Hollandiyada yaşayan Ələkrəm Hümbətov bir neçə gün öncə Moderator.az-a eksklüziv müsahibə verib, onunla söhbətin ikinci hissəsini təqdim edirik. Birinci hissəsini 23 fevral 00.22-dən "Gündəm" bölümündən oxumaq olar.
-Əlikram
bəy, söhbət əsnasında dediniz ki, “biz sizin yaninizda olmamışıqmı? Qarabağda
döyüşlərdə və ümumiyyətlə Azərbaycanın çətin günlərində sizinlə deyildikmi?
-
Bizim orada dövlətimiz yoxdur, bu, Azərbaycan dövlətinin ərazisidir və
Azərbaycan dövləti bu ərazini müdafiə etməyə borclu idi. Amma sizin sualınız
biraz qəliz, mürəkkəb sualdır. Biz axı dövlət qurmaq iddiasında da olmamışıq.
-
Mən sadəcə bir dövlətin ərazisinə hansı istiqamətdən təcavüz olmasına
baxmayaraq hər bir vətəndaşın əlinə silah alaraq ayrıseçkilik qoymadan böyük
və kiçik xalqlara bölmədən, torpağın müdafiəsinə qalxmalı olduğunu vurğulamaq
məqsədi ilə bu sualı sizə ünvanladım. Təbii ki, siz bizim yanımızda
olmalıydınız. Çünki biz bir xalqıq, Azərbaycan Xalqı!
-
Amerika öz xalqına bütün mümkün azadlıqları verib. Hamı bərabərdir. Hüquqları
qorunur və bu səbəbdən xalq öz varlığı ilə fəxr edir. Azərbaycan hökuməti isə
bizə bu kimi azadlıqlar vermir. Müxalifət də bu məsələdə hakimiyyətin yanındadır.
Siz bir xalq deyirsiniz. Əgər biz qardaşıqsa, qardaş qardaşın evinin qurulması,
xoş güzaranı haqqında düşünməlidir. Hanı bu, harada bunu görürsünüz? Avropada
kilsələrin təmirinə Azərbaycan iqtidarı milyonlar xərcləyir. Bəs nə üçün
talışların problemlərinin həlli üçün vəsait ayrılmır? Talışların tək mətbu
orqanı olan "Tolışi Sədo" qəzeti şəxsi vəsait hesabına çıxır. Niyə görə dövlət tərəfindən yardım ayrılmır,?
Dəfələrlə dövlətə, Mətbuata Yardım Fonduna, Mətbuat Şurasına rəsmi müraciətlər
edilib. Müxalifət qəzetlərinə yardım edən hakimiyyət kiçik xalqın bir qəzetinə
yardım ayırmır. Lənkaranda, Astarada kolleclər var. Təhsil mütəxəssisləri
hazırlayır. Orada talış dili mütəxəssisi hazırlamağa heç cəhd olunubmu? Hər
yerdə deyirlər ki, talış dilində dərslər keçirilir. Bəs o dərsləri kim tədris
edir? İdman və əmək müəllimləri talış dili haqqında nə bilir? Həftədə 2 saat
fakultativ dəsrləri də qazanc yerinə çeviriblər. Bu fakultativ dərsləri idman
və əmək müəllimlərinə pulla satırlar. Avropa Şurasının konvensiyalarına qoşulan
Azərbaycan, onları həyata keçirmək üçün nə edib, hansı strukturları yaradıb?
Müxalifət neyləyir? Milli Şura yarandı, bizim bir nümayəndəmiz orada təmsil
olunurdu. Yadınızdadırmı onun çıxışına hansı reaksiya verildi? Talış xalqının yeganə təmsilçisini oradan getməyə
məcbur etdilər. Budur tolerantlıq, qardaşlıq, insanlıq? Yanaşı yaşamamıza
yaradılan şərait budurmu? Bu separatçılığı kim edir? Bunu da mən edirəm? Bu
boyda separatçılıq edənlərə heç nə demirlər.
- Təbii ki, Azərbaycanda haqsızlıqdır, problemlər
çoxdur, məktəbdə təhsil bərbad haldadır. Yəni bütövlükdə əhalinin
milliyyətindən asılı olmayaraq vəziyyət bərabərdir...
- Bərabərdir? O zaman gəlin bərabərcə
olsun hərşey. Azərbaycana gələn sərvət xalqlar arasında bərabərcə bölünsün.
Regionlarda vəsait əhalinin sayına görə xəclənsin, eyni münasibət bəslənsin.
Azərbaycanda yahudilərin mədəniyyət mərkəzi üçün bina tikilir, çox gözəl(!),
talışlar üçün də tikilsin, bir daxma ayrılsın. Elə sözdə deyil, qardaşlıq
əməldə də olmalıdır. Kim bu bərabərliyi, qarşılıqlı mehriban münasibəti
yaratmağa çalışıb bizim aramızda? Özünüz dediniz və xatirələrimi qarışdırdınız.
Xocalı abidəsini ziyarət etməmə əngəllər törədirlər. Budur sizin tolerantlıq,
bərabərlik? Mənə qarşı Hollandiyada savaş açan musavat təmsilçisi Eldəniz
Yusibova sözüm var: Qarabağda siz də mənim kimi döyüşüb, kontuziya almısınızmı?
Sözlər başqa, Könül xanım, əməl isə sizin dediklərinizin tamamilə əksidir. Biz
də mehriban olmaq istəyirik. Buna siz maneçilik törədirsiniz! Mən bu sözləri
Azərbaycan cəmiyyətinə üz tutub danışıram! Azərbaycan siyasətində, ictimai
həyatında rol oynayanlara üz tutub, deyirəm. Parçalamaq siyasətinə son qoymaq
lazımdır. Bizi qarşı-qarşıya qoyan, parçalamağa cəhd edən insanların çaldığı
havayla oynayırsınız. Buna son qoyulmalıdır! İctimai fikirdə qarşılıqlı nifrəti
aradan qaldırmaq üçün tədbirlər həyata keçirmək lazımdır. Bunu biz, talışlar
etməliyik?
- Azərbaycan cəmiyyətində siz dediyiniz kimi xalqlar
arasında, istər türklərin azsaylı xalqlara, istərsə də azsaylı xalqların
türklərə qarşı heç bir nifrəti, qarşıdurma yoxdur. Ümumiyyətlə, niyə siz
problemlərinizin səbəbkarı kimi Azərbaycan türklərini görürsünüz? Əsrlər boyu
qaynayıb qarışmış millətləri üz-üzə qoymağa ehtiyac varmı?
-
Mən talışların dərdlərini saydım. Biz kimsəni düşmən görmürük. Sadəcə deyirik
ki, yaşamaq istəyirik! Azərbaycanda türklər titul xalqdır. Biz onları böyük
qardaş kimi qəbul edirik. Böyük qardaş olmağın da öz məsuliyyətləri var. Biz
çörək davası da etmirik, kimsədən yaxşı yaşamaq da istəmirik. Biz öz adıyla, öz
diliylə, öz tarixi ilə bir xalq olaraq mövcud olmaq istəyirik. Yeniyetmələr
artıq öz dilini bilmir. Bir millət isə yalnız öz diliylə var olur. Dil ölüncə
biz də yox olacağıq. Başqa heç nə istəmirik, sadəcə, öz dilimizi, öz
mədəniyyətimizi yaşatmaq, inkişaf etdirmək, öz mətbu orqanımıza malik olmaq
istəyirik. Buna tək Azərbaycan iqtidarı
yox, həm də xalqı qarşı oldu. Bunu anlamaqda xeyli çətinlik çəkirəm. Əgər
biz, siz dediyiniz kimi qardaşıqsa, qardaş qardaşın evinin qurulmasına, xoş
güzaranına çalışar. Böyük qardaşa kiçik qardaşları məhv etmək yaraşmaz. Əgər
bizim fikirlərimizə diqqət yetirilsəydi, qarşılıqlı hörmət olsaydı, bu yerə
gəlib çıxmazdıq. AP-da keçirilən tədbirdə bir nəfər əlinə iki kitab alıb
bağırır ki, biz talış dilində kitab dərc etmişik, biz talışlarla qardaşıq. Hanı
"Talışın səsi" qəzetinin redaktoru? Onun tifağını niyə dağıtdılar?
Övladları niyə məhv edildi?
- Axı Azərbaycanda türklər də o
vəziyyətdədir. Elmar Hüseynov, Sərdar Əlibəyli, Əvəz Zeynallı da talış deyil
ki...
-
Azərbaycan xalqının seçdiyi iqtidar edir bunları.
- İqtidarı Azərbaycan xalqı seçməyib. Sadəcə
“güclərin” təyin etdiyi iqtidara türk, talış, ləzgi, kürd olaraq boyun
əyirik...
- Mən gerçəkdən çox yorulmuşam bunları düşünməkdən. Millət deyirsiniz. Amma biz millət olaraq birləşə və bizi üz-üzə qoyanlara qarşı mübarizə edə bilmirik. Xalqın öz sərbəst rəyi və münasibəti yoxdur. Zombiləşmə var Azərbaycanda və xalq eləcə deyilənə inanaraq, kiçik millətlərin haqqını tələb etməsini “separatçılıq” adlandırır. Beləcə nifaq dərinləşir. Televiziya nə deyirsə, ona inanırlar, məqam sahibləri nə deyir, onunla razılaşırlar, hakimiyyət tam olaraq milləti idarə edir və bu millət oturub özü düşünmür, analiz etmir. Düşünmək, çıxış yolunun tapılmasında iştirak etmək həvəsində də deyillər. Hamı problemləri kiminsə həll etməsini gözləyir. Məni əsəbi edən də budur. Fikirləşirəm ki, axı Allah bizə düşüncə verib, niyə biz bundan istifadə etmirik?
Ardı var...