Sentyabrın 27-dən başlayan və bu gün də davam edən Vətən Müharibəsi, bu müharibə fonunda sadəcə hərb meydanlarında deyil, həm də media və diplomatik müstəvidə yaşananlar bütün dünyada böyük maraqla izlənməkdədir.
Moderator.az olaraq Millət vəkili Vahid Əhmədovla
söhbətimizdə Vətən Müharibəsi və bu müharibə əsnasında baş verən bəzi mühüm məqamları
şərh etməyə çalışdıq.
-Vahid müəllim, məlum olduğu kimi, hər bir ordunun
gücü onun komandanının şəxsi keyfiyyətlərindən, bilik və bacarığından əhəmiyyətli
dərəcədə asılıdır. Sizcə Vətən Müharibəsi prezident İlham Əliyevin Ali Baş
Komandan kimi hansı keyfiyyətlərini üzə çıxardı?
-Təbii ki, müharibələrdə
ordu rəhbərliyinin, Silahlı Qüvvələrin Ali Baş Komandanının şəxsi keyfiyyətləri,
iradə və qətiyyəti əhəmiyyətli rol oynayır. Qarabağda həyata keçirilən hazırkı
anti-terror əməliyyatları çərçivəsində biz bu böyük həqiqətə bir daha şahidlik
edirik.
Vətən Müharibəsi göstərdi
ki, Azərbaycanın dövlət başçısı həm peşəkar diplomat, həm də bacarıqlı Ali Baş
Komandan kimi dünyada çox az siyasi lider və komandana nəsib olmuş nadir
keyfiyyətlərə sahibdir. Ordumuzun qısa müddətdə işğal altındakı bir çox
rayonumuzu azad etməsi, düşmənin həm canlı qüvvələrini, həm də hərbi
texnikasını böyük ölçüdə məhv etməsi Ali Baş Komandanımızın sərkərdəlik
qabiliyyətindən xəbər verir. Məhz onun üstün sərkərdəlik keyfiyyətlərinin nəticəsidir
ki, Azərbaycan ordusu düşməni 30 il ərzində möhkəmləndiyi istehkamlardan vurub
çıxarır, onları ölülərini, yaralılarını qoyub qaçmağa vadar edir. Bu faktlar həm
Ali Baş Komandanımızın, həm də ordumuzun gücündən, cəsarətindən və döyüş əzmindən
xəbər verir.
-Prezident İlham Əliyev son bir ay içində həm də
dünya mediasına verdiyi çoxsaylı müsahibələri ilə diqqət çəkməkdədir. Sizcə bu
müsahibələr, habelə həmin müsahibələrdə səslənən fikirlər dünya diplomatiya məktəbi
üçün yeni xəzinə hesab edilə bilərmi?
-Şübhəsiz. Əminliklə deyə
bilərəm ki, cənab prezidentin son bir aydakı müsahibələri dünya diplomatiya məktəbi
üçün öyrənilməsi zəruri və faydalı olan
resept olacaq. Çünki ölkə başçısı bu müsahibələrdə sadəcə Azərbaycan həqiqətlərindən
söz açmadı. O, həm də beynəlxalq münasibətlər sisteminə, onun indiki durumuna
diqqət çəkdi. Beynəlxalq təşkilatların, dünyanın aparıcı dövlətlrinin qətiyyətsizliyinin, ikili siyasətinin hansı
ağrılı fəsadlara səbəb olacağını göstərdi. Ölkə başısı konkret faktlar, nümunələr
əsasında göstərdi ki, əgər zamanında işğalçı Ermənistanaa lazımi təzyiq və
basqı göstərilsəydi, o zaman rəsmi İrəvan öz işğalçılıq siaysətinindən imtina
edər, işğal etdiyi torpaqları tərk etməyə məcbur olardı. Lakin məhz cəzasızlıq
mühiti Ermənistanı işğalçılıq siyasətini davam etdirməyə, Qarabağ probleminin
diplomatik yolla həllini müxtəli süni əngəllərlə təxirə salmağa sövq etdi. Nəticədə,
bütün region üçün ciddi təsirlərə malik müharibənin baş verməsi qaçılmaz oldu.
Düşünürəm ki, İlham
Əliyevin bir tək bu yöndəki açıqlamalarının təhlili dünyadakı oxşar problemlərin
qansız, ağrısız həlli baxımından son dərəcədə əhəmiyyətlidir.
-Vahid müəllim, Vətən müharibəsinin ilk günündən etibarən
qardaş Türkiyə Cümhuriyyətinin ölkəmizə mənəvi-siyasi baxımdan böyük dəstək
verdiyi birmənalıdır. Sizcə prezident Rəcəb Tayyib Ərdoğanın rəhbərlik etdiyi
müasir Türkiyənin bu dəstəyi indiki ağır vəziyyətdə Azərbaycan üçün nə dərəcədə
prinsipial əhəmiyyət kəsb edir?
-Türkiyənin Vətən Müharibəsi
aparan, 30 ildir ki, işğal altında qalan torpaqları güc yolu ilə azad etməyə
başlayan Azərbaycana dəstəyi həyati əhəmiyyət kəsb edir. Biz bu gün bu dəstəyi həm
mənəvi, həm də siyasi-diplomatik müstəvidə çox aydın və dərindən hiss edirik. Türkiyə
Vətən Müharibəsi dövründə sadə vətəndaşından tutmuş prezidentinə qədər göstərdiyi
dəstəklə bir daha sübut etdi ki, Türkiyə hər şeyi ilə Azərbaycan xalqının
yanındadır və onun haqq işini sona qədər dəstəkləyəcək.
Bu gün Azərbaycan düşmənə
qarşı təkbaşına müharibə aparır. Ölkəmizin işğalçı Ermənistana qarşı mübarizəsində
kimsənin hərbi dəstəyinə ehtiyacı yoxdur. Lakin Türkiyə tərəfi dəfələrlə bəyan
edib ki, onlar Azərbaycana hərbi baxımdan da kömək etməyə hazırdırlar. Prezident
İlham Əliyev də bildirdi ki, əgər hər hansı xarici aqressor Azərbaycan-Ermənistan
müharibəsinə müdaxilə etsə, o zaman türk F-16-ları qarşılarında görəcəklər.
Uzun illərdir ki, qardaş
Türkiyə Azərbaycan həqiqətlərini dünya ictimaiyyətinin diqqətinə çatdırmaqda, beynəlxalq
tribunalarda Ermənistanın işğalçılıq siaysətini qətiyyətlə ifşa etməkdədir. Bu
məsələdə qardaş Türkiyənin prezidenti hörmətli Rəcəb Tayyib Ərdoğanın xidmətləri
xüsusilə misilsiz.
Bu gün islam coğrafiyasına
nəzər salsaq, Ərdoğanın bu coğrafiyada böyük nüfuz sahibi olduğu, Türkiyəni
beynəlxalq miqyasda söz sahibinə çevirdiyini görərik. Türk və islam dünyasının
maraqlarını qətiyyətlə müdafiə edən, qlobal terrorizmə qarşı ciddi mübarizə
aparan, regionda və dünyada Türkiyəni
söz sahibinə çevirən Rəcəb Tayyib Ərdoğan, beynəlxalq imperialist güclərə
meydan oxumaqdadır. O, öz qətiyyəti və mübarizə əzmi ilə ismini türk-islam
coğrafiyasında Atatürkdən sonra qızıl hərflərlə yazdıran bir liderdir və haqlı olaraq bütün türk
dünyasının iftixarına çevrilib.
-Son hadisələr fonunda diqqət çəkən
mqəamlardan biri də Azərbaycan-Türkiyə dostluğu, bu dostluğun sarsılmazlığı və
davamlılığıdır. Sizcə dünyanın bu dostluqdan öyrənməli, nəticə çıxarmalı olduğu
nələr var?
-Həqiqətən də Azərbaycan-Türkiyə
dostluğu bütün dünya üçün örnəkdir. Prezident İlham Əliyev haqlı olaraq bəyan edib
ki, dünyanın digər ölkələri arasında bu cür münasibətə rast gəlmək mümkün
deyil. Türkiyə və Azərbaycanın tarixin bütün mərhələlərində bir-birinə verdiyi
təmənnasız dəstək bütün dünyada həqiqi dostluq, qardaşlıq rəmzi kimi mühüm əhəmiyyət
kəsb edir və bu mənada bu dostluğun təməlini təşkil edən dəyərlərin dünya
xalqları tərəfindən öyrənilməsi, mənimsənilməsi olduqca vacibdir.
Türkiyə və Azərbaycan
dostluğunun səciyyəvi xüsusiyyətlərindən biri də bu dostluğun sadəcə adıçəkilən
dövlətlərin deyil, bütün bəşəriyyətin maraqlarına, rifah və təhlükəsizliyinə
xidmət etməsidir. Başqa sözlə desək, Azərbaycan-Türkiyə dostluğu hər hansı bir
dövlətə, xalqa qarşı yönəlməyib. Bu dostluq bütün regionun, bütün dünyanın
sabitliyinə, təhlükəsizliyinə, əmin-amanlığına hesablanıb. Azərbaycan-Türkiyə
dostluğunu dəyərli edən, ona ümumbəşəri çalar bəxş edən də məhz budur. Bu
baxımdan hesab edirəm ki, Azərbaycan-Türkiyə dostluğunun bir model kimi öyrənilməsi
baş verərsə, dünya bu qavrayışdan yalnız və yalnız fayda görər.
Seymur ƏLİYEV