“Prezident və I vitse-prezident tərəfindən atılan addımdan hər birimiz nümunə götürməliyik”
27 sentyabr səhər saatlarından etibarən ordumuzun həyata keçirdiyi uğurlu əks-hücum əməliyyatı davam etməkdədir.
Moderator.az olaraq millət vəkili Siyavuş Novruzovla söhbətimizdə müqəddəs Vətən Müharibəsi, bu müharibənin görünən və görünməyən tərəfləri, habelə ordumuzun və xalqımızın bu müharibədə göstərdiyi fədakarlıqları dəyərləndirməyə çalışdıq.
-Siyavuş bəy, artıq bir neçə həftədir ki, hərbi əməliyyatlar davam edir. Sizcə ordumuzun qısa zamanda bir sıra yaşayış məntəqələrini, kənd və şəhərləri düşmən işğalından azad etməsi Azərbaycan Silahlı Qüvvələrinin gücü haqqında nə deyir?
-27 sentyabr səhər satlarından etibarən ordumuzun həyata keçirdiyi uğurlu əks-hücum əməliyyatı Azərbaycan Silahlı Qüvvələrinin gücündən, onun qüdrətindən xəbər verir. Ordumuzun həm texniki təchizatı, həm döyüş qabiliyyəti, həm nizam-intizamı, həm də döyüş ruhu çox yüksəkdir.
Ali Baş Komandan dəfələrlə Ermənistana xəbərdarlıq edərək düşməni təxribatlardan əl çəkməyə səsləmişdi. Azərbaycan tərəfi problemin sülh yolu ilə həllinə nail olmaq üçün bütün addımları atdı. Əfsuslar olsun ki, Ermənistan bu çağırışlardan nəticə çıxarmadı. Nəticədə, Azərbaycan tərəfi düşmənin təxribatlarını dəf etmək üçün əks-hücum əməliyyatı həyata keçirməli oldu.
Onu da qeyd edim ki, hakimiyyət-xalq, xalq-ordu birliyi ordumuzun qələbəsinə təsir göstərən əsas amillər sırasındadır. Bu gün Azərbaycan 90-cı illərin Azərbaycanı deyil ki, hərənin bir batalyonu olsun. AXCP-Müsavat dönəmindəki vəziyyət deyil ki, bir batalyon hücuma keçəndə, digəri geri çəkilsin. Indi ölkəmizdə güclü ordu və vahid komandanlıq mövcuddur. Bu gün Azərbaycan xalqı Azərbaycan ordusunun, Ali Baş Komandanın yanındadır və ordumuz qısa zamanda işğaldakı bütün torpaqları azad edəcək.
-Siyavuş bəy, müharibənin gedişatında Azərbaycana dəstək verən dövlətlərlə yanaşı, qərəzli bəyanatlarla çıxış edən beynəlxalq təşkilat və siyasi liderlər də oldu. Bu baxımdan Vətən Müharibəsini dövlətimizin dost və düşmənlərini bizə daha dərindən tanıdan tarixi bir olay kimi də xarakterizə etmək mümkündürmü?
- Təəssüflər olsun ki, dünya mediasına nəzər salanda görürük ki, bəzən dəfələrlə ölkəmizdə olan, xalqımızın, dövlətimizin apardığı mübarizənin haqq işi olduğunu bilən bəzi şəxslər də, bu müddət ərzində qərəzli, həqiqətə zidd olan fikirlər səsləndirdi, bəyanatlar verdi. Hərbi müstəvidə gərginləşən vəziyyət fonunda biz müxtəlif dövlətlərdən tutmuş tək-tək adamlara, media nümayəndələrinə, siyasətçilərə, diplomatlara qədər hər bir fərdin hansı mövqe nümayiş etdirdiyinə şahid olduq, kimin kim olduğunu bir kəs daha gördük. Bu baxımdan ölkəmizə qarşı qərəzli mövqe tutan, onun haqqında yalan məlumatlar yayan şəxslərin, eləcə də əcnəbi jurnalistlərin ölkəmizə girişinin əngəllənməsi, onların adlarının “qara siyahı”ya salınması təklifini dəstəkləyirəm. Hesab edirəm ki, onların hər birinə layiq olduğu münasibət göstərilməli, layqi olduqları cavabı verməliyik.
Həmçinin, hesab edirəm ki, Vətən Müharibəsinin gedişatında həqiqətən də dostlarımızla düşmənlərimizi daha yaxşı tanımış olduq.
-Bəzi dövlət və qurumların işğalçıya dəstək verdiyi sirr deyil. Sizcə işğalçıya dəstək vermək onun törətdiyi cinayətlərə də ortaq olmaq demək deyilmi?
-Təbii ki, Azərbaycan torpaqlarını işğal edən, uzun illərdir ki, bu torpaqları işğal altında saxlayan, bu gün də ölkəmizə qarşı yalan və böhtan siyasətini davam etdirən Ermənistana hər hansı dəstəyin verilməsi yolverilməzdir. Sentyabrın 27-dən etibarən Ermənistanın Azərbaycanın bir sıra şəhərlərini raket atəşinə məruz qoyması, onlarla mülki vətəndaşımızı qətlə yetirməsi hamıya məlumdur. Beynəlxalq təşkilatların, aparıcı dövlətlərin bu günə qədər Ermənistana ciddi təzyiq göstərməməsi, üzləşdiyi cəzasızlıq mühiti düşmənin bu cür azğınlaşmasına səbəb olub. Odur ki, bu gün işğalçıya dəstək verənlərin məsuliyyət payı Ermənistandan daha böyükdür. Bu gün baş verənlərə görə Ermənistanla yanaşı, onlar da məsuliyyət daşıyır. Lakin hər kəs bilməlidir ki, heç bir qüvvə Azərbaycanın öz haqq işi uğrunda apardığı mübarizəyə əngəl ola, onu bu mübarizədən çəkindirə bilməz. Qarabağ əzəli Azərbaycan torpağıdır və Azərbaycan işğaldakı hər qarış torpağını azad edənə qədər öz mübarizəsini davam etdirəcək.
-Vətən Müharibəsinin ilk günlərindən etibarən Silahlı Qüvvələrə Yardım Fonduna orduya dəstək məqsədi ilə çoxsaylı ödəmələr həyata keçirilməkdədir. Sizcə bu gün orduya dəstək məqsədi ilə bu cür ödəmələrin, ianələrin həyata keçirilməsi Silahlı Qüvvələrimizə maddi və mənəvi dəstək baxımından nə dərəcədə əhəmiyyətlidir?
-Bu gün orduya dəstək olduqca vacibdir. Hazırda Azərbaycan ordusu uğurlu hərbi əməliyyatlar aparmaqda, işğaldakı torpaqları azad etməkdədir. Hər kəs bu məsələdə əlindən gələni əsirgəməməlidir. Kimi könüllü şəkildə hərbi əməliyyatlara qoşulmaqla, kimi maddi vəsaiti ilə orduya dəstək verməklə öz köməkliyini göstərməlidir. Silahlı Qüvvələrə Yardım Fonduna edilən ödənişlərlə bağlı tam şəffaflıq var.
Xatırlayıram ki, vaxtiylə iki belə fond var idi. AXCP-Müsavat vaxtındakı bu fondlardan biri Ləl-Cəvahirat Fondu idi, digər isə Orduya Yardım Fond idi. Oraya daxil olan vəsaitlərin əksəriyyəti o vaxt müxtəlif şəxslər tərəfindən mənimsənildi, dağıdıldı. Kimin fonda nə verdiyi də qeyd edilmirdi. Ləl-Cəvahirat Fondunda AXCP hökuməti süqut edəndə demək olar ki, heç nə qalmamışdı. Indi isə şəffaf şəkildə kimin fonda nə köçürüldüyü qeyd olunur. Koronavirus dövründə hər kəsin etdiyi yardım bir-bir qeyd olundu, internetdə yerləşdirildi.
Silahlı Qüvvələrə Yardım Fonduna ianələrin köçürülməsi çox humanist bir addımdır. Prezident tərəfindən, I vitse-prezident tərəfindən atılan bu addımdan hər birimiz nümunə götürməliyik. Orduya yardım hərtərəfli olmalıdır. Kimin gücü nəyə çatırsa, orduya dəstək verməlidir. Hər kəs işğaldakı torpaqlarımızın azad edilməsi üçün öz səyini göstərməli, öz töhfəsini verməlidir.
Məlum olduğu kimi, bizim müxtəlif ölkələrdə yaşayan imkanlı soydaşlarımız var. Bu gün elə bir məqamdır ki, onlar da bu prosesə qoşulmalı, orduya dəstək işində yaxından iştirak etməlidirlər. Xüsusilə də, Rusiayda, Ukraynada, post-sovet məkanında sahibkarlıq fəaliyyəti ilə məşğul olan insanlarımız var ki, onların kifayət qədər maddi vəsaiti var. Kimin gücü nəyə çatırsa, bu addımı atmalı, Silahlı Qüvvələrə Yardım Fonduna ianələr etməklə, Azərbaycan ordusuna öz dəstəklərini göstərməlidir. Əminəm ki, daxildəki vətəndaşlarımız kimi, ölkə xaricindəki soydaşlarımız da proseslərdə yaxından iştirak edəcək, Azərbvaycan ordusunun qələbələrinə öz töhfələrini verəcəkdir.
Düşmən bilməlidir ki, hər bir azərbaycanlı ordusunun, dövlətinin yanındadır və son qələbəyə qədər öz mübarizəsini davam etdirəcək.
-Mənəvi Dəyərlərin Təbliği Fondu xaricdə yaşayan soydaşlarımızın müraciətlərini nəzərə alaraq, “Şəhid ailələrinə dəstək” ianə kampaniyasına başlayıb. Belə ki, bundan sonra xaricdə yaşayan azərbaycanlılar şəhid ailələrinə dəstək məqsədilə Fondun xarici valyutada olan bank hesablarına ianə köçürə bilərlər. Mənəvi Dəyərlərin Təbliği Fondunun bu təşəbbüsünü necə qiymətləndirirsiniz?
-Ilk öncə, bütün şəhidlərimizə Allahdan rəhmət diləyirəm. Yaralanan hərbçilərimizə isə şəfa arzulayıram.
Hərbçilərimizin, şəhidlərimizin ailələrinin xidmətində durmaq, onlara maddi-mənəvi dəstək vermək hər birimizin borcudur. Yeni Azərbaycan Partiyası tərəfindən Gəncədə erməni terroru nəticəsində həlak olan mülki şəxslərin ailə üzvlərinə maddi yardım göstərilib. Valideynləri düşmənin raket həmləsindən həlak olan uşaqlar himayəyə götürülüb. Onlara yetkinlik yaşına çatana qədər təqaüd veriləcək.
Bu gün hər bir təşkilat, hər bir qurum bu məsələdə aktiv olmalıdır. Xaricdə yaşayan soydaşlarımızın da bu prosesdə aktivliyi arzuediləndir. Ola bilsin ki, xaricdəki hansısa soydaşımız yaşadığı ölkənin vətəndaşıdır. Lakin onun milliyyəti azərbaycanlıdır. O, xarici ölkə vətəndaşı olduğu üçün gəlib orduda xidmət edə bilmir. Ancaq onlar vətəndaşı olduqları ölkədə də dövlətimizə, ordumuza maddi yardım vasitəsi ilə öz dəstəyini göstərə bilər. Bununla da hər hansı şəhid ailəsinin maddi baxımdan təminatına kömək edə bilər.
Təbii ki, dövlətimiz güclüdür. Bu gün Ali Baş Komandanıızın rəhbərliyi altında çox böyük işlər gedir. Bu günə qədər şəhid ailələrinə, əllillərimizə, müharibə veteranlarınıza, məcburi köçkünlərimizə dövlətimiz çox böyük dəstək verib, onlara kömnək edib. Onların mənzil-məişət şəraiti yaxşılaşdırılıb, təqaüdləri artırılıb, ali məktəblərdə təhsil alan şəhid və məcburi köçkün uşaqları təhsil haqqından azad edilib. Dövlətimiz onların təhsil haqqının ödənilməsini öz üzərinə götürüb. Bütün bunlarla yanaşı, hər bir vətəndaşımız, təşkilat çalışmalıdır ki, əlindən gələni əsirgəməsin.
Təbii ki, şəhid olan hər hansı bir vətəndaşımızın yoxluğunu unutdurmaq mümkün deyil. Şəhid bütün xalqın şəhididir. O, bir ailəyə mənsub deyil. Bununla yanaşı, şəhid ailələrinə həm maddi, həm də mənəvi dəstəyin göstərilməsi olduqca vacib amildir.
Hesab edirəm ki, Mənəvi Dəyərlərin Təbliği Fondunun atdığı bu addım çox yaxşı, təqdiredici bir addımdır. Ölkəmizin xaricdə - Rusiyada, Ukraynada, Orta Asiyada, Avropanın müxtəlif ölkələrində, eləcə də ABŞ-da kifayət qədər ciddi maliyyə vəsaitinə malik insanları var. Onlar da şəhid ailələrinə yardım məsələsində yaxından iştirak etməlidir.
- Yeni Azərbaycan Partiyası Gəncədə erməni terroru nəticəsində valideynlərini itirən uşaqları himayəyə götürdüyünü, onlara maddi yardım göstərdiyini vurğuladınız. Sizcə digər partiya və təşkilatların, müəssisə və birliklərin də Yeni Azərbaycan Partiyasının bu təşəbbüsünə qoşulması nə dərəcədə arzuediləndir?
-Bir çox partiya var ki, onların maddi imkanı yüksək deyil. Bu səbəbdən də onların mənəvi dəstək göstərməsi də kifayətdir.
50 partiya Azərbaycan Respublikasının Prezidentinin, Ali Baş Komandanının həyata keçirdiyi hərbi siyasətlə bağlı öz dəstəyini ifadə etdi. Gəncədə, Tərtərdə mülki insanlarımıza qarşı erməni terroristləri tərəfindən törədilən cinayətlərin dünya ictimaiyyətinə çatdırılması məqsədi ilə də bu partiyalar beynəlxalq təşkilatlara müraciət ünvanladı.
Əgər hansısa siyasi partiyanın belə bir imkanı varsa, maddi dəstək göstərə bilər. Imkanı yoxdursa, verdiyi mənəvi dəstəyin özü də böyük əhəmiyyət kəsb edir.
Müəssisələrə gəlincə, hansı müəssisənin maddi yardım göstərmək imkanı varsa, o, bu dəstəyi göstərə bilər. Biz koronavirusla mübarizə fonunda da müəssisələrin, təşkilatların bu sahədəki aktivliyinə şahid olduq. Gördük ki, müəsisələrimiz, iş adamlarımız koronavirusla mübarizə məqsədi ilə böyük vəsaitlər köçürdü.
Milli Məclis orduya dəstək məqəsdi ilə böyük miqdarda vəsait köçürdü. Digər təşkilatlarımız da bu sahədə iş aparır. Bütün bunlar isə Azərbaycan xalqının həmrəyliyindən, dövlətimiz, Ali Baş Komandanımız ətrafında sıx birliyindən xəbər verir.
Seymur ƏLİYEV