“Türkiyə öz əməlləri ilə Azərbaycana qardaş olduğunu bir daha sübut etdi”

Artıq 18 gündür ki, xalqımızın apardığı Vətən Müharibəsi davam edir.

Moderator.az olaraq millət vəkili Cavid Osmanovla söhbətimizdə işğaldakı vətən torpaqlarının azad ediməsinə, Qarabağın erməni ordusu və terror dəstələrindən təmizlənməsinə, ölkəmizin ərazi bütövlüyünün təmin olunmasına xidmət edən bu müqəddəs müharibə ilə bağlı bəzi məqamları şərh etməyə, fərqli nüanslardan dəyərləndirməyə çalışdıq.

-Cavid müəllim, cari ilin 27 sentyabr tarixindən etibarən Ermənistan Silahlı Qüvvələri Azərbaycanın bir sıra şəhərlərini atəşə tutmaqda, mülki insanları, yaşayış məntəqələrini hədəf seçməkdədir. Düşmənin dinc əhalini raket zəbələrinə məruz qoyması hərb meydanında məğlub olan və ciddi zərbələr alan Ermənistanın acizliyi ilə yanaşı, həm də öz məğlubiyyətini dolayısı ilə etiraf etməsi kimi qiymətləndirilə bilərmi?

-Təbii. Məlum olduğu kimi, 27 sentyabr tarxində düşmənin bütün cəbhə xətti boyu törətməyə çalşdığı irimiqyaslı təxribatın qarşısı Ali Baş Komandan İlham Əliyevin rəhbərlik etdiyi Azərbaycan ordusu tərəfindən rəşadətlə alındı və iki həftəlik döyüşlər nəticəsində ordumuz bir rayon mərkəzini – Cəbrayıl şəhərini, 33 kənd və qəsəbəni, bir sıra strateji yüksəklikləri işğaldan azad etdi. Qısa müddət ərzində ordumuz düşmənə ciddi zərbələr vurdu. Müdafiə Nazirliyinin verdiyi məlumatlarda düşmənin həm texnika, həm də canlı qüvvə baxımından böyük itkilərə məruz qaldığı öz əksini tapıb. Baxmayraq ki, düşmən bütün vasitələlrə öz itkilərini gizlətməyə çalışır. Lakin bu itkilərin miqyası o qədər böyükdür ki, onları gizlətmək, ört-basdır etmək mümkün deyil.

Ermənistan daxilində ciddi sarsıntıların yaşandığı hər kəsə məlumdur. Həm iqtisadi, həm sosial, həm də siyasi baxımdan düşmən ölkədə vəziyyət 27 sentyabr tarixinə qədər də kifayət qədər acınacaqlı idi. 27 sentyabr hadisələrindən günümüzə qədər isə Ermənistanın hərb meydanında ardıcıl məğlubiyyətə uğraması, rəsmi İrəvanın narahatlığını ikiqat artırıb.

Aktiv hərbi əməliyyatların elə ilk günündən düşmən hərbçilərimizlə yanaşı, mülki insanlarımızı da hədəfə almağa cəhd etdi. Ilk növbədə cəbhə bölgəsindəki yaşayış məntəqələrini, daha sonra isə cəbhədən yüz kilometrlərlə uzaqda olan şəhərləri – Gəncəni, Yevlaxı, hətta Xızı və Abşeronu da hədəfə aldı. Bu, Azərbaycan ordusunun qalibiyyətinə, onun gücünə tab gətirməməkdən irəli gələn bir hadisədir və Ermənistanın miskinliyini göstərir.

-Cavid müəllim, düşmən mülki insanları hədəf seçməklə daha hansı məqsədlərə nail olmağa çalışır?

-Mülki insanları hədəf almaqla Ermənistanın hərbi-siyasi rəhbərliyi bir daha özünün nə qədər çirkin, vandal, barbar, faşist xislətli olduğunu ortaya qoydu. Mülki insanlara “Skat” raketləri ilə zərbə endirmək Xocalı soyqırımından sonra xalqımıza qarşı həyata keçirilən ikinci soyqırım idi. Ermənilər mülki insanları hədəf seçməklə xalq arasında bir təşviş, bir həyəcan yaratmağa çalışırdı. Düşmən Xocalı soyqırımı zamanı da xalq arasında təşviş, panika yaratmağa cəhd etmişdi. Azərbaycan xalqı hər zaman mərd xalq olub. Lakin indikindən fərqli olaraq, 90-cı illərin Qarabağ müharibəsində Azərbaycanı irəli aparan, onun düşmən üzərində uğrulu mübarizəsini təmin edən sərkərdəmiz yox idi. Bu gün isə belə bir sərkərdəmiz var və bu, Azərbaycan Respublikasının Prezidenti, Ali Baş Komandanımız cənab İlham Əliyevdir. Xatırladım ki, İlham Əliyev bu günlərdə bildirmişdi ki, nəyi nə vaxt və nə cür etmək lazım gəldiyini bilirik.

Ermənilərin bu kəs xalq arasında təşviş, panika yaratmaq cəhdləri səmərə vermir. Çünki nə indiki sərkərdəmiz o sərkərdədir, nə Azərbaycan o Azərbaycandır. Azərbaycan bütün parametrlər üzrə, o cümlədən hərbi baxımdan  düşməndən qat-qat üstündür və bu üstünlük göz qabağındadır.

-Ermənistanın istər 90-cı illərin əvvəllərində, istərsə də cari ilin 27 sentyabr tarixindən sonra mülki insanları hərbi zorakılığa məruz qoyduğu, bununla da müharibə cinayətləri törötdiyi məlumdur. Sizcə Qarabağ problemi öz qəti həllini tam olaraq tapandan sonra belə xalqımıza qarşı soyqırım cinayətlərində iştirak edən şəxslərin müəyyənləşdirilərək beynəlxalq məhkəməyə, hərbi tribunal qarşısına çıxarılması təmin olunmalıdırmı?

-Bildiyiniz kimi, müharibənin də öz qanunları var və istənilən müharibədə mülki insnaları hədəf almaq birbaşa hərbi cinayət deməkdir. Sentyabrın 27-dən – Vətən Müharibəsinin ilk günündən görürük ki, Ermənistan mülki əhalini hər gün hədəfə alır. Hər gün də Azərbaycan Respublikası Baş Prokurorluğunun bu məsələ ilə bağlı müvafiq açıqlamalarına, yeni cinayət işləri açmağına şahid oluruq.

Xalqımıza qarşı hərbi cinayət törədən şəxslərin beynəlxalq hüquqi müstəvidə cavab verməsi vacibir. Bu baxımdan Ermənistanın hazırkı hərbi-siyasi hakimiyyətinin qanun qarşısında cavab verməsi üçün ölkəmizin gələcəkdə lazımi addımlar atacağı gözləniləndir və hesab edirəm ki, biz öz məqsədimizə nail olacağıq.

-Həm Azərbaycan, həm də Türkiyə telekanallarında düşmən hərbi komandanlığının erməni əsgərlərinin qaçmasının qarşısını almaq üçün onları əllərindən və ya ayaqlarından dəmir dirəklərə, yaxud bir-birinə zəngirləməsi ilə bağlı çoxsaylı görüntülər yer almaqdadır. Sizcə düşmənin ordumuza qarşı zəngirlənmiş əsgərlərlə müqavimət göstərmək istəyi əslində erməni ordusundakı acınacaqlı mənəvi-psixoloji durumun, sıfıra bərabər əhval-ruhiyyənin göstəricisi sayıla bilərmi?

-Şübhəsiz. 2016-cı ilin aprel döyüşlərindən sonra erməni ordusu məğlubiyyətə məhkum olduğunu dərk etdi. Son iki həftəlik döyüşlərdə də Azərbaycan ordusunun nə qədər güclü, nə qədər yenilməz olduğunu düşmən əsgərləri gördü. Artıq düşmən də yaxşı başa düşür ki, onların apardığı müharibə haqqa, ədalətə qarşı aparılan müharibədir və məğlubiyyətə məhkumdur. Bu gün Azərbaycan öz torpaqlarında anti-terror əməliyyatı aparır.

Ermənistan ordusunda bu cür olayların baş verməsi təsadüfi deyil. Erməni ordusu dəfələrlə döyüş meydanında Azərbaycan ordusunun qarşısından qaçıb. Bu gün baş verən hərbi əməliyyatlara nəzər salsaq maraqlı və təsirli bir mənzərə ilə qarşılaşmış olarıq. Bir tərəfdə işğaldakı torpaqlarını azad etmək üçün əzmlə mübarizə aparan, şəhidliyə sevə-sevə üz tutan Azərbaycan əsgəri dayanır. Hansı ki, əsgərlərimizin yeganə məqsədi işğaldakı torpaqları azad etmək, erməni vandallarını bu torpaqlardan qovmaqdır. Digər tərəfdə isə qorxaq, cılız və azğınlaşmış erməni əsgəri dayanır. Bu baxımdan qeyd etdiyiniz kimi, düşmən ordusunda qaçmasınlar deyə erməni əsgərlərinin qandallanması, zəngirlənməsi adi hala çevrilməkdədir. Bu, Ermənistanın hazırkı hərbi-siyasi rəhbərliyinin həm də öz xalqına qarşı çoxsaylı cinayətlərindən biridir.

-Cavid müəllim, son iki həftədir ki, Ermənistan ordusunda qadınların, yaşlıların ordu sıralarına cəlb edilməsi halları kəskin şəkildə artmaqdadır. Ermənistanın canlı qüvvə çatışmazlığını qadınlar və yaşlılar hesabına ortadan qaldırmağa cəhd etməsi, öz ümidini buna bağlaması nə dərəcədə məntiqlidir?

-Erməni qadınlarının hərbi xidmətə cəlb edilməsi Ermənistan ordusunun verdiyi çoxsaylı itkilərlə bağlıdır. Bununla bağlı erməni qadınlarına da bir çağırış ünvanlandı. Hətta qadınlardan ibarət kiçik bir batalyon da yaratdılar. Hazırda Ermənistan 60 yaşındakı insanları belə müharibəyə cəlb edir, insan resursu çatışmazlığını bu yolla aradan qaldırmağa çalışır. Bunun özü də öz xalqını bilərəkdən məhvə aparmaqdır və növbəti cinayətdən biridir. Bu addımlar bir daha göstərir ki, Ermənistan tükənməkdədir və rəsmi İrəvan Azərbaycan xalqı ilə yanaşı, öz xalqına qarşı da vandallığını davam etdirir.

-Vətən Müharibəsinin başlanması ilə müxtəlif dövlət və özəl qurumlar, o cümlədən iş adamları, sıravi vətəndaşlar həm Silahlı Qüvvələrə Yardım Fonduna, həm cəbhəyə gedənlərin ailəsinə çoxsaylı yardımlar edib və bu tendensiya bu gün də davam etməkdədir. Sizcə bu müstəvidə baş verənlər xalq-ordu, xalq-dövlət birliyinin, həmrəyliyinin mövcud durumu haqqında nə deyir?

-Bu gün Azərbaycan xalqı heç vaxt olmadığı qədər birlik, həmrəylik nümayiş etdirməkdədir. Hər bir soydaşımız, o cümlədən respublikadan kənarda yaşayan soydaşlarımız Ali Baş Komandanın ətrafında sıx birləşib. Hesab edirəm ki, Azərbaycan xalqı hələ heç vaxt bu qədər həmrəy olmayıb. Bu, bizim qələbəmizin, uğurlarımızın əsasını təşkil edir. Ölkə başçımızın ətrafında xalqın bu cür birlik sərgilməsi, bir daha prezidentimizə olan inamın, etibarın və etimadın təzahürüdür. Bu birlik heç vaxt sarsılmayacaq. Bütün dünya dövlətləri xalqımızın həmrəyliyini, ölkənin birinci şəxsinin ətrafında sıx birliyini görür və çox güman ki, belə bir birliyi özlərində də görməyi arzu edirlər.

-Vətən Müharibəsinin ilk günündən Azərbaycana ən çox dəstək verən ölkə Türkiyə oldu və bu mənəvi-diplomatik dəstək bu gün də davam edir. Sizcə indiki həssas məqamda Türkiyənin bu dəstəyi Azərbaycan üçün nə dərəcədə önəmlidir və bu dəstək xalqımızın, dövlətimizin haqq səsinin beynəlxalq aləmə çatdırılmasına da öz müsbət təsirini göstərirmi?

-Türkiyə 27 sentyabr tarixindən etibarən həm ölkə başısı və hökumət, həm də xalq olaraq Azərbaycana birmənalı dəstək verdi, onun haqq işini müdafiə etdiyini, alqışladığını bəyan etdi. Baş verənlər bir daha ulu öndər Heydər Əliyevin “Bir millət iki dövlət” şüarının nə qədər haqlı olduğunu göstərdi. Türkiyə özünün Azərbaycana ən yaxın tərəfdaş, dost və qardaş olduğunu təsdiqlədi.

Türkiyə ölkəmizə sadəcə siyasi-diplomatik sahədə deyil, informasiya müstəvisində də ciddi dəstək verməkdədir. Türk telekanallarının həm cəbhə xəttində aktiv fəaliyyəti, döyüşləri canlı şəkildə ictimaiyyətə təqdim edilməsi, həm prezident İlham Əliyevlə silsilə müsahibələrin götürülməsi, Azərbaycanın haqq səsinin dünyaya yayılması, xalqımızın haqq, ədalət uğrunda apardığı Vətən müharibəsinin mahiyyətinin beynəxalq aləmə çatdırılmasında mühüm rol oynamaqdadır. Uutmaq olmaz ki, müharibə yalnız səngərdə getmir. Müharibə həm də mediada, diplomatiya müstəvisində gedir.

Təəssüflər olsun ki, 27 sentyabr tarixindən etibarən biz bəzi dövlətlrin ədalətsiz mövqeyinə, ölkəmizə təzyiq göstərmək cəhdlərinə də şahid olduq. Bütün bu təzyiqlərə cənab İlham Əliyev əzmlə sinə gərdi və bu gün də gərməkdədir. Eyni zamanda, Türkiyənin prezidentindən tutmuş, sadə vətəndaşına kimi hər kəsin Azərbaycanı birmənalı şəkildə müdafiə etməsi, Azərbaycana hər cür dəstək verməyə hazır olduqlarını bəyan etməsi, beynəlxalq təzyiqlərə adekvat cavab vermək baxımından da atılan önəmli addımlardır. Türkiyə Azərbaycana həm mənəvi, həm diplomatik, həm də informasiya baxımından ciddi dəstək verdi və bu dəstək açıq şəkildə hiss edilməkdədir. Türkiyə öz əməlləri ilə Azərbaycana əsl qardaş olduğunu sübut etdi. Bizim də mövqeyimiz Türkiyəyə münasibətdə qardaş mövqeyidir. Xatırlayırsınızsa, Yunanıstanın ölkəmizə yeni akreditasiya olunan səfirini qəbul edərkən, prezident İlham Əliyev öz mövqeyini açıq şəkildə bəyan etdi və bildirdi ki, Azərbaycan istənilən halda Türkiyənin yanındadır və onun haqlı mövqeyini müdafiə edir. Bütün bu baş verənlər Azərbaycan və Türkiyənin nə qədər dost, nə qədər yaxın qardş olduğunu sübut edir və göstərir ki, həqiqətən də dünyada ikinci belə bir nümunə mövcud deyil.

Seymur ƏLİYEV