28 ildən sonra Şuşa yenidən bizimdir. Sosial şəbəkələrdə yayılan Şuşanın hazırki görüntüləri qəlbimizin ən incə tellərinə toxunur. 28 ildir ki, böyüklərimizdən eşitdiyimiz bu torpaqları görmək isə hər birimizin arzusudur. 

Hazırda Şuşada olan PR mütəxəsissi Nəsimi Paşayev Moderator.az - a öz təəssüratlarını bölüşdü. Şuşanın hazırki vəziyyəti ilə bağlı ona ünvanladığımız sualları cavablandırdı.  

-  Şuşada olmaq hər birimizin arzusu idi. Mən bu arzuma çatdım. Şuşa ordumuzu doğma övladı kimi qarşıladı. Bu çox qürurverici hissdir. Şuşa bizim yaramız, qeyrətimizdir. Biz hər zaman çalışırdıq ki, Şuşaya, torpaqlarımıza geri dönək. Xalq olaraq ümidlərimizi də heç zaman itirməmişdik. Nəhayət ki, biz evimizə geri döndük. Bilirsiniz ki, rəşadətli ordumuz Şuaşnı çox çətinliklə işğaldan azad etdi. Cənnət məkan olan bu torpağa azad olunduqdan sonra tibbi personalla birlikdə gəldik. Bura gələnə qədər müəyyən çətinliklərdən keçdik. Şuşa yükəklikdə yerləşir. Təsəvvür edəndə ki, ordumuz Şuşanı işağldan azad etmək üçün necə döyüşüb, bir daha qəhrəman əsgərlərimizlə qürur duyuruq. Təsəvvür edin ki,  Qubadlıdan bura 2 saatlıq yolu biz 2 günə gəlib çıxdıq. Şuşa bizi övladı kimi qarşıladı.

 

- Bura böyüklərimizin  danışdıqlarından  da əzəmətlidir.  Şuşanı  görmək mənə nəsib olmamışdı. İlk dəfə idi bu əzəmətli torpağı görürdüm. Şuşa ecazkar bir şəhərdir. Təbiəti, dağı, daşı, küçəsi, binaları çox əzəmətlidir.  Təsəvvür edin ki, səhər yuxudan oyanıb qaldığımız evdən mənəzərəyə baxanada sanki böyük bir sənət əsərini seyr edirsən. Dağların başında duman, hündür  ağaclar, təmiz hava, bir sözlə Şuşa möhtəşəmdir. Buranı hamı görməlidir.  

- Şuşaya  gələndən telefonum susmur, mənə yüzlərlə zəng gəlib. Hər kəs xahiş edir ki, bizi də Şuşaya apar. Biz buraya bir missiya ilə gəlmişik. Hazırda vətəndaşların Şuşaya gəlməsi qeyri-mümkündür. Sentyabrın 27-də  müharibə başlayanda “Hünər group” olaraq rəsmi şəkildə rəhbərliyə müraciət edərək şirkətimizin ambulansı olduğunu və yaralıların daşınmasını təmin edə biləcəyimizi qeyd etmişdik. 4 ambulansımız və 12 nəfər tibbi personalımız sürücü ilə bərabər bizi Gəncəyə, 230 saylı hospitala göndərdilər. Orada yaralıların təxliyəsi ilə məşğul olur, yaralıları Gəncədən Bakıya gətirirdik. Daha sonra göstəriş verildi ki, Qubadlıda hərbi hospital açmaq lazımdır. Biz həmin hospitalın  nümayəndələri ilə bərabər Qubadlı rayonunun Xanlıq kəndinə yollandıq. Orada sıfırdan səhra hospitalı qurduq. Həkimlərimiz var gücləri ilə çalışırdılar. Bütün tibbi personal əlindən gələni edirdi. Təsəvvür edin ki, orda qaldığımız müddətcə səhra hospitalına gələn yararlıların hamısına əməliyyat və digər  xidmətlər göstərildi.  Bizim hərbi  hospitalda bir dənə belə şəhid getmədi. Qubadlıda  xidmət göstərərkən Şuşa şəhəri də işğaldan azad olunmuşdu. Şuşa şəhərində də tibbi məntəqə açmaq üçün göstəriş verildi. Biz iki ambulans maşınımızla Şuşaya gəldik. Bir neçə gündür Şuşa şəhərindəyik. Burda yaralılara ilkin tibbi yardım göstəririk. Şuşa məscidində 28 ildən sonra ilk dəfə  namaz qılındı. Eyni zamanda qeyd edim ki, Şuşa şəhərində ilk əməliyyatı da məhz Gəncə hospitalının tibbi peronalı həyata keçirdi. Dünən burda minaya düşmüş bir yaralıya müdaxilə etdik. Çətin şərtlərdə əməliyyat həyata  keçirdik. Şükürlər olsun ki, yaralımızın indi vəziyyəti yaxşıdır.  

- Hazırda Şuşada vəziyyət çox gözəldir. Təbiəti gözəldir,  sakitlikdir. Ordumuz şəhərə tam nəzarət edir, nizam- intizam yaranır. Şuşada hər tərəfdə Azərbaycan  ordusunun əsgələrini görmək mümkündür. Şəhərin binalarında Azərbaycan bayraqları asılıb. Ermənistan ordusunun güclü atəşi nəticəsində Şuşa şəhərinin bir çox binalarına zərər dəyib. Binların bəziləri yararsız vəziyyətə düşüb. Ancaq buna baxmayaraq  Şuşa əvvəlki əzəmətinə qovuşacaq. Cənab prezindetimiz İlham Əliyevin də qeyd etdiyi kimi biz Qarabağı, Şuşamızı dirçəldəcəyik. Mən burdan vətən müharibəsində iştirak edən bütün hərbi personallara, Azərbaycan ordusuna təşəkür edirəm. Eyni zamanda bu vətən müharibəsndə arxa cəbhəsində yardım edən, əlindən gələni əsirgəməyən hər kəsə minnətdaram. Biz həqiqətən də birlikdə güclüyük, biz bunu bacardıq.  Qarabağ Azərbaycandıq!