Xəbər verdiyimiz kimi, ölkə başçısı Zəfər muzeyinin yaradılması ilə bağlı sərəncam imzalayıb.
Moderator.az-a açıqlamasında bu tarixi sərəncama münasibət bildirən Türk dünyasının qəhrəmanı, I və II Qarabağ müharibələrinin iştirakçısı İbad Hüseynov, ölkə başçısının məlum qərarının bir çox aspektdən mühüm əhəmiyyətə malik olduğunu qeyd edib:
“Təbii ki, ölkə başçısının bütün sərəncamları kimi, Zəfər muzeyinin yaradılması ilə bağlı imzaladığı sərəncam da mühüm əhəmiyyətə malikdir. Azərbaycan ordusu Ali Baş Komandanın rəhbərliyi altında 44 günlük Vətən Müharibəsində çox böyük qəhrəmanlıqlar göstərdi, işğaldakı torpaqları qısa zamanda azad etdi. Azərbaycan ordusunun həmləsi nəticəsində düşmən ordusu darmadağın edildi və kapitulyasiya ilə bağlı sənədi imzalamağa məcbur oldu. Odur ki, bu böyük, tarixi qələbənin əbədiləşdirilməsi baxımından Zəfər muzeyinin yaradılması olduqca vacib və təqdirəlayiqdir. Ordumuzun qazandığı bu böyük zəfərin əbədiləşdiriməsi, tarixin yaddaşına həkk edilməsi, gənc nəsilə təbliğ edilməsi son dərəcə önəmlidir. Çünki bu zəfər son 200 ildə ermənilərin xalqımıza qarşı törətdiyi terror və təxribatlara ən layiqli cavabdır. Azərbaycan 8 noyabr zəfəri ilə ermənilərin 200 illik təxribatının qisasını aldı, düşməni diz çökdürməyə qadir olduğunu döyüş meydanında sübut etdi. Çox yaxşı olardı ki, gələcək nəsillər də ordumuzun bu böyük qəhrəmanlığından, əldə etdiyi tarixi zəfərdən məlumatlı olsunlar, bu şərəfli tarixi öyrənsinlər və bilsinlər ki, xalqımız yenilməz xalqdır və özünü, öz ərazi bütövlüyünü qorumağa qadirdir. Bu baxımdan Zəfər muzeyinin yaradılması ilə bağlı ölkə başçısının məlum sərəncamını alqışlayır və bunu tarixi aspektdən də mühüm əhəmiyyət kəsb edən bir addım hesab edirəm. Hesab edirəm ki, Zəfər muzeyi gələcək nəsillərin Vətən Müharibəsi və bu müharibə zamanı göstərilən igidliklər haqqında məlumatlandırılmasında, milli-tarixi yaddaşın yaşadılmasında və təbliğində mühüm rol oynayacaq, eyni zamanda, müharibə iştirakçılarının xatirəsinə hörmət və ehtiram nümunəsi kimi hər zaman sevgi və iftixar hissi ilə ziyarət ediləcək. Bu, yeni nəsillərin vətənpərvərlik tərbiyəsinə də öz müsbət təsirini göstərəcək”.
Seymur ƏLİYEV