Bu gün Məmməd (Məmmədov) qardaşımızın haqqa qovuşduğu vaxtdan üçüncü gün keçir. Məmməd müəllim həm qardaşım (dayı oğlum), həm müəllimim, həm həmkarım olmuşdur, birgə fəaliyyaət tariximiz 60 ilə yaxındır. Bu dövr ərzində hər şeydən əvvəl Məmməd müəllimdə dərk etdiyim xarakter – Ali insan xarakteridi: həssas, hər kəsin qaygısına qalmağa hazır olan, qarşıdakı insanın qəmini-dərdini hiss etməyi bacaran, başqasının problemlərini həll etməkdən və ümumiyyətlə, yaxşılıq etməkdən həzz alan insanlıq xarakteri... Belə incə xarakterin nəticəsidir ki, 22 yaşından 79 yaşına qədər 57 il bank-maliyyə-sığorta kimi incə və mürəkkəb sahələrdə fasiləsiz rəhbər vəzifələrdə çalışmışdır. Həyat onu hər cür sınağa çəkmişdir: Atasını, mənim böyük dayım Əhməd bəyi Məmmədin anadan olmasına iki ay qalmış kənd Sovet rəhbərliyindən birbaşa Sovet müharibəsinə götürmüşlər və elə müharibənin ilk vaxtlarında müharibədə həlak olmuşdur. Bizim babamız da hələ müharibədən də bir neçə il əvvəl nadan gülləsinə tuş gəlmiş və vəzifə başında həlak olmuşdur. Məmməd müəllim nənənin (ata nənəsi) himayəsində böyümüş, həyatın hər cür sərt üzünü öz üzərində hiss etmişdir. Sovet dövründə də, müstəqillik vaxtında da bankirə xas olan rəhbər menecer fəaliyyətini məharətlə ifa etmişdi, hansı vəzifəyə təyin olunmuşdırsa, oranı çiçəkləndirmiş, düzəltmiş, sürətlə inkişaf etdirmişdir. Respublikada Əmanət bank sisteminin və milli dövlət sığorta işinin həmmüəllifi kimi bu sahələrin mükəmməl mexanizminin qurulmasında böyük rolu olmuşdur. Bu yüksək fəaliyyətin nəticəsidir ki, Məmməd müəllimin fəaliyyəti həm SSRİ hökümətinin, həm də müstəqil Azərbaycan dövlətinin ali orden və medalları ilə mükafatlandırılmışdır. 2011-ci ildə Azərbaycan Respublikası Presidentinin fərmanı ilə Şöhrət ordeninə layiq görülmüşdür.

Məmməd müəllimin Qarabağ müharibəsi və Sovet sistemi ilə maliyyə hesablarımızı bizim xeyrimizə qapatmaqda müstəsna rolu olmuşdur. Birinci Qarabağ müharibəsində Qərb bölgəsinin müdafiəsinin təşkilində hər formada rəhmətlik Müseyib Müseyibovun vasitəsilə aktiv iştirak etmişdir, Naxçıvan MR və Qarabağ bölgəsinin müdafiəsində də eyni səviyyədə kömək göstərmişdir. O vaxtın maliyyə naziri kimi Məmməd müəllimin bizim Rusiya ilə maliyyə münasibətlərimizin tənzimlənməsində çəkdiyi zəhməti, şəxsi dostluq münasibətlərindən istifadə edərək respublikanın payına düşən aktivlərin ölkəyə gətirilməsindəki böyük rolunu yüksək qiymətləndirirəm. Həmçinin, işğal zonasındakı maliyyə aktivlərinin mərkəzə daşınmasında böyük fədəkarlıq göstərmişdir. Bu da yenə onun Rusiyadakı şəxsi dostluq münasibətləri hesabına başa gəlmişdir.

Məmməd müəllim 5 may 1941-ci ildə anadan olmuş, 19 yaşından əmanət bankı sistemində işə başlamış, 22 yaşından isə 1993-cü ilə qədər filial müdürlüyündən Respublika Əmanət bankının sədri kimi rəhbər vəzifələrdə çalışmış, 1993-cü ildən 2020-ci ilə qədər isə Azərbaycan dövlət sığorta şirkətinə rəhbərlik etmişdir.

Məmməd müəllim həm də çox sağlam düşüncəli, sağlam ruhlu və sağlam orqanizmə malik insan idi. Gündəlik idmanı, təbiətdə gəzintisi, müxtəlif sağlamlıq hərəkətləri daimi idi. Təəssüf ki, dünyaya bəla kəsilən qəfil virus onun da həyatını yarımçıq dayandırdı.

Elimizin, obamızın, xalqımızın başı sağ olsun, ruhu şad olsun, Məmməd müəllim qoyduğu irs, təcrübə, gələcəyə doğru mütərəqqi ideyaları ilə daimi yaşayacaq, ölkəmizin inkişafı yollarını işıqlandıracaq.

Baş sağlığı ilə çıxış edən və bizim ağır dərdimizi bölüşən dostlara, qohumlara, mətbuat orqanlarına, xüsusilə Haqqın.az redaksiya heyyətinə dərin təşəkkürümü bildirirəm.