Azərbaycanın hüquq-mühafizə orqanları mütəmadi şəkildə əhalini terror təhlükəsi ilə bağlı xəbərdar etməkdə, onları ayıq-sayıqlığa səsləməkdədir.

Şübhəsiz, ordumuzun ön xətdə məkirli düşmənə qarşı qəhrəmancasına savaşdığı, ona ağır zərbələr vurduğu bir zamanda, hər bir vətəndaşımızın arxa cəbhədə ayıq-sayıq olması vacibdir. Bu, düşmənin məkirli məqsədinin zamanında ifşa edilməsi, onun çirkin niyyətinin qarşısının vaxtında alınması baxımından mühüm əhəmiyyət kəsb edir.

Onu da xatırladaq ki, rəsmi qurumların elan etdiyi xəbərdarlıqlardan təşvişə düşməyə lüzum yoxdur. Vətəndaşlardan sadəcə diqqətli olmaq, hər bir ehtimalı nəzərə almaları tələb olunur.

Maraqlıdır, ictimai nəqliyyatın da kütləviliyin və terror ehtimalının yüksək olduğu yerlər olduğunu nəzərə alsaq, avtobuslardan istifadə edən sərnişinlərimiz hansı məqamlara diqqət yetirməsi vacibdir?

Moderator.az-a açıqlama verən hüquqşünas, yol-nəqliyyat məsələləri üzrə ekspert Ərşad Hüseynov kütləviliyin çox olduğu bütün məkanlar kimi, avtobuslarda da diqqətli olmağın vacib olduğunu qeyd etdi:

“Bu məsələ ictimai təhlükəsizliyin çox önəmli bir hissəsidir. Bunun sırf nəqliyyatla xüsusi bağlılığı yoxdur. Amma dünya təcrübəsi və təəssüf ki, Azərbaycanın da 1988-ci ildən bəri keçdiyi yol göstərir ki, mənfur düşmən bir qayda olaraq belə məqsədlər üçün insnaların kütləvi olduğu yerləri seçirlər. Adətən bura o yerlər olur ki, orada həm kütləvilik olur, həm də bu yerlərə nəzarət çətin və mürəkkəb olur.

Elə yerlər var ki, ora xüsusi nəzarət altındadır. Orada həm texniki, həm də insan nəzarəti var. Amma elə yerlər də var ki, orada kütləvilik olsa da, məxsusi yoxlamalar keçirilmir və ya bu cür yoxlamalar keçirmək çətindir. Terrorçular adətən nəzarətin zəif və ya çətin olduğu yerləri seçir.

Dövlət qurumlarımızın vətəndaşlara etdiyi xəbərdarlıqlarda vahiməli, dəhşətli heç nə yoxdur. Sadəcə olaraq, bu, profilaktiki bir tədbirdir və insanlara xatırladılır ki, onlar hər zaman hər yerdə diqqətli olmalıdır.

Insanların çox olduğu yerlərdən biri ictimai nəqliyyatdır. Vaxtiylə düşmən Ağdam-Gəncə avtobusunda terror aktı törətmişdi. Bakı metrosunda da illər öncə terror aktı həyata keçirilib. Buna görə də sadəcə ictimai nəqliyyatda deyil, avtobus dayanacaqlarında, ticarət obyektləri və onun ətrafında, ictimai iaşə obyektlərində və s. diqqətli olmaq lazımdır. Əgər hər hansı bir şəxsin davranışları, daşıdığı və ya harasa qoyduğu əşya şübhəli görünürsə, o zaman dərhal hüquq-mühafizə orqanlarına məlumat verilməlidir.

Ictimai nəqliyaytda avtobus sürücülərinin də ayıq-sayıq olması vacibdir. Ictimai nəqliyyatda müəyyən xətlər üzrə səlahiyyətli şəxslər – dispetçer, kalon rəisi və s. olur. Onlar da ayıq-sayıq olmalı, sürücüləri daim diqqətli olmağa səsləməlidirlər. Bakıdakı avtobusların bir çoxunda kameralar mövcuddur. Bu kameralara nəzarət edən şəxslər də gözlərini qırpmadan avtobusda baş verənləri izləməlidir. Məsələn, əgər avtobusdakı hər hansı bir sərnişin görsə ki, kimsə bir əşyanı qoyub düşdü, yaxud bir əşyanı avtobusun bir tərəfinə qoyub özü digər tərəfə keçdi, o zaman ona dərhgal reaksiya vermək lazımdır. Burada utanmalı, çəkinməli heç nə yoxdur”.

Seymur ƏLİYEV