“Gənclərimizin Vətən Müharibəsinin mahiyyətini, enerjisini hiss etməsində şeirin rolu böyükdür”

Son vaxtlar Vətən Müharibəsi ilə bağlı bir sıra müsabiqələr elan edililməkdədir ki, bu müsabiqələrdə bir sıra nominasiyalarla yanaşı, şeir nominasiyası da mövcuddur.

Maraqlıdır, Vətən Müharibəsi ilə bağlı şeir nominasiyasında müsabiqələrin təşkili həm gənc nəslin vətənpərvərlik ruhunda tərbiyəsi, həm də müharibədə göstərilən qəhrəmanlıqların ədəbiyyatda öz əksini tapması baxımından nə dərəcədə əhəmiyyətlidir?

Moderator.az-a açıqlama verən millət vəkili Nizami Cəfərov, bu kimi təşəbbüslərin təqdirəlayiq olduğunu vurğuladı:

“Bizim uşaqlarımız əzəldən dünyanı, tarixi, hadisələri şeirlə dərk etməyə öyrəniblər. Onların Vətən Müharibəsinin mahiyyətini, enerjisini hiss etmələrində şeirin rolu böyükdür. Bizim uşaqlarımız vətənlə bağlı, müharibə ilə bağlı şeir deyəndə əllərində bayraqlar tutur, bu şeirləri böyük sevgi ilə səsləndirirlər. Bu baxımdan Vətən Müharibəsi ilə bağlı şeirlərin yazılması, səsləndirilməsi faydalıdır. Lakin bir şərtlə ki, ərsəyə gətirilən şeirlər səviyyəli şeirlər olsun. Bu şeirlərdə təkrarçılıq, təqlidçilik, eyniyyət olmasın. Orijinal şeirlər olsun.

Bu cür müsabiqələrdə həm şairlərdən, həm də tələffüz, səsləndirmə ilə bağlı mütəxəssislərdən ibarət münsiflər heyətinin olması arzuediləndir.

Bir sözlə, Vətən Müharibəsi ilə bağlı həqiqətlərin, əldə edilən qələbənin mahiyyət və əzəmətinin müsabiqələr vasitəsi ilə gənc nəslə dərk etdirilməsi son dərəcə önəmli və əhəmiyyətlidir”.

Seymur ƏLİYEV