“Ermənistanın mülki sakinləri atəşə tutması onun terrorçu və anti-insani mahiyyətindən xəbər verir”.
Bunu Moderator.az-a açıqlamasında Respublika Veteranlar Təşkilatının sədr müavini, polkovnik Cəlil Xəlilov bildirib. Cəlil Xəlilov qeyd edib ki, sentyabrın 27-dən etibarən Ermənistanın Azərbaycana məxsus bəzi yaşayış məntəqələrini intensiv şəkildə atəşə tutması müşahidə edilir ki, bu da işğalçı dövlətin beynəlxalq hüquq normalarına, habelə müharibə qaydlarına əməl etmədiyini göstərir:
“Bildiyiniz kimi, sentybarın 27-dən etibarən Azərbaycan ordusu tərəfindən həyata keçirilən uğurlu əks-hücum əməliyyatları bu gün də davam etməkdədir. Azərbaycan ordusunun sarsıdıcı zərbələr nəticəsində həm canlı qüvvə, həm də texnika baxımından böyük itkilər verən düşmən geri çəkilməkdə, döyüş mövqelərini qoyub qaçmaqdadır.
Bununla yanaşı, düşmən hazırkı məqamda belə təxribatlara əl atır, mülki vətəndaşlarımızı atəşə tutmaqla qeyri-insani xislətini, beynəlxalq hüquqa, ali bəşəri dəyərlərə zərrə qədər də olsun hörmət etmədiyini ortaya qoyur. BMT-nin Qarabağla bağlı 4 qətnaməsinin heç birini icra etməyən Ermənistan, mülki insanları atəşə məruz qoymaqla yeni-yeni cinayətlərə imza atır. Lakin Ermənistan bilməlidir ki, Azərbaycan ordusu erməni faşizminin layiqli cavabını verəcək, onu etdiyi hər bir cinayətə, vəhşiliyə görə cəzalandıracaqdır.
Bu gün bütün xalqımızın ordumuz və ali baş komandanımız ətrafında sıx birliyi, minlərlə gəncin hərbi əməliyyatlarda könüllü şəkildə iştirak etməklə bağlı əlaqədar dövlət qurumlarına müraciət etməsi, Azərbaycan xalqının yüksək əhval-ruhiyyəsindən, mübarizə əzmindən xəbər verir. Bu gün mən də daxil olmaqla, hər bir ailə başçısı övladının ön xətdə olmasından, düşmənə qarşı aktiv hərbi əməliyyatlarda iştirakından fəxr və iftixar hissi keçirir. Düşmən bilməlidir ki, onun tamamilə darmadağın olacağı, Azərbaycan ordusunun mərhəmətinə möhtac olacağı gün uzaqda deyil.
Onu da qeyd edim ki, Ermənistanın terrorçu mahiyyəti, onun yalnız Azərbaycan üçün deyil, bölgədəki hər bir dövlət üçün təhdid və təhlükə mənbəyi olması, region dövlətəri tərəfindən də dərk edilməlidir. Onlar anlamalıdırlar ki, qonşu dövlətlərə qarşı davamlı şəkildə ərazi iddiaları irəli sürən, öz ərazisini qlobal terror təşkilatlarına açan, dünya terrorizminə ev sahibliyi edən Ermənistan, onlar üçün də böyük təhlükədir. Odur ki, bölgə dövlətləri də Azərbaycanın haqq işini tam şəkildə müdafiə etməli, terrorçu Ermənistana təzyiq göstərməklə onun neytrallaşdırılmasına nail olmalıdır. Bölgəmizdə sülhü və təhlükəsizliyi təmin etməyin yeganə yolu budur”.
Seymur ƏLİYEV