik etmirəm. O günlərin gündəminə görə çox da baxımlı filmlərə çəkilmişəm.

- O qədər çox dəvətlər gəldi ki.. Amma mənim buna vaxtım olmadı. Çünki bir film bitməmiş, digər filmə dəvət gəlirdi.

- Bir-iki filmimdə kaskadyorum olub. Amma indiki ağlım olsaydı bir çoxunda özüm yox, kaskadyorum oynayardı. Hətta 4-cü mərtəbədən də aşağı atlandığım filmlər olub (gülür). Bir dəfə də atdan yıxılmışam. Cüneyt Arkınla da bir neçə filmə çəkilmişəm. O mənə təhlükəli səhnələrdə köməklik edirdi. Hətta bir dəfə onunla qatarın üstündən də tullanmışdıq.

- Bizim vaxtımızda texniki  imkanlar çox zəif idi, amma bütün bunlara baxmayaraq filmlərimiz yaddaqalan olub. İndiki sənətçilər çox şanslıdır məncə. Çünki geyim daşımır, özləri qrim etmir. Biz o vaxt geyimlərimizi də özümüz daşıyırdıq, qrimi də özümüz edirdik. Çox çətinliklər çəkmişik.

- Bu mənim xəstəliyimlə bağlıdır. Həm də axı indi gənclərin dövranıdır. Biz vaxtilə çox çəkilmişik, qoy onlar çəkilsin. Nə vaxtsa mənə uyğun obraz olsa mütləq çəkilərəm.

- O vaxt sənətçilər tamaşaçılar üçün əlçatmaz idi. Yeşilçam filmlərində çəkilən aktrisalar müxtəlif restoranlarda səhnə alırdılar. Onlar bir növ tamaşaçıları ilə bir araya gəlirdilər. Burada sənin səsinin gözəl və güclü olması şərt deyildi. O vaxt restoranlarda yaxşı pul var idi, amma aktrisalıqdan o qədər də çox qazanmırdıq.

- O hələ universitetdə oxuyur. Özü hansı sənəti seçsə, mən də ona kömək edərəm. Amma böyük ehtimalla iş adamı olacaq (gülür).