Bir ay öncə Türkiyədəki antikorrupsiya əməliyyatları çərçivəsində qandallanan Sədərək gömrüyünün rəisi Mirməhəmməd Seyidov tərəfindən vaxtilə məhrumiyyətlərə və qanunsuz həbsə məruz qoyulmuş iş adamı Məhəmməd Qurbanov Moderator.az-a müsahibə verib, onunla söhbətimizi oxuculara təqdim edirik

Keçən il bu zaman yenil il gecəsini Mirməhəmməd Seyidov öz yaxınları ilə təmtəraqla süfrə başında keçirdi. Mənə qarşı təşkil olunan hücumların, təxribatların, şantajların, bir sözlə, dırnaqarası uğurun  münasibətilə tostlar deyib, əylənirdilər. Mən isə təcridxanada yeni il gecəsini düyü supu ilə, hamam duşundan tökülən şor sudan hazırlanmış çay ilə qarşıladım. Bu il isə yeni il gecəsini M. Seyidov həbsxanada qarşıladı. Amma mən yeni il gecəsini  gömrük rəisinin həbsxanada keçirməsini evimdə ürək ağrısı ilə qarşıladım.

Hələ  2009-cu il tarixdə də 3000 ABŞ dolları dəyərində malımın əlimdən alınıb Gömrük Komitəsinin nəzdində olan dükanda satılaraq mənimsənildiyinə etiraz edib, səsimi qaldırdığım üçün məni bir ay dəlixanaya saldırdılar. Dəlixanadan çıxdıqdan az sonra M. Seyidov avtomobil qəzasına düşdü və ağır xəsarət aldı. Mən yatdığı Şərur Xəstəxanasına onu ziyarət etdim və ona sağlıq arzuladım. Xəstəxanada olan ailə üzvləri, yaxınları, gömrük işçiləri mənim bu ziyarətimi hərəsi bir cür qarşıladı. Kimisi ona yarınmağım kimi, kimisi isə onun başına bu qəzanın gəlməsinə bəlkə də sevinməyim kimi dəyərləndirdilər. Əslində isə bunların heç birisi deyildi. Sadəcə mənə qarşı düşmənçilik edənlərin hamısından kiçiyi və dəyərlisi olduğuna görə onu ziyarət etməyə getmişdim. Bu gün də o fikirdə qalıram. 

2012-ci il dekabrın 8-də mənə qarşı təşkil edilən hücumların, şər-böhtan və şantajların həqiqətən kimlər tərəfindən sifariş edildiyi haqda indiyə qədər açıqlama vermədiyimə görə sifarişçilərə sərf edir ki, M. Seyidovun arxasında gizlənsinlər. “komufulyaj” olsunlar. Bu yalnız və yalnız  gömrüklə mənim aramda olan bir insident kimi dəyərləndirilsin.

Əslində bu təxribatların təşkilinin əsas məqsədi məni neytrallaşdırmaq, əlimdəki çörəyimi başqa bir adama vermək idi... Onu da çox müvəffəqiyyətlə həyata keçirdilər.

Hələlik ad çəkmirəm, amma yaxın vaxtlarda hər şeyi açıqlayacağam. Bu gün mənim uşağımın çörəyini xımır-xımır yeyənin adı hallanmır. Hədəf isə təkcə Mirməhəmməddir. O isə sadəcə icraçıdır. Hadisələrin iştirakçısı olan Sədərək Gömrük Keçid Məntəqəsinin Yük  şöbəsinin rəisi Namiq mənim nə demək istədiyimi gözəl bilir. O, məsləhət bilsə, bütün baş verənləri detalları ilə açıqlaya bilərəm. Amma o buna cəsarət tapıb deyə bilməz ki, açıqla!

Onun yalandan üzümə durub şər atmasına görə mən çox şey itirmişəm. Külli miqdarda maddi zərərə salıblar məni. Mənə edilən mənəvi-psixoloji və fiziki işgəncələrin əvəzinə milyonlar da versələr, haqqımı ödəyə bilməzlər.Haqqımdan vaz keçməmişəm və heç zaman keçmərəm də. Ədalət öz yerini tutmalıdır. Hələlik gözləməyə üstünlük verirəm. Ədalət öz yerini tutmazsa, “ sandıqda nə qədər pambıq varsa tökəcəyəm”. Bu mənim haqqımdır, hüququmdur. Çünki mən nəsilliklə 60 il ömür sürdüyüm evimdən-eşiyimdən, torpağımdan, vətənimdən onun yalançı işverənliyi ucbatından qaçqın və didərgin düşmüşəm. Hesab edirəm ki, mənim açıqlamalarımın məsuliyyətini daşımaq Namiq üçün üzümə dirənmək qədər asan olmaz ki, gerisini  başqaları düzüb qoşsunlar. Mənim susmağa , hər şeyi həzm etməyə haqqım yoxdur, hətta bu yolda öldürsələr belə. Mənə elə gəlir ki, çox adamların məyus olmamaları, mənim yeni təxribatlarla üzləşməməyim üçün Namiq və havadarları yaxşı-yaxşı filirləşməli, tapdanmış və əlimdən alınmış bütün haqlarım geri qaytarılmalıdır ki, bu məsələ qapansın. Hesab edirəm ki, emosiya ilə hərəkət etmənin sonunda buraxılan səhvləri ağılla düzəltmək çətin olur. Onlar emosiyanı kənara qoyub məsələni ağılla, hüquqi yolla həll etməli, haqqımı özümə qaytarmalı, hüquqlarımı bərpa etməlidirlər.