Yanvarın 27-də ölkə başçısı İlham Əliyev Şuşa üzrə prezidentin xüsusi nümayəndəsi Aydın Kərimovu qəbul edən zaman Şuşa, onun xalqımız üçün mədəni, mənəvi, tarixi və ruhi əhəmiyyəti ilə bağlı maraqlı fikirlər səsləndirib, Şuşanın bütün bölgənin mədəniyyət mərkəzinə çevriləcəyinə inamını ifadə edib.
Prezident İlham Əliyev həmçinin Şuşanın tarixi, işğal dönəmində ermənilər tərəfindən məruz qaldığı talanlar və dağıntılar, hazırkı bərpa işləri ilə bağlı müxtəlif ölkələrdə təqdimatların keçirilməsinin vacibliyini vurğulayıb:
“Təbii ki, düşmən Şuşanı talan edib, viran qoyub, dağıdıb. Şuşada olarkən, bu acı mənzərəni seyr edərkən adamın ürəyi ağrıyır. Amma biz bütün infrastruktur layihələrini icra edərək Şuşanı tez bir zamanda bərpa edəcəyik. Bildiyiniz kimi, Şuşaya gediş-gəlişin təşkil edilməsi üçün mənim Sərəncamımla yol çəkilir. Füzuli hava limanı inşa edilir və bu ilin sonuna qədər istifadəyə verilməlidir.
Şuşa ilə bağlı indidən müxtəlif ölkələrdə təqdimatlar və sərgilər keçirilməlidir. Siz Azərbaycan Dövlət Turizm Agentliyi və Mədəniyyət Nazirliyi ilə birlikdə bu proqramı işləyin. Dünyanın müxtəlif ölkələrində Şuşanın tarixi, işğal dövrü, bugünkü bərpa işləri ilə bağlı təqdimatı keçirilməlidir. Həm Azərbaycan ictimaiyyəti, eyni zamanda, beynəlxalq ictimaiyyət bərpa işlərimizin gedişi ilə bağlı məlumatlandırılmalıdır".
Əbədi sevgi, hörmət və ehtirama layiq möcüzələr şəhəri – Şuşa!
Göründüyü kimi, prezident İlham Əliyev Şuşa, onun dünəni və bugünü ilə bağlı beynəlxalq miqyasda ciddi və sistemli addımlar atmağı zəruri hesab edir. Bu zərurəti doğuran başlıca amil isə Şuşanın qədim və zəngin mədəniyyət mərkəzi olması, qeyri-adi, füsunkar təbiətə malikliyi, 30 ilə yaxın müddətdə erməni vandalizminə məruz qalması və buna rəğmən bu gün də ayağa qalxmağa, dirçəlməyə, bütün dünyanın diqqət mərkəzinə çevrilməyə güc tapmasıdır.
Maraqlıdır, bəs əbədi sevgi, hörmət və ehtirama layiq Şuşanın, onun keçmişi və bugününün dünyaya tanıdılmasında mediamızın, jurnalistlərimizin üzərinə hansı vəzifələr düşür? Bəşəriyyətin Şuşa adlı möcüzə ilə tanışlığının təmin edilməsində mediamızın ata biləcəyi hansı addımlar var?
Hər şeydən öncə qeyd etmək lazımdır ki, Şuşanın dünyaya tanıdılması prosesinin avanqardı media olmalıdır. Hansı ki, istər Vətən müharibəsi dönəmində, istərsə də ondan öncəki və sonrakı dönəmdə medianın erməni vəhşiliklərinin ifşa edilməsində, Qarabağ həqiqətlərinin dünyaya çatdırılmasında mühüm rol oynadığı danılmazdır. Bu baxımdan, sadəcə daxili auditoriyaya deyil, həm də beynəlxalq aləmə, dünya auditoriyasına çıxmaq üçün geniş imkanlara malik olan medianın imkan və potenbsialından maksimum istifadə etmək vacibdir.
Bu məsələdə Azərbaycan dili ilə yanaşı, həm də xarici dildə fəaliyyət göstərən onlayn media qurumlarımızın aktivliyi xüsusilə zəruridir. Çünki Azərbaycan tarixinin bir parçası olan Şuşa ilə bağlı reallıqların dünya ictimaiyyətinə çatdırılması üçün dünyanın öz dilindən istifadə etməyə, onunla öz dilində danışmağa ciddi ehtiyac var. Odur ki, bu məsələdə əcnəbi dillərdə fəaliyyət göstərən media orqanlarımız bu prosesə daha böyük fayda verə bilər.
Bundan başqa, ölkəmizdə çalışsa da, dünyanın müxtəlif dövləltərinə məxsus qəzet və saytlarda mütəmadi olaraq məqalələrələ çıxış edən, bu məqalələrdə erməni vandalizmini uğurla ifşa edən azsaylı jurnalisltərimiz var ki, onların sırasının genişləndirilməsi, bu sahədə ixtisaslaşan jurnalistlər qrupunun formalaşdırılması da Şuşanın tarixinin, mədəniyyətinin, ermənilər tərəfindən məruz qaldığı vəhşiliklərin dünyada təbliği baxımından mühüm rol oynayar.
Milli maraqlarımız diaspor və medianın koordinasiyalı fəaliyyətini zəruri edir
Bu məsələdə ən əsas məqamlardan biri də Azərbaycan diasporunun imkanlarından istifadə etməkdir. Bu gün bir sıra jurnalistlərimizin məqalələrinin xarici ölkələrdə işıq üzü görməsinə məhz əcnəbi ölkələrdəki diaspor fəallarımızın yardım etdiyi məlumdur. Diasporun bu imkanlarından daha geniş istifadə etmək, onların dəstəyi ilə daha çox jurnalistimizin Şuşa ilə bağlı məqalələrinin xarici ölkəlrədə nəşrinə nail olmaq mümkündür. Bu, həm mədəniyyət paytaxtımızın qeyri-adi özəllikləri ilə bağlı beynəlxalq ictimaiyyətin məlumatlanmasını təmin edə, həm də diaspor təşkilatları ilə jurnalistlərimiz arasında təmasın artmasına, digər ümummili məsələlərdə də əməkdaşlığına şərait yaradar. Yeri gəlmişkən qeyd edək ki, Azərbaycanın milli maraqlarını, dövlətçilik mənafeyini əks etdirən məqalələrin xarici ölkələrdə işıqlandırılmasında yaxından iştirak edən diaspor fəallarımızdan biri də “QALA” Yunanıstan-Azərbaycan Dostluq Cəmiyyətinin sədri Rəşid Məmmədovdur.
Məhz onun səyləri nəticəsində bugünə qədər Azərbaycan həqiqətləri ilə bağlı Yunanıstan mediasında bir sıra məqalələr işıq üzü görüb ki, bu da yunan cəmiyyətinin ölkəmizlə bağlı daha dolğun məlumat əldə etməsində mühüm rol oynayıb. Bir tək bu nümunə diaspor fəalları ilə əməkdaşlığın vətənimiz üçün necə böyük önəm kəsb etdiyini bariz şəkildə göstərir.
Şuşanın tarixinə, mədəniyyətinə, ruhuna yaxından bələd olan Şuşa ziyalılarından, o cümlədən sadə Şuşa insanından alınanan müsahibələrin beynəlxalq media orqanlarına yer alması da Şuşanın tanıdılmasına töhfə verə bilər.
“Hikmət Hacıyev praktikası”, yaxud “tarix və həqiqətlə görüş”
Həmçinin, bu gün ölkəmizdəki bəzi media mərkəzlərinin, redaksiyaların xarici ölkələrdəki müxtəlif media qurumları ilə ikili qaydada əməkdaşlıq etdiyi məlumdur. Məhz bu əməkdaşlıq çərçivəsində də xarici ölkələrdə Şuşa ilə bağlı məqalələrin işıqlanmasına nail olmaq mümkündür. Ən əsası, dövlət xətti ilə xarici ölkələrdən jurnalistlərin Şuşaya səfərlərinin təşkil edilməsi son dərəcə faydalı olar. Bu cür səfərlər əcnəbi jurnalistlərin Şuşanın tarixi yerləri, ecazkar təbiəti, erməni vandalları tərəfindən dağıdılan hissələri ilə əyani tanış olmasına, hər şeyi bilavasitə özlərinin müşahidə etməsinə imkan yaradar.
Hansı ki, prezidentin köməkçisi Hikmət Hacıyevin rəhbərliyi altında əcnəbi jurnalistlərin Füzuli, Ağdam və Tərtərə səfərləri, bu səfərlərin xarici jurnalistlərlə oyatdığı təəssürat və bunun beynəlxalq nəşrlərdə Azərbaycan həqiqətlərinin yer aılmasına göstərdiyi təsir hamıya məlumdur. Odur ki, “Hikmət Hacıyev praktikası”nın Şuşanın təbliği, dünyaya tanıdılması müstəvisində də tətbiqinə ciddi ehtiyac hiss olunur. Şuşaya ediləcək belə bir səfər əcnəbi jurnalistlərin timsalında bütün dünyanın “tarix və həqiqətlər görüşü” hesab edilə bilər.
Göründüyü kimi, media Şuşanın tanıdılması prosesinə böyük töhfə vermək, bu missiyanın əsas yükünü öz üzərinə çəkmək iqtidarındadır. Edilməsi gərəkən yeganə iş, bütün bu məsələləri vahid mərkəzdən peşəkar şəkildə koordinasiya etmək, Şuşanı dünyaya Şuşaya layiq şəkildə tanıtmaqdır.
Seymur ƏLİYEV