“Ermənistanın muzdluların, terrorçuların ümidinə qalması, onun acınacaqlı vəziyyətindən xəbər verir”
Ordumuzun işğalçı Ermənistan ordusuna qarşı uğurlu əməliyyatları davam edir. Döyüş meydanında ağır itkilər verərək geri çəkilməli olan düşmən mütəmadi şəkildə dinc insanları, yaşayış məntəqələrini raket zərbələrinə məruz qoyur ki, bu da rəsmi İrəvanın qeyri-insani mahiyyətini göstərməklə yanaşı, onun nə qədər ümidsiz və çarəsiz vəziyyətdə olduğunu əks etdirir
Moderator.az olaraq millət vəkili Nəsib Məhəməliyevlə söhbətimizdə bu və digər məsələləri şərh etməyə çalışdıq:
-Nəsib bəy, işğalçı Ermənistanın son vaxtlar ordu sıralarına azyaşlı uşaqları cəlb etməsi ənənə halını almaqdadır. Paşinyan hakimiyyətinin bu addımı beynəlxalq konvensiyaların kobud şəkildə pozulması ilə yanaşı, həm də onun öz xalqına qarşı növbəti cinayəti kimi dəyərləndirilə bilərmi?
-Müharibə başlanan andan Azərbaycan Ordusu Ermənistan silahlı qüvvələrinin 30 il ərzində qurduğu müdafiə istehkamlarını, HMS-ni, ağır döyüş texnikasını, minlərlə canlı qüvvəsini məhv etdi. İşğal altında olan Füzuli, Cəbrayıl, Zəngilan, Qubadlı rayonlarını, Hadrut qəsəbəsini, Suqovuşanı, kəndlərimizin əksər hissəsini azad etdi. Əsas strateji yüksəklikləri ələ keçirdi. Erməni hərbi-siyasi rəhbərliyinin ümumxalq səfərbərlik elan etməsi, yaşından asılı olmayaraq bütün kişilərin müharibəyə cəlb olunması, qadınlardan ibarət batalyonların yaradılması onu göstərir ki, düşmən tərəf, döyüş meydanındakı itkiləri əvəzləməkdə çətinlik çəkir. Azyaşlı uşaqların, yeniyetmələrin, o cümlədən azyaşlı qız uşaqlarının silahlı münaqişələrə cəlb olunması isə, “ Uşaq hüquqları haqqında” beynəlxalq humanitar konvensiyalara ziddir. Konkret olaraq, Beynəlxalq Cinayət Məhkəməsinin Roma statutunun 8-ci maddəsinin, 2a bəndinə müvafiq olaraq hərbi cinayət sayılır. Ümumiyyətlə, Ermənistan elə bir dövlətdir ki, müstəqillik əldə etdikdən sonra bütün beynəlxalq hüququn norma və prinsiplərini, fəaliyyətdə olan bütün humanitar konvensiyaları açıq və kobud şəkildə pozur. Ən adi etik, əxlaq normalarını belə gözləmədən təkzib edilməz faktları inkar edir. Real faktlara müraciət edək; —Azərbaycan və Ermənistan eyni vaxtda, yəni 1992-ci ildə BMT-a üzv olmuşlar. BMT nizamnaməsinin 2-ci maddəsində dəqiqliklə göstərilmişdir; “üzv ölkələr bir-birinin ərazi bütövlüyünə, suverenliyinə hörmətlə yanaşmalıdırlar”. Qəbul olunduqdan dərhal sonra ermənilər tərəfindən havadarlarının köməkliyi ilə Dağlıq Qarabağ və 7 rayonu işğal edildi. — Xocalıda bir gecənin içərisində 613 mülki şəxs, o cümlədən uşaqlar, qadınlar, yaşlılar qətlə yetirildi. — Əsirlərin, itkin düşənlərin gizlədilməsi, qeyri-insani şəkildə istismar olunması, — İşğal olunmuş ərazilərdə tarixi, mədəni, dini abidələrimiz yerlə yeksan edildi. Bu da Avropa mədəniyyət konvensiyasına, 1954-cü il Haaqa konvensiyasına ziddir. — İşğal olunmuş ərazilərdə qanunsuz məskunlaşdırma, əsaslı tikintilərin aparılması, təbii sərvətlərdən istifadə, təbiətə, ekologiyaya kobud müdaxilə olunması. — Moskvada humanitar atəşkəs barədə razılıq əldə olunan gecə Gəncə şəhəri Ermənistan ərazisindən raketlərlə atəşə tutulması və s.
-Ermənistanın hərbi-siyasi rəhbərliyinin uzun illər ərzində Azərbaycan xalqına qarşı həyata keçirdiyi cinayətlərə görə beynəlxalq məhkəməyə verilməsi, hərbi tribunal qarşısına çıxarılması istiqamətində də addımlar atılmalıdırmı?
-Son 30 il ərzində Ermənistan rəhbərliyinin siyasəti, ancaq cinayət xarakterli olmuşdur. Nəticə isə, göz qabağındadır. Hər iki tərəfdən yüz minlərlə insanın qanına bais olmaqla, hər tərəfli geridə qalmış, bütün beynəlxalq nəqliyyat-logistika layihələrindən kənarda qalmış, iqtisadi və coğrafi mühasirədə, ildən-ilə boşalan, heç bir yaşam perspektivi olmayan bədbəxt bir cəmiyyət əldə etdilər. Azərbaycan əsgəri ilə müqayisə etdikdə-erməni əsgərinin ekipirovkasından tutmuş, təchizatı, istifadə etdiyi texnika və silahlar real vəziyyəti tam əks etdirir. Hesab edirəm ki, belə bir vəziyyəti, ancaq öz xalqına düşmən münasibət göstərənlər edə bilər. Ən böyük cinayətləri isə, erməni uşağı anadan olandan bəri digər millətlərə, ələlxüsus türklərə, azərbaycanlılara qarşı düşmən ruhunda tərbiyə etmələri, olmayan dövlətçilik tarixlərini saxta faktlarla, mifik illuziyalarla ,,zənginləşdirib,, tərbiyə etmələridir. Erməni millətinin beyinini yumaqla, psixikasını pozmalarıdır. Azyaşlı uşaqları, qocaları, qadınları müharibəyə cəlb etməklə, Ermənistanın hərbi-siyasi rəhbərləri cinayətkar fəaliyyətlərini davam etdirir və şübhəsiz, yaxın zamanlarda Haaqa tribunalının subyektlərinə çevriləcəklər. Bütün bunlarla yanaşı, Ermənistanın kaprizlərinə, cinayətkar davranışlarına beynəlxalq təşkilatların göz yumması təəssüf doğurur. Məhz onların fəaliyyətsizliyi, Ermənistanı yeni cinayətlərə sövq edir. Tarixən böyük dövlətlər ermənilərdən öz geosiyasi maraqlarını təmin etmək üçün ,,marionet,,kimi istifadə etmişlər. Tarix təkrar olunur.
-Nəsib bəy, necə hesab edirsiniz, Ermənistan toplumunun Paşinyan rejiminin ermənilərə yönəlik cinayətlərini susqunluqla qarşılaması, buna qarşı ciddi bir etiraz sərgiləməməsi nə ilə bağlıdır?
-Normal məntiqlə, normal millətlər bütün baş verənlərdən sonra, Paşinyan iqtidarından və ondan əvvəlki hərbi-siyasi rəhbərliklərdən hesabat tələb etməlidir. Bir daha qeyd edirəm ki, aparılan xəstə təbliğatın nəticəsində bütövlükdə erməni millətinin psixologiyası pozulmuşdur. O baxımdan müəyyən istisnalar olmaqla, toplum olaraq kütləvi etirazların baş verməsini hələlik görmürük.
-Döyüş meydanında Azərbaycan ordusuna müavimət göstərə bilməyən düşmən iri şəhərlərimizi, yaşayış məntəqələrini atəşə tutmaqda davam edir. Hansı ki, bu cür qanlı terror aktlarından biri 17 oktyabr 2020-ci il tarixlərində Gəncə şəhərində reallaşdı. Mülki insanlara qarşı həyata keçirilən bu soyqırım siyasəti fonunda beynəlxalq təşkilatların, aparıcı dövlətlərin susqunluq sərgiləməsi nə dərəcədə məntiqlidir? Erməni vəhşiliyinə şahid ola-ola susmaq, bu cinayətə ortaq olmaq, onun bir parçasına çevrilmək kimi xarakterizə edilə bilərmi?
-Ermənistan tərəfdən gecə vaxtı Gəncə şəhərinin ballistik raketlərlə xaincəsinə bombalanması ilk növbədə dövlət səviyyədə həyata keçirilmiş terror aktıdır. İkincisi, insanlığa, bəşəriyyətə qarşı törədilmiş cinayətdir və bu cinayətin məsuliyyəti birbaşa Ermənistanın hərbi-siyasi rəhbərliyinin üzərinə düşür.
Düşmən cəbhədə uğradığı silsilə məğlubiyyətlərdən sonra başını itirib, ordusu əsgərlərimizin qarşısında duruş gətirə bilmir, muzdluları döyüşməkdən imtina edir, kütləvi şəkildə döyüş meydanından qaçırlar. Təsadüfi deyil ki, separatçıların ,,rəhbəri,, Dağlıq Qarabağın ərazisində bütün giriş-çıxış yollarının bağlanması ilə bağlı sərəncam vermişdir. Bununla bağlı bir faktı da qeyd edim ki, erməni ordusunda vuruşmaqdan imtina edərək döyüş mövqelərini tərk edən əsgərləri yerindəcə güllələyirlər.
Gəncə hadisələrinə beynəlxalq təşkilatların susqunluğu heç bir normal məntiqə sığmır. Əksinə, oktyabr ayının 11-də baş vermiş terror hadisəsindən sonra Azərbaycanda fəaliyyət göstərən səfirliklərin və beynəlxalq təşkilatların nümayəndələri Gəncəyə səfər edərək, faciənin miqyası ilə yerində tanış olsalar da, hər hansı kəskin reaksiyanın şahidi olmadıq. Əgər onlar vaxtında Ermənistanın cinayətlərinə göz yummasaydılar, 17 oktyabr Gəncə terroru təkrarlanmazdı. Onların erməni vəhşiliyini qınamaması, düşməni daha da ruhlandırır və cəzasızlıq şəraitində növbəti cinayətlərə sövq edir. Hüquqi baxımdan bu özü də cinayətdə iştirakçılıq deməkdir və cinayət tərkibi yaradır.
Hesab edirəm ki, heç kim özünü toxunulmaz hesab etməməlidir. Prokurorluq tərəfindən cinayət işi açılmış, sübutlar toplanır. Cinayətkarların cəzalarına çatacağı gün uzaqda deyil. Təcrübə göstərir ki, bu tipli ağır cinayətlər törətmiş terrorçuların tam əksəriyyəti ən ağır cəzalara məhkum olmuşlar. Yaxın keçmişdə Balkanlarda və Yaxın Şərqdə baş verən proseslər dediklərimin bariz nümunəsidir.
-Prezident İlham Əliyev BMT Baş Assambleyasının 75-ci sessiyasındakı çıxışında Ermənistanın Azərbaycana qarşı müxtəlif ölkələrdən muzdlular və terrorçuları cəlb etdiyini vurğuladı. Ermənistanın ölkəmizə qarşı muzdlu və terrorçuları səfərbər etməsi, əslində işğalçı ölkənin öz gücünə inamsızlığının göstəricisi sayıla bilərmi? Bu faktın özü Ermənistanın insan resursu çatışmazlığından ciddi əziyyət çəkdiyini göstərmirmi?
-Prezident İlham Əliyev BMT Baş Assambleyasının 75-sessiyasında iki statusda çıxış etdi. Çıxışın birinci hissəsi Qoşulmama Hərəkatına daxil olan 120 ölkə adından, ikinci hissəsi isə Azərbaycanın problemlərinə həsr olunmuşdu.
Məzmununa, islahatların aparılması ilə bağlı irəli sürülən təklflərə görə cənab Prezidentin çıxışı olduqca əhəmiyyətli və tarixi çıxışdır. BMT ən ali universal təşkilat olaraq yarandığı vaxtdan bəri planetin qarşısında duran bir çox problemlərin həllinə nail osa da, XXI əsrin qlobal çağırışlarına tam cavab vermir. Buna görə də, Prezidentlər İlham Əliyev, Rəcəb Tayyib Ərdoğan BMT-nın strukturlarında köklü islahatların aparılması zəruriliyindən çıxış etdilər. Təşkilat gəncləşdirilməli, müasirləşməli, TŞ-nın tərkibi dünyanın bütün regionlarını, mədəniyyətlərini proporsional şəkildə təmsil etməlidir. Qəbul olunan qətnamələrin dəqiq icra mexanizmi işlənib hazırlanmalıdır. İstisnasız olaraq bütün qərarlar beynəlxalq hüquq prinsiplərinə əsaslanmalıdır.
Aydın məsələdir ki, ölkəmiz bütün dünyada bənzəri olmayan, üzdə özünü məzlum göstərərək arxada insanlığa yaraşmayan ən çirkin oyunlarla məşğul olan olan mənfur düşmənlə qarşı-qarşıyadır. O düşmən ki, fasiləsiz olaraq hər gün, hər saat dünyanın hər tərəfində xalqımıza qarşı böhtan, şər kompaniyası aparır. Buna görə dövlət başçısının belə bir yüksək tribunadan Azərbaycan həqiqətlərini səsləndirməsi düşmənə vurulmuş zərbədir.
Ermənistanın müxtəlif ölkələrdən muzdlu terrorçuları gətirməsi, yeni məsələ deyil. Birinci Qarabağ müharibəsində də məşhur terrorçu Monte Melkonyanı, Yaxın Şərq ölkələrindən gətirilmiş qaradərili muzdluları, 366-cı alayı, sonralar bizim tərəfimizdən əsir götürülən çoxsaylı slavyan kökənli döyüşçüləri xatırlamaq kifayətdir. 2016-cı ilin aprel döyüşlərində əsgərlərimiz cəmi 40 dəqiqə ərzində ,, Ohanyan səddi,, mifini dağıtmaqla, erməni ordusunun Azərbaycan Ordusu ilə müqayisəyə gəlməyəcək dərəcədə zəifliyini göstərdilər. İyul təxribatlarında da həmçinin. Ələlxüsus qardaş Türk Silahlı Qüvvələrinin Ordumuzla keçirdiyi birgə təlimlər isə, düşməni əməlli-başlı qorxuya salıb. Mənə elə gəlir ki, son dövürlər müttəfiqləri və havadarları da erməniləri Azərbaycanın qətiyyətli mövqeyi ilə xəbərdarlıq etmişlər. Artıq onları əvvəlki tək müdafiə etmək imkanlarının olmadığını başa düşürlər. Ermənistanda ,, könüllü ordunun,, yaradılması, 70 yaşa qədər kişilərin orduya cəlb olunması, terrorçu təşkilatlarla razılaşaraq muzdluları cəbhə bölgəsinə yerləşdirməsi ilk növbədə insan resurslarının məhdud olması, ikincisi zəiflik əlamətidir və düşməni məğlubiyyətdən qurtarmayacaqdır. Torpaqlarımızın azad olunması üçün həm beynəlxalq, həm də hərbi şərait yetişmişdir.
Seymur ƏLİYEV