Film kimi günlər yaşayırıq. 10 milyonluq tərkiblə dünyaya birlik, ədalət, əzmkarlıq dərsi keçən səhnələri bol olan bir film. “Qarabağ Azərbaycandır!” adlanan filmin qəhrəmanları bu torpağın vətəndaşlarıdır. Oğulları cəbhədə, siyasətçiləri beynəlxalq tribunada, gəncləri sosial mediada və müxtəlif sahədə düşmənə meydan oxuyurlar. Çünki bizlər qələbəyə inanırıq. Və qələbənin yolu isə bir amal uğrunda yumruq kimi birləşməkdən keçir. Bu amal uğrunda  hər bir Azərbaycan vətəndaşı öz peşəsində mübarizə aparır. Elə müsahibimiz Nuridə Allahyarova kimi. O, Nəqliyyat, Rabitə və Yüksək Texnalogiyalar Nazirliyi yanında Dövlət Avtomobil Nəqliyyat Xidmətinin ictimaiyyətlə əlaqələr sektorunun müdiri və  aparıcı kimi daha çox tanınır.

- Bu gün hər bir Azərbaycan Respublikasının vətəndaşı kimi keçirdiyim hislər analojidir. Həyatımda ilk dəfədir ki, hər kəsə oxşamaq qürur verir. Bütün Azərbaycan eyni hədəfə doğru, eyni amalla birləşib. Azərbaycan illər sonra bütövlüyünü bərpa etmək uğrunda savaş meydanında da, diplomatik danışıqlar masasında da eyni əzmi nümayiş etdirir. Qarabağa qayıdırıq dediniz. İllər əvvəl çalışdığım qurumların birində bir şüar düşünmək lazım idi və mən nəqliyyat vasitələrimizdə yazılacaq ən vacib hədəfimizi düşündüm. Bir zamanlar Aralıq dənizi hövzəsinin və Avropanın böyük bir hissəsini tutan Roma imperiyasının paytaxtı Roma şəhərinə vahid nəqliyyat arteriyalarından keçməklə bütün iri şəhərlərdən yol mövcud idi. Əsrlər sonra məqsədə, hədəfə çatmaq üçün deyim şəklini alan bu aforizmi bizim nəqliyyat vasitələri üçün də öz taleyyüklü vacibimizə uyğunlaşdırmaqla “Bütün yollar Qarabağa aparır” şəklində verdik. Biz heç vaxt Qarabağdan vaz keçməmişdik. Biz sadəcə Qarabağa doğru yol gedirdik. Sentyabrın 27-dən başlanan əks hücüm, antiterror əməliyyatları ilə  o yolu daha da sürətləndirdik. 

- Bilirsiniz, erməni xisləti özünü təkcə bizim nəslin doğmalarını itirdiyi 30 il əvvəlki tarixdə göstərməyib. Erməni xisləti tarixin bütün dövrlərində mövcudluğunu ən vandal şəkildə hiss etdirə bilib. Biz xalq olaraq həmişə bu niyyətlərin mərkəzində yaşamışıq, böyümüşük, qocalmışıq, süngüdən keçirilmişik. Beşikdə körpəmizi boğublar, zirzəmidə qocamıza əzab veriblər. Bu xislət bizi həmişə müşayət edib. Ali baş komandanın dediyi kimi “Biz erməni deyilik”. Nə olmasından asılı olmayaraq, nələrə şahidlik etməyimizdən asılı olmayaraq, biz heç vaxt müharibəni, savaşı qundaqdakı körpə ilə aparmırıq və apara da bilmərik. Biz insanlıqdan çıxmış şəkildə böyüməyəcəyik. Hətta bəzən insanlarımızdan kiminsə emosiyaya qapılaraq sosial hesablarında müəyyən aqressiv paylaşımlar edirlər. Bizim insan emosiya ilə ancaq yaza bilər, xalqımızın heç bir nümayəndəsi uşaq qatili ola bilməz, mülki vətəndaşa silah çəkməz. Tam əksinə, onlarda türkə- Azərbaycana qarşı beşikdən nifrət aşılanır. Verdikləri süni sülh mesajları o qədər gülməli və absurd görünür ki... Ermənilərin niyyəti öz qarşısında güclü Azərbaycan görənə qədər təhlükəli ola bilərdi. Artıq biz yeni reallıq yazırıq. 

 

 

- Bəlkə gülməli səslənəcək, amma artıq marketdə belə qalib kimi gəzirəm. Hər səhər oyananda ürəyimdən yeni reallıq, yeni Azərbaycan üçün bir layihə hazırlamaq keçir ürəyimdən. Bütün cəbhələrdə qalib olmaq isə tamamilə başqa hissdir. Müharibə təkcə döyüş meydanında olmur. Dünənə qədər sənin ölkənə postsovet məkanının sıradan bir ölkəsi, petrol mənbəyi kimi baxanlar, artıq liderlərinin diplomatik kürsülərdəki çıxışları ilə yeni Azərbaycanı kəşf etmiş olurlar. Cənab prezidentin qərb mətbuatına verdiyi açıqlamalar zamanı Azərbaycanın haqlı mübarizəsini savunaraq qərb tarixini xronoloji ardıcıllıqla, analogiya ilə faktlar əsasında səsləndirməsi Azərbaycanın təkcə maddi deyil, beyin sərvətlərinin də hansı keyfiyyətdə olduğuna bariz nümunədir. Bunlar da qələbədir. Qələbə bir ölkədə hamının eyni hədəf üçün çalışmasıdır. İctimai, siyasi baxışlarından asılı olmayaraq hər kəsin cəbhəyə dəstək olmasıdır. Qələbə bir millətin birlik olmasıdır. Mən həyatda heç vaxt ölümdən qorxmamışam. Həyatımda ilk dəfədir ki, ölümün çox gec gəlməyini arzu edirəm-Azərbaycanın yeni reallığının iştirakçısı ola bilmək üçün. Tanrıdan şəhid ruhları önündə borcumu qaytara bilmək üçün möhlət istəyirəm. 

- İşğaldan azad olunan bütün ərazilərimiz yenidən qurulub, bərpa ediləcək. Erməni vandallarının viran qoyduqları yurdlar öz əzəli görkəminə qayıdacaq. Təbii ki, infrastruktur layihələri içərisində avtomobil nəqliyyatı ilə daşımaların təşkili də vacib məsələlərdən biridir. Yolumuz var, o yolla gedən Azərbaycan Respublikasının vətəndaşlarını və təbii ki, ölkəmizin qonaqlarını daşımaq üçün marşrut xətlərinin də gələcəkdə olması prioritetdir.

- O gün həyatımın ən çətin günü idi. Təsəvvür edin ki, gecə evinə raket düşür, doğmalarını itirirsən və səhər efirdə bu xəbərləri verməlisən, üstəlik də sənə baxan tamaşaçı kütləsinə öz acını nümayiş etdirməməlisən. Gəncədə, Bərdədə terror qurbanı olan hər kəs doğmamızdır. Maraqlısı bilirsiniz nə idi? Bütün heyət olaraq həmin səhər terrorun qurbanlarına içimizdə ağlayırdıq. Amma ardından elə efirin ortasında ölkə başçısı canlı çıxış edərək Füzulinin işğaldan azad olunması xəbərini verdi. Bu hisləri sözlə ifadə etmək olmaz. Özünü gözlətməyən qələbə intiqamı... Biz son bir neçə aydır bütün xalq olaraq terrorun acı nəticələrinə dizimizi bükmədən qələbə xəbərləri gözləyirik. Qələbə xəbərləri alırıq. Biz bir neçə aydır 30 il əvvəlki sınan ruhumuzla Şəhid xəbərinə üzümüzü cırmırıq, saçımızı yolmuruq. Hər şəhid üçün daha məğrur durmağa çalışırıq. Müharibə ağrılarsız olmur. Amma unutmayaq ki, biz 30 il sonra qələbənin tarixini yazırıq. 

16 il əvvəl elmi işimin adı “Dağlıq Qarabağ beynəlxalq ərazi münaqişələri kontekstində” idi. Alman elmi rəhbərim həmin adın içindən “beynəlxalq” sözünü çıxartmağı tələb etdi və bildirdi ki, Qarabağ lokal ərazi münaqişəsidir. Bu gün biz sübut etdik ki, Cənubi Qafqazın və bəşəriyyətin ən böyük təhlükəsi olan erməni vandalizmi ilə mübarizə aparan ərazinin münaqişəsi beynəlxalq əhəmiyyətli idi. Biz o torpaqlara qayıdacağıq. Bu, dünyada ədalətin və beynəlxalq hüququn bərqərar olması deməkdir.