Noyabrın 6-da Milli Məclisin 6 komitəsinin iştirakı ilə 2014-cü ilin büdcə layihəsinin müzakirəsi davam etdirilib. Müzakirələrdə maliyyə naziri Samir Şərifov da iştirak edib. Elm və təhsil komitəsinin sədri Şəmsəddin Hacıyev büdcə layihəsi barədə çıxışında ölkədə makroiqtisadiyyatın inkişafından söz açaraq bildirib ki, artıq bir neçə ildir dünyada iqtisadi böhran var. Lakin buna baxmayaraq, Azərbaycanda makroiqtisadiyyat inkişaf edir.

İclasda partiyalara ayrılan maliyyə vəsaiti də müzakirə mövzusu olub. Partiya rəhbərləri maliyyənin azlığından şikayətlənib. VHP sədri Sabir Rüstəmxanlı parlamentdə komitələrin büdcə müzakirəsində siyasi partiyalara ayrılan dövlət vəsaitinin artırılması məsələsini qaldırıb: “Siyasi partiyaların maliyyələşməsində artım olmayacaq? Hər şeydə artım var. Bəs siyasi partiyaların maliyyələşməsində niyə artım yoxdur? Bu maliyyə ilə partiyanın yaşadılması mümkün deyil”. O qeyd edib ki, bu il siyasi partiyaların maliyyələşməsinə 2,5 mln. manat ayrılıb: “Yaxşı olardı ki, siyasi partiyaların maliyyələşməsi heç olmasa 25 faiz artırılsın”. İclasda iştirak edən BQP başqanı Fazil Mustafa da bu məsələnin bir daha nəzərdən keçirilməsini vacib sayıb. AVP sədri Fəzail Ağamalı isə bu gün siyasi partiyalara ayrılan vəsaitlə partiyanı saxlamaq mümkün olmadığını vurğulayıb və maliyyə nazirindən bu vəsaitin artırılmasını xahiş edib.

Maliyyə naziri isə partiya rəhbərlərinə cavabında bunun onlardan asılı olmayan məsələ olduğunu deyib: “Ötən ildən bu vəsaitdən pul qalmışdı. Bu, bizdən asılı olmayan məsələdir. Bu il 2,5 milyon manat ayrılıb. Biz bunu qeyd edək və lazım olsa vəsaitlərin artırılmasına baxarıq”.

“2014-cü ilin dövlət büdcəsində kommunal xidmətlərlə bağlı xərclərin ödənilməsində 15 faiz artımın nəzərdə tutulduğu qeyd olunub. Bu, əsasən dövlət büdcəsindən maliyyələşən təşkilatların kommunal xidmətləri ilə bağlıdır”. Bunu APA-ya açıqlamasında deputat Vahid Əhmədov deyib. 

V.Əhmədovun sözlərinə görə, komitələrin iclaslarındakı müzakirələri mətbuatda oxuyan bəzi ekspertlər də bunu belə izah edirlər ki, guya 2014-cü ildə əhalinin kommunal xidmət haqları qalxacaq: “Lakin artıq qeyd etdiyim kimi, əsasən dövlət büdcəsindən maliyyələşən təşkilatlar üçün kommunal xidmətlərin haqqının artırılmasından söhbət gedir. Bildiyimiz kimi, kommunal xidmətlərə işıq, qaz, yanacaq və sair aiddir. Digər xidmətlər kimi, kommunal xidmətlərin qiymətlərinin artırılması birbaşa Tarif Şurasının səlahiyyətinə aiddir. Lakin mən hesab edirəm ki, həm gələn ilin dövlət büdcəsinə baxanda, həm də indiki reallığı nəzərə alanda əhali təbəqəsi üçün qiymət artımına ehtiyac görünmür”. İqtisadçı-deputat hesab edir ki, öncə Azərbaycanda mövcud olan bəzi problemlər həll olunmalıdır: “İndiki halda miqrantlar, ölkəyə insan axını, həkimlərin, müəllimlərin və digər təbəqələrin sosial problemləri ilə bağlı məsələlərin həlli prioritetdir. Bu məsələləri həll etməmiş qiymət artımı gözlənilən deyil, buna ehtiyac da yoxdur. Kommunal xidmətlərin qiymətinin artması bütün qiymətlərin artmasına səbəb olur. Odur ki, sadaladığım səbəblərə görə 2014-cü ildə yanacaq və əhali təbəqəsi üçün kommunal xidmətlərə görə qiymət artımı gözlənilmir”.

“Azərbaycanda kommunal xərclərin artırılmasına fövqəladə hal kimi baxmaq lazım deyil”. APA-nın məlumatına görə, bunu jurnalistlərə açıqlamasında Samir Şərifov gələn ildən ölkədə kommunal haqların artırılması ehtimalı ilə bağlı məsələləri şərh edərkən bildirib.

Onun sözlərinə görə, Azərbaycanda sonuncu dəfə kommunal xərclər 2007-ci ildə artırılıb: «Bu illər ərzində minimum əmək haqqının sosial bazası 2,6 dəfə, minimal pensiyaların sosial bazası isə 2,5 dəfə artıb. Bununla bağlı 7 sərəncam imzalanıb».

S.Şərifov qeyd edib ki, MM-in komitələrinin iclaslarında kommunal xərclərin artırılacağını deməyib: “Sadəcə, bununla bağlı öz təklifimi vermişəm. Bildirmişəm ki, 2007-ci ildəki son artımlardan bu vaxta qədər ölkənin kommunal sahədə artımın edilməsi labüddür. Bununla bağlı Tarif Şurasından təkliflər olacaqsa, son sözü də elə Tarif Şurası deyəcək».

Azərbaycanın 2014-cü il üçün dövlət büdcəsinin layihəsində dövlət sosial müdafiə və pensiya xərclərinin 14 faiz artırılması nəzərdə tutulub. Nazir qeyd edib ki, Azərbaycanda siyasi partiyaların maliyyələşdirilməsinə dövlət büdcəsindən 2,5 mln. manatın, sahibkarlığın güzəştli kreditləşdirilməsinə 150 mln. manatın, kənd təsərrüfatının inkişafı üçün isə “Aqrolizinq” ASC-yə 35 mln. manatın ayrılması planlaşdırılır. S.Şərifov vurğulayıb ki, Azərbaycanın xarici dövlətlərdəki 57 səfirlik, 9 baş konsulluq və beynəlxalq təşkilatlar yanında nümayəndəliklərin maliyyələşdirilməsi və beynəlxalq tədbirlərdə iştirakı üçün 20 mln. manat nəzərdə tutulub: “Gələn ildən regionların maliyyələşməsi proqramına uyğun olaraq Sumqayıt, Şirvan, Mingəçevir, İmişli rayonlarına dövlət büdcəsindən cari xərclər üçün vəsait ayrılmayacaq”.

Fəzail Ağamalı: “Kommunal xərclərin artması ölkədə kənd təsərrüfatını çökdürə bilər”

“Kommunal xərclərin artması ölkədə kənd təsərrüfatını çökdürə bilər”. AzVision.az xəbər verir ki, bu sözləri MM-də komitələrin büdcə müzakirələri zamanı Fəzail Ağamalı deyib. Onun sözlərinə görə, ölkədə əgər gələn il kommunal xərclər artarsa, kənd təsərrüfatı sahəsi ciddi təhlükə qarşısında qala bilər: “Hesab edirəm ki, kənd təsərrüfatı emal müəssisələri vergilərdən azad edilsin. Emal istehsal müəssisələri isə qaz, su, və işığın pulundan azad edilsin və ya qismən azaldılsın ki, kənd təsərrüfatının stimullaşdırılmasına kömək olsun. Ümumdünya ticarət təşkilatına niyə üzv olmuruq? Əgər üzv olsaydıq, bu gün Rusiya bazarlarına çıxmamaq bizə bu dərəcədə baha başa gəlməzdi. Rusiyadan asılılığımız azalardı və məhsullarımız dünya bazarlarına çıxardı. Biz bu prosesə qoşulmağımızı tezləşdirməliyik. Kənd təsərrüfatı məhsullarının ixrac məsələsi elə acınacaqlı vəziyyətdədir ki, istehsalçılar məhsullarını xaricə çıxarda bilmir. Rusiyada gömrükdə qiymətin artırılması onların məhsullarının daşınmasına maneə yaradır”.

Deputat həmçinin qeyd edib ki, ucqar kəndlərdə işləyən müəllimlərə müəyyən imtiyazlar verilir, amma onlar ailə qurub torpaq almaq istəyəndə buna pulları çatmır: “Bu da diqqətdə saxlanmalıdır. Salyan rayonunda prezident seçkiləri dövründə rastlaşdığım hadisə - iki gənc Salyanın ucqar kəndində müəllim işləməyə gedib, torpaq almaq istəyir, amma ala bilmir”. F.Ağamalı təhsildə olan problemlərdən də danışıb: “2013-cü ildə məktəbi bitirənlərin 20 min nəfəri peşə məktəblərinə daxil olub, çox adam isə buna nail ola bilməyib. Səbəb isə peşə məktəblərinin sayının azlığıdır. Bu gün regionlarda peşə məktəbləri demək olar ki, yoxdur”.