Moderator.az mühacirətdə olan həmkarımızı Könül Sərdarlının keçmiş müdafiə naziri Rəhim Qazıyevlə müsahibəsini təqdim edir:
- Rəhim bəy, Xocalı faciəsi törədilən ərəfədə
Şuşadaydınızmı?
115%">
- Bəli. O zamanlar mən Şuşa şəhərində idim.
Hadisə öncəsi ayağımdan yaralanmışdım və qoltuq ağacı ilə gəzirdim.
- Sizin Xocalıya yardım etmək imkanınız var
idimi?
- O zaman bizim Şuşada bir ədəd BM21-imiz var
idi. Xankəndindən Şuşanı 366-cı alayın (rus) zabitləri tank vasitəsilə
koordinatla vururdular. Bizim Şuşada tankımız yox idi, BTR-lər vardı. BMP-lərin
isə 25 yanvar 1992-ci ildə Daşaltı əməliyyatı zamanı aidiyyatı sürsatı işlədilmişdi.
Onlar sadəcə yararsız qutu kimi Şuşada dururdu. Biz qeyrətli oğulların köməkliyi
ilə bir xeyli qrad mərmiləri gətirmişdik. Bunları 1991-ci ilin dekabırının
sonlarında rus zabitindən pulla almışdıq. Amma qradı işlətmək üçün mütəxəssisimiz
yox idi. Mən Şuşadan çıxanda kilsənin zirzəmisində 6 min qrad mərmisi
qalmışdı, 6 min də Turşsuda var idi. Qrad çox güclü artilleriya qurğusudur
və mütəxəssisimiz olsaydı, ondan səmərəli istifadə edə bilərdik. O, elə bir
qurğudur ki, onu "pozisiya"ya çıxarmaq lazım deyil, istər dağın
dalına yerləşdir, koordinatları döğru verdikdən sonra nişan alınan nöqtəni dəqiqliklə
vurur. Şuşada "elektroset"də mühəndis işləyən Adil adlı bir şuşalı
balası vardı. O, qraddan atəşı "dədə-baba" qaydası ilə açırdı. Biz bir
nəfəri çıxardırdıq vışkaya, o, oradan binoklla baxırdı və bizdə geoloqların işlətdiyi
simli telefon aparatı vardı, onunla qradın vurduğu nöqtəni bizə söyləyirdi və
onun istiqamətləndirməsi ilə atılan mərmi haraya düşdüyünü, bir az sağa-sola, irəli-geri
atılması gərəkdiyini söyləyirdi, məsələn, hədəfdən 100 metr uzağa düşdü və Adil
onun məlumatına görə qradın meyil bucağını bir az dəyişirdi, beləliklə də hədəfi
dəqiqləşdirirdik. Atdığımız bir neçə mərmidən sonda biri hədəfə düşürdü. Bu
minvalla Xankəndində əsas obyektlərin hamısını dağıtmışdıq. Fevralın 13-ü,
Malıbəylinin işğal olunduğu günün səhəri
mən yaralanmışdım və yeriyə bilmirdim. Bu, bizim dəstəyə salınmış xainin əliylə
olmuşdu. Bizdən 8 nəfər öldü, 6 nəfər yaralandı.
- Kim idi o xain?
- İndi o qəhrəmandır, məni ittiham edirlər.
Adı Emin Məmmədov.
Biz Xankəndini beləcə atəşə tuturduq və orada alovun hündürlüyü 50-100
metrə qalxırdı. Çünki ayaqqabı fabrikində tez alışan maddələr vardı.
İnsanların "ulama" səsi bizə qədər gəlib çatırdı. Gəncədə yerləşən
23-cü diviziyanın 366-cı alayı Xankəndində idi və diviziyanın komandanı general Budeykin idi. İndi səfir
olan Eldar Həsənov o dövrdə Gəncədə polis rəisi idi. O, mənə zəng
etdi və dedi ki, Rəhim müəllim, sizinlə general Budeykin danışacaq, xahiş edirəm
onunla biraz mülayim olasınız. Cavab
verdim ki, mən bilirəm kimlə necə danışmaq lazımdır!
General dəstəyi əlinə alan kimi
başladı rus söyüşləri ilə mənə hədə-qorxu gəlməyə ki, bəs, sən kimsən, 366-cı
alayın şəhərciyinə atəş açmısan?!
366-ci alayın zabitləri bizi tankla
vururdular, hərbçi idilər və koordinatlarla atəş açaraq evləri dağıdırdılar.
Tankın atəşı 10 km-ə qədər gedir. Hava xətti ilə Xankəndindən Şuşaya 4 km-dir.
Mən də Budeykinə dedim ki, sənin
zabitlərin Şuşanı atəşə tutur, sən onlara de, atmasınlar, mən də atmayım. Mənim
ruslarla müharibə etmək fikrim yoxdur. O söz verdi ki, bizim tərəfə atəşi
dayandıracaq.Lakin heç 2 saat keçməmiş yenə bizə atəş açdılar. Bizdə də qrad
hazır vəziyyətdə idi, biz də atdıq. Həmin oğlan - Adil sağ salamatdır şükür
Allaha. Olanları təsdiq edə bilər.
Sonra rus vertolyotu qalxıb gəldi
Şuşaya. İndi Ayaz Mütəllibov da özündən razı danışır, amma dövlət başçısı təpər
sahibi olsaydı SSRİ dağıldıqdan sonra rus generalı Azərbaycan ərazisində Xankəndini
qorumaq üçün Şuşaya vertolıyot qaldırıb atəşə tutmaq əmri verə bilməzdi. Ayaz Mütəllibov o vaxt susub oturmuşdu.
Vertolyotlar gəlib Şuşaya atəş
açdılar və OMON-un bir BTR-i vuruldu, iki döyüşçüsü yaralandı. Bundan sonra
18-i, 20-i və 22-i eyni hadisələr təkrarlandı.
Fevralın 25-indən 26-sına keçən gecə - faciə gecəsi Şuşada möhkəm duman idi. O
üzdən biz qraddan istifadə edə bilmirdik. Dediyim kimi mütəxəssis yox idi və hədəfi
gözlə görə bildiyimiz halda atəş aça bilirdik.
Hücüma keçəcək imkana da malik deyildik, 4 dənə
piyadaların döyüş maşını vardı, lakin dediyim kimi boş qutudan fərqlənmirdi. Mərmisi
olmayan döyüş maşını ilə hucuma keçilər? Vallah, əlimdə hər hansı imkan
olsaydı, hər şeyi edərdim. Ayağımdan da yaralı idim və yeriyə bilmirdim. Yerisəydim,
irəlidə gedib, uşaqları ardımca aparardım.
Döyüşçülərin əlində olan atıcı silah isə kalaşnikov avtomatı idi. Biz
bununla nə edə bilərdik axı?
- Bəs Ağdamda vəziyyət necə idi?
- Həmin dövürdə 366-ci alay Xankəndində yerləşirdi.
Biri var biz əli yalın Xankəndinin üzərindən Xocalıya gedəydik, biri də var
Ağdamdan, Əsgərandan keçib Xocalıya girəydilər. Ağdamda Xocalıya hücuma keçmək
üçün nələr var idi: 12 ədəd T72 tank, 12 ədəd BMP2, 44 ədəd dördtəkərli üstü
plemyotlu BRDM, bir o qədər də BTR, 49 ədəd dolu dağıdan (kristal və alazan
tipli) toplar, mərmi kifayət qədər, 3 min atıcı silah; avtomat, plemyot, 3 mindən
də artıq canlı qüvvə. Ağdamın Muradbəyli kəndindəki "ximçast"ı (kimyəvi
hərbi hissə) hadisədən üç gün qabaq Rövşən Cavadovun köməyilə Ağdam camaatı ələ
keçirmişdi. Ordan 44 ədəd BMVM, 75 ədəd
üstündə kimyəvi zərbə zamanı kimyəvi radiasiyanın dərəcəsini ölçmək üçün avadanlıq
olan UAZ avtomobili götürülmüşdü. Tamerlan Qarayev də o zaman Ağdamda idi və
onun ağsaqqallığı ilə özündən 2 dəfə qiymətli avadanlıq bir tərəfə atıldı, UAZ-lar isə kolxoz-sovxoz sədrlərinə
paylanıldı.
Ayaz Mütəllibovun indi xəyanətkar adlandırdığı,
amma o zaman A. Mütəllibovun ən yaxın adamı olan, Bakı şəhər icrayə komitəsinin
sədri Rüfət Azayev (Allah rəhmət eləsin!) hökumətin puluna ruslardan 4 ədəd
qrad BM21 alıb, general Dadaş Rzayevlə göndərmişdi Ağdama.
Xocalı ilə Ağdamın arasında isə bir dənə Əsgəran var və saydığım texnika
ilə Əsgəranı tapdayıb keçmək olardı. Amma hərəkətə gəlib, hücuma keçmirlər”¦Üstəlik
4 qrad qaçırılır”¦
- Maraqlı məqama gəlib çatdıq. Bu qradların
qaçırılması və hazırlanan hücumun pozulması haqqında Camal Əhmədov da öz
kitabında ətraflı yazıb. Sizin Xocalıya hücum əməliyyatı hazırlanmasından xəbəriniz
vardımı?
- Xeyr. Mən Şuşada idim və belə əməliyyatdan xəbərim
yox idi. Həmin gün telefonla danışıb, onlara yalvarmışam ki, mənim əlimdə heç nə
yoxdur, siz Ağdamdan hücuma başlayın. Ayaz Mütəllibovla telefon əlaqəsi yaratdığımda, o, məni əmin edirdi ki, Xocalıya kömək olacaq.
- Demək, hamının xəbəri vardı ki, o gecə
Xocalıya ermənilər tərəfindən hucum olacaq?
- Bütün gecə mən Xocalıdakı rabitəçi qızlarla əlaqədə
olmuşam. Ayaz Mütəllibovla bir neçə dəfə telefonla danışmışam. O da mənə deyirdi
ki, nə varsa göndərmişik, kömək edəcəklər!
- Bəs niyə kömək olmadı?
- Ağdama yetərincə hərbi texnika göndərilmişdi
və orada əvvəldən də olan texnika, böyük miqdarda sursat vardı. Buna
baxmayaraq, general Dadaş Rzayev oturub BTR-də gedib durmuşdu Goranboy-Ağdam tərəfdə.
Sanki, bu insanın hərbidən xəbəri yox idi. Bilirsiniz, parakəndəlik var idi.
- Ağdamda rəsmi hərbi səlahiyyət sahibi
(cavabdeh) kim idi?
- Səlahiyyət
Dadaş Rzayevin əlində idi. Ali Baş komandan oraya onu göndərmişdi. Ondan qabaq Tahir Əliyev-DİN-də idarə rəisi, Qarabağ üzrə komandan
idi. Tamerlan Qarayev də orda idi, amma Qarabağın müdafiəsi ilə bağlı rəsmi vəzifəsi
yox idi.
- Ağdamda
hansı canlı qüvvələr vardı?
- OMON qüvvələri, Ağdamın yerli-özünümüdafiə
batalyonları, Şirin Mirzəyev batalyon yaratmışdı və özü zabit kadrı idi. Digər ərazilərdən
qüvvələr ordaydı, 3 minə yaxın canlı qüvvə toplaşmışdı.
- Camal Əhmədov deyir ki, Fəhmin Hacıyev 24-ü
gecəsi hazırlanan hücum məşvərətində qarışıqlıq salmaqla əməliyyata hazırlığı
pozub və qrad qurğularını özüylə aparıb. Belə ki, iki AXC üzvü dövlət
telefonundan zəng var və Fəhmin bəylə danışmaq istəyirlər dedikdən sonra Fəhmin bəy otaqdan
çıxır və geri dönüb deyir ki, hücuma
dövlət səviyyəsində icazə verilmədi... Bu informasiyaya aydınlıq gətirin xahiş edirəm.
Çünki Fəhmin bəy bu məsələ ilə bağlı konkret danışmır...
- Yəqin ki, bir gün Fəhmin bəy bu müəmmaya
aydınlıq gətirəcək. Məndə olan məlumata görə Fəhmin Haciyev o zaman Bakıda bəzi
AXC rəhbərlərinin göstərişlərini yerinə yetirirdi. Qradlar isə gecəylə Ağcabədi
tərəfə qaçırılmışdı. Mən əminəm ki, Fəhmin Hacıyev bir gün o günahsız balaların
ruhu qarşısında vicdan əzabına dözməyib, sirləri açacaq. Fəhmin bəy heç də
vicdansız adam deyil, o da gedən siyasi oyunların qurbanı olub.
- Oğurlanan qradların əhəmiyyəti nə qədər
böyük idi?
- O qradlarla Ağdamdan bir başa Xankəndini
darmadağın etmək olardı. Qrad düz xətt üzrə 20 km-ə qədər atır, 20 km də
Ağdamdan düz xətt üzrə Xankəndinə olan məsafədir. Abdalgülablı tərəfdən
qradları təpənin üstünə qaldırsaydılar 22-23 km məsafəni vuracaqdı. Bu da Xankəndinin
mərkəzi deməkdi. Dörd ədəd qrad çox böyük qüvvə demək idi. Qraddan hər saatda
40 dəfə atəş açmaq olur. Kifayət qədər də mərmi alınmışdı.
- Xocalı faciəsinin törədilməsində erməni və
ruslar hansı məqsədi güdürdü? Səbəb kimi nəyi görürsünüz?
- O zaman SSRİ yerində MDB yaranmışdı və
ruslar bizi MDB-yə cəlb etməyə çalışırdı. İlk bəyanatı Heydər Əliyev vermişdi
ki, Azərbaycanın hər hansı quruma özünü aparıb soxması onun müstəqilliyinə təhlükə
yaradır. Maraqlı məqam isə bundan ibarətdir ki, özü hakimiyyətə gələn kimi 6
rayonun getməsi fonunda, 93-cü ilin avqust ayında ilk olaraq bu quruma daxil
olmaq üçün imza atdı.
Hadisələr
hələ də araşdırılmayıb və araşdırılmayacaq da. O vaxta qədər ki, hadisənin
baiskarları siyasi arenadadır. Xocalının icra başçısı Elman Məmmədov (xanımı da
ermənidir) neçə illərdir deputatdır. Xocalı hadisəsindən qabaq isə Elman özü
parlamentdə də etiraf edib ki, mən getmişdim Naxçıvana Heydər Əliyevin yanına.
Sual yaranır: - Niyə getmişdin? Onu da əlavə edim ki, Şuşanın işğalı ərəfəsində
Nizami Bəhmənov Naxçıvanda olub, aprelin 29-da isə Elbrus Orucov Naxçıvana,
Heydər Əliyevin yanına gedib.
Bilirsinizmi, xəyanət evin içindən olanda
bunu vaxtında açıb, qarşısını almaq çox çətindir. Xocalı faciəsi həm də ölkədaxili
siyasi oyunlar, hakimiyyət davası nəticəsində
baş verdi.
- Rəhim bəy, daha konkret, kim idi müqəssir?
- Məsələ burasındadır ki, Xocalıya hücum rusların
bizi MDB-yə soxmaq istəyi və itaətsizliyimizi cəzalandırmaları idisə, faciənin
miqyasının böyüklüyü ölkədaxili hakimiyyət uğrunda gedən mübarizənin nəticəsi
idi.
Ermənilərin məqsədi isə aydındır: Torpaqlarımıza
yiyələnmək və bizi millət olaraq məhv etmək arzusu.