Onun üçün ən gözəl xəbər qələbə xəbəridir. Həyatdakı ən ümdə arzularından biri də məhz bu olub. İndi isə işağldan azad olunmuş torpaqlardan reportaj hazırlamaq və sənədli film çəkməyi arzulayır. Bu arzusunun isə bir addımlığındadır. 

Müsahibimiz tanınmış xəbər aparıcısı Xanım Yadigarlıdır. Moderator.az-ın qonağı olan aparıcı sevinc hisslərini bizimlə bölüşdü. 

- Uzun illər bu günü gözləmişik. Bu illər ərzində Qarabağ həsrəti dilimizin duası idi. Ən gözəl günlərimizi bu dua ilə yaşamışıq. Azərbaycan xalqı müdrik, səbrli xalqdır. Bu qələbə xalqımızın səbrinin mükafatıdır. 1988-ci ildə baş verənlərə etiraz əlaməti olaraq xalqımız meydanlara toplaşdı. O zaman xalqımızın əzmini əks etdirən fotolar xarici mediada da tirajlanırdı. Bütün Avropa Azərbaycanın əzminə tamaşa edirdi. Tarix dəyişib, amma həmin Azərbaycanıq. Yenə müqəddəs torpaqlarımızın birliyi, bütövlüyü naminə 2020-ci ildə Ali Baş Komandan və ordumuzun ətrafında birləşdik. Yenə bütün dünya birliyimizə, birliyimizdən doğan qələbəmizə şahid oldu. Münaqişənin hərbi mərhələsinin yaşandığı bu günlərdə çoxlu jurnalist Azərbaycanın müxtəlif bölgələrinə yollandı - Bərdədə, Gəncədə, Tərtərdə oldular. Hansı ki, bu ərazilərdə ermənilər terror aktı törətmiş, qadağan olunmuş silahlardan istifadə etmişdi. Əlləri günahız insanların qanına bulanmışdı. Bu çətin anlarda xalqın dilində bir kəlmə vardı - vətən sağ olsun, Qarabağ qayıtsın. Hadisənin baş verdiyi ərazilərdən birbaşa yayıma çıxan jurnalistlər belə bu xalqın gücünün qarşısında deməyə söz tapmırdılar. Belə bir güclü xalqa ancaq qələbə yaraşar. Xalqımız gələcəyə uzanan bu yolda ancaq qələbəyə layiqdir.

- Əsasən, Qarabağla bağlı arzularımızın reallaşmasını gələcək zamanda görürdük. Bütün fikirlərimiz də, istəklərimiz də gələcək zamanda idi. Bütün bunların göz qırpımında baş verməsi bir möcüzə idi. Münaqişə illərində 1-2 yaşı olan və müharibədən sonra doğulan oğullar Qarabağda şərəf tarixi yazdı. Bizə yuxu kimi gələn hər şey canımıza, qanımıza hopmuş bir reallıq idi. Bu günləri təsəvvürümdə işıqlı bir yol kimi canlandırırdım. Uşaqlıqdan Qarabağın azad olunması xəbərini verməyi arzulamışam. Şükür ki, bu tarixi günlərdə informasiya cəbhəsində çalışmaq, prosesləri birbaşa izləmək bizə nəsib oldu. Bütün arzuların, duaların, yuxuların çin olduğunu görməkdən daha möhtəşəm nə ola bilər? Gözümüzün qarşısında böyük tarix yaşandı. Ən çox evini, bağını, dağını, çayını yuxusunda görüb də, sabahı oyanıb içində ağlayanlar indi o torpaqları görəcək, bağlarının şirin meyvəsini dada biləcəklər, Qarabağ havasını ciyərlərinə çəkəcəklər. O torpaqlarda yenidən mərd oğullarımız, qızlarımız dünyaya gələcək.

- On ildir jurnalistikayadam, bu on ildə hər dəfə torpaqlarımızın işğal tarixini təqdim etmək mənə çox ağır gəlirdi. Belim bükülürdü, 20 yanvar, Xocalı facisənin olduğu günlərdə çox əzab çəkirdim. 10 il ərzində bu xəbərləri təqdim edəndə Allahdan ədalət istəməkdən başqa əlacım olmayıb. Biz xəbər təqdim edəndə kameradan başqa heç kimi görmürük, amma bizim təqdim etdiyimiz o xəbərləri izləyən insanların gözlərindəki kədəri, ürəklərindəki ağrını görməsək belə hiss edirik. İşğal tarixlərini təqdim etdikcə, qan yaddaşımızı xatırlatdıqca Qarabağın azad olunması arzusu bir az da boy atırdı, böyüyürdü. Bütün bunlar hislərdir, sözlərdən daha yüksəkdir. Şükürlər olsun ki, Allah bizə "İşğaldan azad olundu" xəbərini tamaşaçıya çatdırmağı nəsib etdi. Hər bir spiker, jurnalist, media sahəsində çalışan insan üçün bundan böyük sevinc ola bilməz. Qalibiyyət xəbərini verərkən yaşadığımız hisslər əvəzsizdir. İllərdir bu günü xəyal etmişik. Amma deməzdim ki, işimiz bununla tamamalanıb. İşimiz hələ də davam edir. İnformasiya müharibəsi bundan sonra da davam edəcək. Ölkəmizin haqq səsini dünyaya çatdırmaq həm vətəndaş, həm də media nümayəndəsi kimi borcumuzdur.

- Çox sevinirəm ki, şanlı zəfərimiz haqqında filmlər çəkiləcək, igidlərimizə heykəllər qoyulacaq, musiqilər bəsdələnəcək. Bu tarixin ab-havası xalq olaraq mədəni irsimizə hopacaq. Vətən savaşında torpağı üçün mübarizə aparan oğullarımızın, qəhrəman yetişdirən valideynlərin taleyi bir sujet xəttidir. Bu qəhrəmanlıqlardan hələ çox danışılacaq. Müharibə vaxtı bölgəyə jurnalist həmkarlarımız ezam olunmuşdu, onlar ən son məlumatları bizə çatdırırdılar. Onlardan ordumuzun bu qəhrəmanlıq tarixini eşidəndə gözlərimiz yaşarırdı. Doğrudan hər bir Azərbaycan əsgəri Qarabağda qəhrəmanlıq göstərdi. Əsgərimizin qanı, canı bahasına azad olunan vətəndən nə qədər yazsaq, azdır. Amma yazmalıyıq. Mən də çox istərəm ki bir jurnalist kimi işğaldan azad olunmuş torpaqlarımızdan sənədli film hazırlayım. Bu mənim arzumdur. Oradan böyük bir reportaj hazırlayım. İndi ən çox bu arzuma tələsirəm. Bu tarixi yaşamqla bərabər yaşatmaq üçün də əlimizdən gələni etməliyik. Çünki düşmənimiz dünyaya yanlış məlumat yayıb, elə yayır da, biz də dayanmayacağıq. Bu qələbə sevinci bütün yaradıcı insanlar üçün ən böyük ilham mənbəyidir. 

- Vətən müharibəsində kosmopolit fikirlər söyləyən insanları qəbul  etmək çətindir. Çünki belə bir anda vətənin maraqlarından qeyri heç nə ola bilməz.  Mən özüm də hərbçi ailəsində dünyaya göz açmışam. Uşaqlığım atamı gözləməklə keçib.  Atamın kölgəsini  uzaqdan görəndə sevinib üstünə qaçırdım. 

- Hardasa 3-4 yaşım olardı. İndi də o günlərim kino lenti kimi xatirimdədir. O hərbi formanın qoxusu xatirimdən silinməz. Bacım dünayaya gələndə atam Qarabağda idi. Bacımın dünyaya gəldiyini görmədi. O dünyaya gələndən bir neçə ay sonra Bakıya gələ bildi. Kiçik idim, atam üçün darıxırdım, ən çox ona sevinirdim ki, atam birinci Qarabağ müharibəsindən sağ-salamat qayıtmışdı. Bu səbəbdən hər zaman  içimdə şəhid anası, şəhid övladlarına qarşı böyük bir həssalıq olub. Şəhidlik mənim üçün ən uca zirvədir. Mən onların yanında hər zaman atadan danışmağa  çəkinmişəm, utanmışam.  Onların ataları bizim torpaqlrımız üçün canlarından keçib, haqları ödənməz. İkinci Qarabağ müharibəsi məni yenə uşaqlığıma qaytardı. Yenə eyni həyəcan, eyni qorxu... Atam döyüş cəbhəsində, mən də informasiya  cəbhəsində vətəndaş borumuzu yerinə yetiririk. Allah  bu dəfə də atamı mənə sağ alamat qaytardı. Bundan böyük sevinc ola bilməz. 

- Paşinyan Şuşada yallı gedəndə hər birimizin hiddətinin sərhədi yox idi. Çünki hər birimizn səbri, əsəbləri tarıma çəkilmişdi. Çox şükür ki, haqq-ədalət bərpa olundu və biz bunu gördük. Şükür ki, xeyrin şər üzərində qələbəsinin şahidi olduq. Doğma torpaqda Ali Baş Komandanımızı, birinci xanımı görmək çox qürurlu idi. O görüntüləri  böyük fəxrlə, zövqlə izlədik, efirə təqdim etdik, sosial  şəbəkələrdə paylaşdıq. Bu görüntülər bizi bir az da birləşdirdi. Birliyimizi, bir-birimizə nə qədər bağlı olduğumuzu hiss etdik. Əslində, içimizdə hər bir Azərbaycanlıya qarşı sevginin, istiliyin olduğunu hiss etdik. Təki  hər zaman Qarabağ torpağında belə xoşbəxt görüntüləri izləyək, Qarabağ torpağında  fotolar çəkdirərək xoş anlarımızı bölüşək.