“Heydər Əliyev” Fondu milli-mənəvi dəyərlərimizin və mədəni irsimizin dünya miqyasında tanıdılması, Azərbaycanın, həmçinin Gəncənin dünyanın ən qədim tarixə malik məkan olması istiqamətində də genişmiqyaslı tədbirlər həyata keçirir. Bu günlərdə möhtəşəm tədbirlərdən biri də Fransanın Reyms şəhərinin To sarayında təşkil olunub.
Moderator.az xəbər veir ki, Heydər Əliyev Fondunun təşkilatçılığı və Azərbaycan
Respublikasının Fransadakı səfirliyinin dəstəyi ilə noyabrın
28-də Məhsəti
Gəncəvinin yaradıcılığının 900 illiyinə həsr olunan sərgidə şairin dövrünə
məxsus qadın geyimləri, xalçalar üzərində şairin əsərlərinə çəkilən illüstrasiyalar,
qədim pul vahidləri, misgərlik və dulusçuluq sənət nümunələri, çini qablar və
digər eksponatlar tamaşaçılarda geniş maraq doğurub. Sarayın inzibatçısı Benua-Anri Papuno sərginin açılışında çıxış
edərək bildirmişdir ki, bu cür tədbirlər müxtəlif mədəniyyətlərə malik
xalqların biri-birlərini yaxından tanıması, ölkə barəsində müəyyən məlumatlar
əldə edilməsində müstəsna rol oynayır. Sərgidə nümayiş etdirilən eksponatların
Azərbaycanın qədim və zəngin mədəniyyətindən xəbər verir.
Reyms şəhəri merinin
müavini Jak Kuen qonaqları salamlamış, beynəlxalq yarmarkada iştirak etməsindən
məmnunluq hissi keçirdiyini, Məhsəti Gəncəvi ilə bağlı şəhərdə keçirilən
silsilə tədbirlərin davamı kimi Azərbaycan incəsənət ustalarının Reyms
Konservatoriyasında çıxış edəcəyini diqqətə çatdırıb.
Şampan-Arden Regional Şurasının sədri Jan-Pol
Başi bir neçə həftə əvvəl Fransa nümayəndə heyətinin tərkibində Bakıda
keçirilən Üçüncü Beynəlxalq Humanitar Forumla əlaqədar ölkəmizə səfər etdiyini
xatırlatmış, Azərbaycanın dünyanın iki qitəsinin və müxtəlif ölkələrin yol
ayrıcında, əsasən də müsəlman ölkələri ilə sərhəddə, qədim sivilizasiyaların
qovşağında yerləşdiyini, özünəməxsus adət və ənənələri olduğunu qeyd edib.
Azərbaycanın yeraltı sərvətlərlə, xüsusilə
neft və qazla zənginliyini diqqətə çatdıran regional sədr Bakı və Gəncənin
ölkəmizin əsas böyük şəhərləri olduğunu, son zamanlar hər iki şəhərin müasir
görkəm aldıqlarını vurğulayaraq, Reyms Universitetinin Gəncə Dövlət
Universiteti ilə əlaqələr qurmaqda maraqlı olduğunu bəyan edib.
Gəncədə keçirilən beynəlxalq şərab
festivalında iştirakını xatırladan Jan-Pol Başi Şampan regionunun öz şərabları
ilə dünyada tanındığını və bu sahədə Gəncə şəhəri ilə birgə fəaliyyətə önəm
verdiyini, Azərbaycanda turizm imkanlarının genişləndiyini, bu istiqamətdə
əməkdaşlığın yaradılmasının vacibliyini qeyd edib.
Ölkəmizin Fransadakı səfirliyinin müşaviri
Nigar Hüseynova XII əsrin şairi, yazıçısı, rəssamı və kalliqrafiya ustası kimi
tanınan Məhsəti Gəncəvinin Şərq İntibahının mədəniyyət mərkəzlərindən biri olan
Azərbaycanın ikinci böyük şəhəri Gəncədə yaşayıb yaratması, bu şəhərdə öz
əsərləri ilə bəşər ədəbiyyatını zənginləşdirən daha bir söz ustası-Nizami
Gəncəvi haqqında məlumat verib. Məhsəti Gəncəvinin adına məktəblər və küçələr
olduğunu, 1980-ci ildə doğma şəhəri Gəncədə ona abidə ucaldıldığını, Prezident cənab
İlham Əliyevin şairin yaradıcılığının 900 illiyi ilə əlaqədar sərəncam
imzaladığını, Azərbaycanın birinci xanımı, Heydər Əliyev Fondunun prezidenti,
UNESCO-nun xoşməramlı səfiri Mehriban Əliyevanın təşəbbüsü ilə Məhsəti
Gəncəvinin əsərlərinin müxtəlif dillərə tərcümə olunaraq nəfis şəkildə çap
edildiyini, şairin xatirəsinin UNESCO kimi nüfuzlu təşkilatda və səfirlikdə
qeyd olunduğunu bildirib.
Gəncə şəhər İcra Hakimiyyətinin başçısı Elmar
Vəliyev Gəncənin Azərbaycanın ikinci şəhəri olmaqla yanaşı, həm də qədim
mədəniyyət və incəsənət mərkəzi olduğunu xatırladıb, dünya ədəbiyyatına Nizami
Gəncəvi və Məhsəti Gəncəvi kimi dühalar bəxş etdiyini vurğulayıb. O, Prezident
İlham Əliyevin sərəncamına əsasən Nizami Gəncəvinin anadan olmasının 870 və
Məhsəti Gəncəvi yaradıcılığının 900 illiyinin Azərbaycanda və onun
hüdudlarından kənarda qeyd olunmasından böyük qürur hissi duyduğunu, Gəncədə
Məhsəti Gəncəvi ilə bağlı silsilə tədbirlərlə yanaşı ikinci beynəlxalq şərab
festivalının keçirildiyini, festivalda Fransadan böyük nümayəndə heyətinin
iştirak etdiyini, Gəncənin 2016-cı ildə "Avropa gəncələrinin paytaxtı"
elan olunduğunu bildirib.
Prezident cənab İlham Əliyevin apardığı
uğurlu daxili və xarici siyasət sayəsində Azərbaycan iqtisadiyyatının sürətlə
inkişaf etdiyini, beynəlxalq aləmdə imicinin formalaşdığını vurğulayan icra
başçısı Azərbaycanın birinci xanımı Mehriban Əliyevanın rəhbərlik etdiyi Heydər
Əliyev Fondunun ölkəmizin mədəni dəyərlərini Fransada tanıtmaq istiqamətində
böyük və yaddaqalan layihələr həyata keçirdiyini, ötən il Mehriban xanım
Əliyevanın iştirakı ilə Reymsdə Azərbaycanla bağlı möhtəşəm tədbirin
keçirildiyini diqqətə çatdırıb, ölkələrimiz arasında əməkdaşlığın inkişafının
vacibliyini önə çəkib.
Reyms Universitetinin vitse-prezidenti
professor Nurəddin Manamanni çıxışında Gəncə Dövlət Universiteti ilə əlaqələrin
qurulmasında, ikitərəfli əməkdaşlıqda və tələbə mübadiləsində maraqlı olduqlarını
bildirib.
“
