Hazırda Türkiyədə yaşayan Azərbaycanlı aktrisa Nigar Aktar Bahadirqızı Moderator.az-ın suallarını cavablandırıb. 

Aktrisa pandemiya dönəmində Türkiyədə teatrların onlayn məşqlər etdiyini və orada Azərbaycan əsərlərini səhnləşdirəcəklərini qeyd etdi.

 

- Bütün dünyada olduğu kimi Türkiyədə də pandemiya ilə bağlı karantin rejimi davam etməkdədir. Belə ki, axşam saat 21:00-dan sonra çölə çıxmaq qadağan edilib. Həftə sonları- şənbə-bazar günləri isə tamamilə çölə çıxmamaq qadağandır. Hər yerdə olduğu kimi İstanbulda da bir çox iş yerləri fəlaiyyətini dayandırıb.  Eləcə də mədəniyyət mərkəzləri və teatrlar da onun kimi. Amma sənətkarlar belə zamanlarda boş dayanmırlar.

- Səhnəsiz qalmaq bir sənətçi üçün maddi, ən çox da mənəvi cəhətdən çox çətindir. Bu müddət ərzində bir çox kitab oxudum, onlayn tamaşalar izlədim. Ən önəmlisi Azərbaycan və Türkiyə qardaşlığını, birliyi üzərində qurulmuş "Türkiyə-Azərbaycan vizyon Tiyatrosu"-nda onlayn tamaşalar hazırlanmasıdır.  Teatrın qurucusu Azərbayacan Dövlət Akademik Musiqili Teatrın sevilən aktyoru Elçin İmanov və Türkiyədə yaşayan aktrisa, rejissor Kəmalə Nəbibəyovadır. Sözü gedən teatrın əsas məqsədi bu pandemiya dönəmində Azərbaycan tarixini, mədəniyyətini dünyaya, eləcə də Türkiyədəki tamaşaçılara tanıtmaq və nümayiş etdirməkdir.  Hazırda iki tamaşa üzərində onlayn şəkildə məşqlərimiz davam edir. Bunlardan biri Ə.Haqverdiyevin “Yeyersen qaz ətini görərsən ləzzətini" əsəri, ikincisi isə çox sevdiyim və illər öncə Azərbaycan Dövlət Gənc Tamaşaçılar Teatrında oynadığım "Tık tık xanım" tamaşasıdır. Bu tamaşalar türk dilində istedadlı rejissorlar tərəfindən səhnələşdirilir. Pandemiya bitdikdən sonra tamaşalarımızı canlı şəkildə nümayiş etdirəcəyik.

 

- Türkiyədə istər rejissorlar, istərsə də aktyor və ssenaristlər durmadan öz üzərlərində çalışırlar. Hesab edirəm ki, bu uğuru çox çalışmağa borcludurlar. Bizim aktyor, rejissor və ssenaristlərimiz istəsələr Türkiyədəki həmkarlarından daha uğurlu, səviyyəli işlər görə bilər. Bizim sənətçilərimiz daha istedadlı, savadlı və çalışqandır. Bizə nəyin mane olduğunu hələ də anlaya bilmirəm. Amma son zamanlarda bir çox yeni çəkilən yeni filmlərimizi izlədikdə inkişafın olduğunu görməmək mümkün deyil. Nəzərə alsaq ki, illərlə bizim film və serial sahəsi fəaliyyətsiz idi və son 10 ildə sürətli şəkildə inkişafa doğru yol aldıq.  Daha da inkişaf edəcəyinə əminəm. Çünkü biz Azərbaycan sənətçiləri hər şeyin ən mükəmməlini etməyi bacarırıq. Uzun zamandır ki, öz seriallarımızı izləmirəm. Amma filmləri çalışdığım qədər izləyirəm. Mən əslində Türk seriallarını da çox izləyən bir insan deyiləm amma bu yaxınlarda “Netflix”- də türklərin çəkdiyi 8 bölümlük "Bir başqadır" serialını izlədim və aktyorların, rejissorun və operator işinə heyran qaldım.

- Bütün sahələrdə rəqabət, mübahisə var.  Eləcə də bizim sənətdə. Türkiyədə isə sənət adamar bir-biri ilə daha çox sağlam rəqabət aparırlar.